ನೆರೂಲ್‌ ಶ್ರೀ ಬಾಲಾಜಿ ಮಂದಿರ: ಶ್ರೀವರಿ ಬ್ರಹ್ಮೋತ್ಸವಂ ಪ್ರಾರಂಭ

ಮುಂಬಯಿ: ನೆರೂಲ್‌ ಶ್ರೀ ಬಾಲಾಜಿ ಮಂದಿರದಲ್ಲಿ ಶ್ರೀವರಿ ಬ್ರಹ್ಮೋತ್ಸವಂ ಫೆ. 6ರಿಂದು ಪ್ರಾರಂಭಗೊಂಡಿದ್ದು, ಫೆ. 11ರ ವರೆಗೆ ವಿವಿಧ ಧಾರ್ಮಿಕ ಕಾರ್ಯಕ್ರಮಗಳೊಂದಿಗೆ ಜರಗಲಿದೆ.

ಪ್ರತಿದಿನ ಬೆಳಗ್ಗೆ 6.30ರಿಂದ ವಿವಿಧ ಧಾರ್ಮಿಕ ಕಾರ್ಯಕ್ರಮಗಳೊಂದಿಗೆ ಉತ್ಸವ ನಡೆಯಲಿದ್ದು, ಪರಿಸರದಲ್ಲಿ ಪ್ರಸಿದ್ಧಿ ಪಡೆದು ವಿಜೃಂಭಣೆಯಿಂದ ಜರಗುವ ಉತ್ಸವ ಇದಾಗಿದೆ. 5 ದಿನಗಳ ಉತ್ಸವದ ಈ ಸಂದರ್ಭದಲ್ಲಿ ಬ್ರಹ್ಮದೇವರು ಭೂಮಿಗಿಳಿದು ಎಲ್ಲ ದೇವತೆಗಳ ಜತೆಗೆ ಶ್ರೀ ಬಾಲಾಜಿಯ ಉತ್ಸವವನ್ನು ವೀಕ್ಷಿಸುತ್ತಾರೆ ಎಂಬ ನಂಬಿಕೆ ಭಕ್ತರಲ್ಲಿದೆ. ಆರಂಭದ ದಿನ ಗರುಡ ಲಾಂಛನದ ಧ್ವಜಾರೋಹಣ ನಡೆಯಿತು.

ಪ್ರತಿದಿನ ಬೆಳಿಗ್ಗೆ ಹಾಗೂ ಸಂಜೆ ವಿಶೇಷ ಪೂಜೆಯೊಂದಿಗೆ ಸುಂದರವಾದ ಮೆರವಣಿಗೆ ವೇದಪಾರಾಯಣ ಇತ್ಯಾದಿ ಧಾರ್ಮಿಕ ಕಾರ್ಯಕ್ರಮಗಳು, ಸಾಂಸ್ಕೃತಿಕ ಕಾರ್ಯಕ್ರಮಗಳು ಕ್ಷೇತ್ರದಲ್ಲಿ ಜರಗಲಿದೆ. ಜಾತ್ರೆಯ ಕೊನೆಯ ದಿನದಂದು ದ್ವಾದಶ ಆರಾಧನ ಮತ್ತು ಪುಷ್ಪಯಾಗಂ ಜರಗಲಿದ್ದು. ಅನಂತರ ಧ್ವಜ ಕೆಳಗಿಳಿಸಲಾಗುವುದು. ಈ ಬ್ರಹ್ಮೋತ್ಸವ ಪೋಷಕ ಸಂತರಾದ ಪಾರಂಪರಿಕ ಪುರೋಹಿತ ಪೇರಿಯ ಕೋವಿಲ್‌ ಕಲ್ವಿ ಅಪ್ಪನ್‌ ಶ್ರೀ ಸತಗೋಪ ರಾಮಾನುಜಾಜೀ ಸ್ವಾಮೀಜಿ ತಿರುಮಲ ತಿರುಪತಿ ಅವರ ಮಾರ್ಗದರ್ಶನದಲ್ಲಿ ನಡೆಯಲಿದೆ.

