ಮತ್ತೆ 50 ಮಂದಿಗೆ ಸೋಂಕು ದೃಢ

ಬಳ್ಳಾರಿ: ಗಣಿನಾಡು ಬಳ್ಳಾರಿ ಜಿಲ್ಲೆಯಲ್ಲಿ ದಿನೇದಿನೆ ಕೋವಿಡ್‌ ಸೋಂಕಿತರ ಪ್ರಮಾಣ ಹೆಚ್ಚುತ್ತಿದ್ದು, ಶನಿವಾರ ಪುನಃ 50 ಮಂದಿಯಲ್ಲಿ ಕೋವಿಡ್‌ ಸೋಂಕು ದೃಢಪಟ್ಟಿದೆ.  ಈ ಮೂಲಕ ಜಿಲ್ಲೆಯಲ್ಲಿ ಸೋಂಕಿತರ ಸಂಖ್ಯೆ 1168ಕ್ಕೆ ಏರಿಕೆಯಾಗಿದೆ.

ಬಳ್ಳಾರಿ ತಾಲೂಕಿನಲ್ಲಿ ಅತಿಹೆಚ್ಚು 37 ಜನರಲ್ಲಿ ಸೋಂಕು ದೃಢಪಟ್ಟಿದೆ. ಇನ್ನುಳಿದ ಹೊಸಪೇಟೆಯಲ್ಲಿ 7, ಸಂಡೂರು 3, ಹಡಗಲಿ 1, ಕೂಡ್ಲಿಗಿ 1, ನೆರೆಯ ಕೊಪ್ಪಳ 1 ಸೇರಿ ಶನಿವಾರ ಒಂದೇ ದಿನ 50 ಜನರಲ್ಲಿ ಸೋಂಕು ಪತ್ತೆಯಾಗಿದ್ದು, ಜಿಲ್ಲೆಯ ಜನರನ್ನು ದಿನೇದಿನೆ ಆತಂಕಕ್ಕೀಡು ಮಾಡುತ್ತಿದೆ. ಈ ಪೈಕಿ 6 ಐಎಲ್‌ಐ ಪ್ರಕರಣಗಳಾಗಿವೆ. ಒಂದು ದುರ್ಬಲ ವರ್ಗ ಸಾರಿ ಪ್ರಕರಣವಾಗಿದೆ. ನಾಲ್ವರು ಸೋಂಕಿತರು ಪಿ-12212 ಸೋಂಕಿತರ ಸಂಪರ್ಕಿತರಾಗಿದ್ದಾರೆ. 7 ಸೋಂಕಿತರು ಪಿ.15534 ಸೋಂಕಿತರ ಸಂಪರ್ಕ ಹೊಂದಿದ್ದಾರೆ. ನಾಲ್ವರು ಸೋಂಕಿತರು ಪಿ-11304 ಸೋಂಕಿತರ ಸಂಪರ್ಕಿತರಾಗಿದ್ದಾರೆ. ಮೂವರಿಗೆ ಸೋಂಕು ಹೇಗೆ ಹರಡಿದೆ ಎಂಬುದನ್ನು ಪತ್ತೆ ಹಚ್ಚಲಾಗುತ್ತಿದೆ. ಇನ್ನುಳಿದವರಿಗೆ ವಿವಿಧ ಸೋಂಕಿತರ ಸಂಪರ್ಕದಿಂದ ಸೋಂಕು ಆವರಿಸಿದೆ ಎಂದು ಡಿಸಿ ಎಸ್‌.ಎಸ್‌. ನಕುಲ್‌ ಮಾಹಿತಿ ನೀಡಿದ್ದಾರೆ.

ಜಿಲ್ಲೆಯಲ್ಲಿ ಈ ವರೆಗೆ 1168 ಸೋಂಕು ಪತ್ತೆಯಾಗಿದ್ದು, 524 ಜನರು ಗುಣಮುಖರಾಗಿ ಮನೆಗೆ ಸೇರಿದ್ದಾರೆ. 34 ಜನರು ಮೃತಪಟ್ಟಿದ್ದು, 610 ಸಕ್ರಿಯ ಪ್ರಕರಣಗಳಾಗಿವೆ. 477 ಜನರ ವರದಿ ಬರಬೇಕಾಗಿದೆ ಎಂದು ಅವರು ಪ್ರಕಟಣೆಯಲ್ಲಿ ತಿಳಿಸಿದ್ದಾರೆ.