ಭೀಮ್‌ ಆ್ಯಪ್‌ ರೆಫ‌ರ್‌ ಮಾಡಿದ್ರೆ ಕ್ಯಾಷ್‌ಬ್ಯಾಕ್‌

ನವದೆಹಲಿ: ನೀವೂ ಭೀಮ್‌ ಆ್ಯಪ್‌ ಬಳಸುತ್ತಿದ್ದೀರಾ? ಇನ್ನು ನೀವು ಈ ಆ್ಯಪ್‌ ಅನ್ನು ಬಳಸುವಂತೆ ಇನ್ನೊಬ್ಬರಿಗೆ ಉತ್ತೇಜನ ನೀಡಿದರೆ(ರೆಫ‌ರ್‌ ಮಾಡಿದರೆ) ನಿಮಗೆ 10 ರೂ. ಕ್ಯಾಷ್‌ಬ್ಯಾಕ್‌ ಸಿಗಲಿದೆ. ಅಂದರೆ, 20 ಜನರಿಗೆ ನೀವಿದನ್ನು ಪರಿಚಯಿಸಿದರೆ 200 ರೂ. ಕ್ಯಾಷ್‌ಬ್ಯಾಕ್‌ ಪಡೆಯಲಿದ್ದೀರಿ.

ಡಿಜಿಟಲ್‌ ವ್ಯವಹಾರವನ್ನು ಪ್ರೋತ್ಸಾಹಿಸುವ ನಿಟ್ಟಿನಲ್ಲಿ ಪ್ರಧಾನಿ ನರೇಂದ್ರ ಮೋದಿಯವರೇ ಈ ರೆಫ‌ರಲ್‌ ಬೋನಸ್‌ ಯೋಜನೆಯನ್ನು ಘೋಷಿಸಿದ್ದಾರೆ. ಅದರಂತೆ, ಭೀಮ್‌ ಆ್ಯಪ್‌ ಹೊಂದಿರುವ ಗ್ರಾಹಕರು ಮತ್ತು ಹೊಸದಾಗಿ ಅಳವಡಿಸಿಕೊಳ್ಳುವವರು ನಗದು ಬೋನಸ್‌ ಪಡೆಯಲಿದ್ದು, ಅದರ ಮೊತ್ತ ನೇರವಾಗಿ ಗ್ರಾಹಕರ ಖಾತೆಗಳಿಗೆ ವರ್ಗಾವಣೆ ಯಾಗಲಿದೆ. ಈ ಆ್ಯಪ್‌ ಬಳಸುವ ವ್ಯಾಪಾರಿಗಳೂ ಪ್ರತಿ ಯೊಂದು ವಹಿವಾಟಿಗೂ ಕ್ಯಾಷ್‌ಬ್ಯಾಕ್‌ ಪಡೆಯಲಿದ್ದಾರೆ. 

ಶುಕ್ರವಾರ ನಾಗ್ಪುರದಲ್ಲಿ ಅಂಬೇಡ್ಕರ್‌ರ 126ನೇ ಜಯಂತ್ಯುತ್ಸವ ಕಾರ್ಯಕ್ರಮದಲ್ಲಿ ಬಯೋಮೆಟ್ರಿಕ್‌ ಆಧರಿತ ಪಾವತಿ ವ್ಯವಸ್ಥೆಯಾದ ಭೀಮ್‌-ಆಧಾರ್‌ ಪಾವತಿ ಆ್ಯಪ್‌ಗೆ ಚಾಲನೆ ನೀಡಿದ ವೇಳೆ ಪ್ರಧಾನಿ ಮೋದಿ ಈ ವಿಚಾರ ತಿಳಿಸಿದ್ದಾರೆ.