ಭಕ್ತಾದಿಗಳಿಂದ ಭಕ್ತಿಪೂರ್ವಕವಾಗಿ ಹೂ-ವಸ್ತ್ರ, ಪ್ರಸಾದ ಪೂಜಾ ಸಾಮಗ್ರಿಗಳನ್ನು ವಿನಮ್ರತೆಯಿಂದ ಸ್ವೀಕರಿಸಲಾಗುವುದು ಎಂದು ಶ್ರೀ ಲಕ್ಷ್ಮೀನಾರಾಯಣ ಸಭಾ ಅಧ್ಯಕ್ಷ ಗೋಪಾಲ ವೈ. ಶೆಟ್ಟಿ ಮತ್ತು ಪದಾಧಿಕಾರಿಗಳು ತಿಳಿಸಿದ್ದಾರೆ.

ಇದನ್ನೂ ಓದಿ:ಪ.ಬಂಗಾಳದಲ್ಲಿ ಬದಲಾವಣೆ ತರಲು ಬಿಜೆಪಿಯಿಂದ ಮಾತ್ರ ಸಾಧ್ಯ: ಮಮತಾ ವಿರುದ್ಧ ಮೋದಿ ವಾಗ್ದಾಳಿ

ನೆರೂಲ್‌ ಶ್ರೀ ಲಕ್ಷ್ಮೀನರಸಿಂಹ ಸಭಾ 1999 ಎಪ್ರಿಲ್‌ ಅಕ್ಷಯ ತೃತೀಯದಂದು ಸ್ಥಾಪನೆಗೊಂಡಿದ್ದು ಇಲ್ಲಿ ಆಧ್ಯಾತ್ಮಿಕ ಸಾಂಸ್ಕೃತಿಕ ಮತ್ತು ಸಾಮಾಜಿಕ ಕಾರ್ಯಗಳು ನಿರಂತರವಾಗಿ ಕ್ಷೇತ್ರದಲ್ಲಿ ನೋಂದಣಿಗೊಂಡ ಪಬ್ಲಿಕ್‌ ಟ್ರಸ್ಟಿನ ಮೂಲಕ ಜರಗುತ್ತಿದೆ. 1999ರಲ್ಲಿ ಭಗವಾನ್‌ ಶ್ರೀ ಬಾಲಾಜಿ ಮಂದಿರವನ್ನು ಹಾಗೂ ಮಂದಿರದ ಪರಿಸರದಲ್ಲಿ ಭಗವಾನ್‌ ಶ್ರೀ ಬಾಲಾಜಿ ಜತೆಗೆ ಪದ್ಮಾವತಿ ಶ್ರೀ ದೇವಿ, ಶ್ರೀ ವಿದ್ಯಾಗಣಪತಿ, ಶ್ರೀ ಲಕ್ಷ್ಮೀನರಸಿಂಹ ಶ್ರೀ ರಾಮಾನುಜ ಶ್ರೀ ಯೋಗ ಆಂಜನೇಯ ಮೊದಲಾದ ಸುಂದರವಾದ ಉಪ ಮಂದಿರಗಳನ್ನು ನಿರ್ಮಿಸಲಾಗಿದೆ. ಸುಂದರವಾದ ರಾಜಗೋಪುರ ದೊಂದಿಗೆ ಭಕ್ತಾದಿಗಳನ್ನು ತನ್ನೆಡೆಗೆ ಆಕರ್ಷಿಸುತ್ತಿದೆ. ಕೊರೊನಾ ಮಾರ್ಗಸೂಚಿಗಳಿಗೆ ಅನುಗು ಣವಾಗಿ ನಡೆಯಲಿರುವ ಈ ಉತ್ಸವದಲ್ಲಿ ಭಕ್ತಾದಿಗಳು ಪಾಲ್ಗೊಂಡು ದೇವರ ಪ್ರಸಾದ ಸ್ವೀಕರಿಸಿ ಅನುಗ್ರಹಕ್ಕೆ ಪಾತ್ರರಾಗುವಂತೆ ಮಂದಿರದ ಪ್ರಕಟನೆ ತಿಳಿಸಿದೆ.