“ಅನೇಕರ ಬಾಳಿಗೆ ಬೆಳಕಾದ ದೇವರಾಜ ಅರಸು’ 

ಬೆಳ್ತಂಗಡಿ: ಹಳ್ಳಿಯ ಮನೆಗಳಿಗೆ  “ಭಾಗ್ಯಜ್ಯೋತಿ’  ಯೋಜನೆ ತಂದು ಮನೆ ಬೆಳಗುವ ಕಾರ್ಯ ಮಾಡಿದ್ದೂ ಮಾತ್ರವಲ್ಲದೆ, ಜೀತಮುಕ್ತಿ, ಮಲಹೊರುವ ಪದ್ಧತಿ ನಿಷೇಧದಂತಹ ಮಹತ್ತರ ಕಾಯ್ದೆಯನ್ನು ತಂದು ಅನೇಕರ ಬಾಳಿನಲ್ಲೇ ಆಶಾಭಾವನೆಯ ನಂದಾದೀಪ ಬೆಳಗಿದವರು ಕೀರ್ತಿ ಶೇಷ ದೇವರಾಜ ಅರಸು ಅವರು ಎಂದು ಪತ್ರಕರ್ತ ಅಶ್ರಫ್‌ ಆಲಿಕುಂಞಿ ಹೇಳಿದರು.

ತಾಲೂಕು ಆಡಳಿತ ಹಾಗೂ ತಾ.ಪಂ. ಬೆಳ್ತಂಗಡಿ, ಹಿಂದುಳಿದ ವರ್ಗಗಳ ಕಲ್ಯಾಣ ಇಲಾಖೆ ಬೆಳ್ತಂಗಡಿ, ನಗರ ಪಂಚಾಯತ್‌ ಬೆಳ್ತಂಗಡಿ ಇವರ ಸಂಯುಕ್ತ ಆಶ್ರಯದಲ್ಲಿ  ತಾ.ಪಂ. ಸಭಾಂಗಣದಲ್ಲಿ ನಡೆದ, ಕರ್ನಾಟಕದ ಮಾಜಿ ಮುಖ್ಯಮಂತ್ರಿ, ಮೌನಕ್ರಾಂತಿಯ ಹರಿಕಾರ ಡಿ. ದೇವರಾಜ ಅವರ 102ನೇ ಜನ್ಮದಿನಾಚರಣೆ ಕಾರ್ಯಕ್ರಮದಲ್ಲಿ ಅವರು ಮಾತನಾಡಿದರು. ವೃದ್ಧಾಪ್ಯ ವೇತನ, ವಿಕಲಾಂಗ ವೇತನ, ನಿರುದ್ಯೋಗಿ ವಿದ್ಯಾವಂತರಿಗೆ ಸ್ಟೈಪೆಂಡರಿ ಯೋಜನೆ, ದುರ್ಬಲ ಹಿಂದುಳಿದವರಿಗೆ ನಿವೇಶನ ಮತ್ತು ಕಡಿಮೆ ವೆಚ್ಚದಲ್ಲಿ ಮನೆ ನಿರ್ಮಾಣ, ಭೂಮಸೂದೆ ಕಾಯ್ದೆ ಜಾರಿ ಮೊದಲಾದ ಕ್ರಾಂತಿಕಾರಿ ಯೋಜನೆ ಜಾರಿಗೆ ತಂದಿರುವ ಅರಸು ಅವರು ಅವರ ‘ದೇವರಾಜ’ ಹೆಸರು ಸೂಚಿಸುವಂತೆ ಬಡವರ ಪಾಲಿಗೆ “ದೇವ’ರಾಗಿ ರಾಜ್ಯದ ಪಾಲಿಗೆ ‘ರಾಜ’ರಾಗಿ ಮೆರೆದ ಏಕಮೇವಾದ್ವಿತೀಯ ಅರಸು ಅವರಾಗಿದ್ದರು. ಹೆಚ್ಚೇಕೆ ನಮ್ಮ ರಾಜ್ಯಕ್ಕೆ “ಕರ್ನಾಟಕ’ ಎಂಬ ಹೆಸರನ್ನೇ ತಂದುಕೊಟ್ಟ ಅವರು ಎಂಬುದು ರಾಜ್ಯದಲ್ಲಿ ಅಳಿಸಿಹಾಕಲಾಗದ ಇತಿಹಾಸ ನಿರ್ಮಿಸಿದ್ದಾರೆ ಎಂದರು.

