ಇನ್ನೂ ಆಗಿಲ್ಲ ಕಚೇರಿಗಳ ಸ್ಥಳಾಂತರ

ಬೆಳಗಾವಿ: ಹಲವು ದಶಕಗಳಿಂದ ನನೆಗುದಿಗೆ ಬಿದ್ದಿದ್ದ ಹೊಸ ತಾಲೂಕು ರಚನೆಗೆ ರಾಜ್ಯ ಸರ್ಕಾರ ಜೀವ ತುಂಬಿದ್ದು, ಬೆಳಗಾವಿ ಜಿಲ್ಲೆಯ ಒಟ್ಟು ಐದು ತಾಲೂಕುಗಳ ಪೈಕಿ ಮೂಡಲಗಿಗೂ ತಾಲೂಕು ಪಟ್ಟ ಸಿಕ್ಕಿದೆ. ಅನೇಕ ಹೋರಾಟಗಳ ಫಲವಾಗಿ ತಾಲೂಕಾದರೂ ಇನ್ನೂ ಬಹುತೇಕ ಕಚೇರಿಗಳು, ಅನುದಾನ ಇಲ್ಲದೇ ಮೂಡಲಗಿ ಸೊರಗಿದೆ.

ಗೋಕಾಕ ತಾಲೂಕಿನಿಂದ ಬೇರ್ಪಡಿಸಿ ಅಭಿವೃದ್ಧಿ ಮತ್ತು ಆಡಳಿತದ ದೃಷ್ಟಿಯಿಂದ ಹೆಚ್ಚುತ್ತಿರುವ ಜನಸಂಖ್ಯೆಗೆ ಅನುಗುಣವಾಗಿ ಮೂಡಲಗಿ ತಾಲೂಕು ಘೋಷಣೆ ಮಾಡಲಾಗಿದೆ. 2018, ಜ.22ರಂದು ಕರ್ನಾಟಕ ರಾಜ್ಯ ಪತ್ರದಲ್ಲಿ ಅಂತಿಮ ಪ್ರಾಥಮಿಕ ಅಧಿಸೂಚನೆ ಹೊರಡಿಸಲಾಗಿದೆ . 2018, ಜ. 30ರಂದು ತಾಲೂಕಾಗಿ ಉದ್ಘಾಟನೆ ಗೊಂಡಿದೆ.

ಒಂದೂವರೆ ವರ್ಷ ಕಳೆದರೂ ಇನ್ನೂ ಪೂರ್ಣ ಪ್ರಮಾಣದ ಮೂಲ ಸೌಲಭ್ಯಗಳು ಸಿಕ್ಕಿಲ್ಲ. ತಾಲೂಕಿನ ವಿಸ್ತೀರ್ಣ, ಜನಸಂಖ್ಯೆ, ಅಭಿವೃದ್ಧಿ ಮಟ್ಟ, ವಿವಿಧ ಇಲಾಖೆಗಳ ಪ್ರಗತಿ, ಸ್ಥಿತಿಗತಿ, ಕೃಷಿ ಕ್ಷೇತ್ರದ ಅಭಿವೃದ್ಧಿ ಉದ್ದೇಶ ಇಟ್ಟುಕೊಂಡು ತಾಲೂಕು ನಿರ್ಮಾಣ ಮಾಡಲಾಗಿದೆ. ಬರ ಹಾಗೂ ಪ್ರವಾಹದ ಹೊಡೆತದಿಂದ ಬಸವಳಿದಿರುವ ಮೂಡಲಗಿಗೆ ಆಡಳಿತಾತ್ಮಕವಾಗಿ ಜೀವ ತುಂಬ ಬೇಕಾಗಿದೆ. ತಹಶೀಲ್ದಾರ್‌ ಕಚೇರಿ, ಶಿಶು ಅಭಿವೃದ್ಧಿ ಯೋಜನಾಧಿಕಾರಿ, ಕ್ಷೇತ್ರ ಶಿಕ್ಷಣಾಧಿಕಾರಿ ಕಚೇರಿ ಬಿಟ್ಟರೆ ಇನ್ನುಳಿದ ಕಚೇರಿ ಸ್ಥಳಾಂತರ ಕಾರ್ಯಕ್ಕೆ ಗ್ರಹಣ ಹಿಡಿದಂತಾಗಿದೆ.