ಶಾಸಕ ವಸಂತ ಬಂಗೇರ ಉದ್ಘಾಟಿಸಿ, ಬಡವರ ಪಾಲಿಕೆ ದೇವರಾಜ ಅರಸು ಅವರು ಅವಿಸ್ಮರಣೀಯರು. ವಿದ್ಯಾರ್ಥಿಗಳಿಗೆ ವಸತಿ ನಿಲಯ ಸ್ಥಾಪಿಸಿ ಹಳ್ಳಿಯ ಮಕ್ಕಳನ್ನೂ ಪದವೀಧರರನ್ನಾಗಿಸಿದ ಕೀರ್ತಿ ಅವರಿಗೆ ಸಲ್ಲುತ್ತದೆ ಎಂದರು.ಪಟ್ಟಣ ಪಂಚಾಯತ್‌ ಅಧ್ಯಕ್ಷ ಮುಗುಳಿ ನಾರಾಯಣ ರಾವ್‌, ರಾಷ್ಟ್ರೀಯ ಹಬ್ಬಗಳ ಆಚರಣಾ ಸಮಿತಿ ಅಧ್ಯಕ್ಷ, ತಹಶೀಲ್ದಾರ್‌ ಎಚ್‌.ಕೆ. ತಿಪ್ಪೇ ಸ್ವಾಮಿ, ತಾ.ಪಂ ಕಾರ್ಯ ನಿರ್ವಹಣಾಧಿಕಾರಿ ಬಸವರಾಜ್‌ ಉಪಸ್ಥಿತರಿದ್ದರು.

ಅಧ್ಯಕ್ಷತೆಯನ್ನು ತಾ.ಪಂ. ಅಧ್ಯಕ್ಷೆ ದಿವ್ಯಜ್ಯೋತಿ ವಹಿಸಿದ್ದರು. ಸಭೆಯಲ್ಲಿ ಬಿಸಿಎಂ ಹಾಸ್ಟೆಲ್‌ನಲ್ಲಿದ್ದು ಸಾಧನೆ ಮಾಡಿದ ವಿದ್ಯಾರ್ಥಿಗಳನ್ನು, ಶೇ. 100 ಫಲಿತಾಂಶ ತಂದ ಮಚ್ಚಿನ ಮೊರಾರ್ಜಿ ದೇಸಾಯಿ ವಸತಿ ಶಾಲೆಯನ್ನು ಶಾಸಕರು ಗೌರವಿಸಿದರು. ಮಡಂತ್ಯಾರು ಮೆಟ್ರಿಕ್‌ಪೂರ್ವ ವಿದ್ಯಾರ್ಥಿ ನಿಲಯಕ್ಕೆ 9 ಲಕ್ಷ ರೂ. ವೆಚ್ಚದಲ್ಲಿ ಶೌಚಾಲಯ ಮತ್ತು ಸ್ನಾನಗೃಹ ಕಟ್ಟಡ ಒದಗಿಸಿಕೊಟ್ಟ ಪೆಟ್ರೋನೆಟ್‌ ಕಂಪೆನಿಯ ಅಧಿಕಾರಿ ರಾಜನ್ನವರ್‌ ಅವರನ್ನು ಶಾಸಕರು ಸನ್ಮಾನಿಸಿದರು.ಅಕ್ಷರ ದಾಸೋಹ ಉಪನಿರ್ದೇಶಕ ಕೆ.ಜಿ. ಲಕ್ಷ್ಮಣ ಶೆಟ್ಟಿ ಸ್ವಾಗತಿಸಿದರು. ಜಯಾನಂದ ಲಾ„ಲ ಮತ್ತು ಎಸ್‌. ಆರ್‌. ನಾಯಕ್‌   ನಿರೂಪಿಸಿದರು. ಹಿಂದುಳಿದ ವರ್ಗಗಳ ಪ್ರಭಾರ ವಿಸ್ತಣಾಧಿಕಾರಿ ಸುರೇಂದ್ರ ಎಸ್‌ ವಂದಿಸಿದರು.