ದಾಖಲೆಗಳಿಗೆ ಅಲೆದಾಟ: ಕಂದಾಯ ಇಲಾಖೆ ದಾಖಲೆಗಳು ಗೋಕಾಕದಿಂದ ಬಹುತೇಕ ವರ್ಗಾವಣೆಗೊಂಡರೂ ಇನ್ನೂ ಹಳೆಯ ಕೆಲ ದಾಖಲೆಗಳು ಮೂಡಲಗಿ ವ್ಯಾಪ್ತಿಗೆ ಬರಬೇಕಾಗಿದೆ. ದಾಖಲೆಗಳಿಗಾಗಿ ಗೋಕಾಕಕ್ಕೆ ಅಲೆದಾಡುವುದು ತಪ್ಪಿಲ್ಲ. ನಮ್ಮ ತಾಲೂಕು ಮೂಡಲಗಿಯೋ ಅಥವಾ ಗೋಕಾಕೋ ಎಂದು ಜನ ಮಾತನಾಡಿಕೊಳ್ಳುವಂತಾಗಿದೆ.

ಹಿಂದುಳಿದ ವರ್ಗಗಳ ಕಲ್ಯಾಣ ಅಧಿಕಾರಿ, ತಾಲೂಕು
ಸಮಾಜ ಕಲ್ಯಾಣ ಅಧಿಕಾರಿ, ಅಬಕಾರಿ ನಿರೀಕ್ಷಕರ ಕಚೇರಿ, ಕೃಷಿ ನಿರ್ದೇಶಕರ ಕಚೇರಿ, ಸಹಕಾರಿ ಸಂಘಗಳ ಸಹಾಯಕ ನಿಬಂಧಕರ ಕಚೇರಿ, ಲೋಕೋಪಯೋಗಿ ಇಲಾಖೆ ಸೇರಿದಂತೆ ಇನ್ನೂ ಅನೇಕ ಕೆಲಸಗಳಿಗಾಗಿ ಗೋಕಾಕಕ್ಕೆ ಅಲೆದಾಡಬೇಕಾದ ಸ್ಥಿತಿ ಇದೆ. ಉಪ ನೋಂದಣಿ ಕಚೇರಿಯಾದರೆ ಬಹುತೇಕ ಈ ಭಾಗದ ಜನರ ಅರ್ಧದಷ್ಟು ಕೆಲಸ ಮೂಡಲಗಿಯಲ್ಲಿಯೇ ಆಗುತ್ತದೆ. ಈ ನಿಟ್ಟಿನಲ್ಲಿ ಶ್ರಮಿಸುತ್ತಿರುವ ಅರಭಾಂವಿ ಶಾಸಕ ಬಾಲಚಂದ್ರ ಜಾರಕಿಹೊಳಿ ಅವರು ಕಡತವನ್ನು ಹಣಕಾಸು ಕಾರ್ಯದರ್ಶಿಗಳಿಗೆ ನೀಡಿದ್ದಾರೆ.

ಅಲ್ಲಿಂದ ಅನುಮೋದನೆ ಪಡೆದುಕೊಂಡರೆ ಕೇವಲ
15-20 ದಿನಗಳ ಅವಧಿಯಲ್ಲಿಯೇ ಈ ಕಚೇರಿ ಮೂಡಲಗಿಗೆ ಬರುವುದು ಖಚಿತ. ಮಿನಿ ವಿಧಾನಸೌಧ ನಿರ್ಮಾಣವಾದರೆ ಬಹುತೇಕ ಎಲ್ಲ ಕಚೇರಿಗಳು ಇಲ್ಲಿ ವರ್ಗಾವಣೆ ಆಗುತ್ತವೆ. ಈಗಾಗಲೇ ಯಾವುದೇ ಸ್ವಂತ ಜಾಗ ಇಲ್ಲದೇ ಬೆರಳೆಣಿಕೆಯಷ್ಟು ಕಚೇರಿಗಳು ಮಾತ್ರ ಕಾರ್ಯ ನಿರ್ವಹಿಸುತ್ತಿವೆ. ತಹಶೀಲ್ದಾರ್‌ ಕಚೇರಿಯಲ್ಲೂ ಸಿಬ್ಬಂದಿ ಕೊರತೆ ಇದೆ. ರೇಷನ್‌ ಕಾರ್ಡ್‌ಗಳನ್ನು ತಯಾರಿಸಿ ಕೊಡಲಾಗುತ್ತಿದೆ. ಒಟ್ಟು 18 ಗ್ರಾಪಂಗಳು ಈ ತಾಲೂಕಿನಲ್ಲಿವೆ. ಅರಭಾವಿ ಹಾಗೂ ಕೌಜಲಗಿ ಎರಡು ಹೋಬಳಿಗಳಿವೆ.