ಬಸ್ರೂರು: ಕುಸಿದ ಮೋರಿಯಿಂದ ಸಂಚಾರ ದುಸ್ತರ

ಬಸ್ರೂರು: ಬಸ್ರೂರು ಕೆಳಪೇಟೆಯಿಂದ ಮಾರ್ಗೋಳಿಗೆ ಹೋಗುವ ಸುಮಾರು 600 ಮೀ.ಉದ್ದದ ರಸ್ತೆ ಮಧ್ಯೆ ದೇವಸ್ಥಾನದ ಸಮೀಪ ನಿರ್ಮಿಸಲಾಗಿದ್ದ ಮೋರಿಯೊಂದು ಕುಸಿದಿದೆ. ಇದರಿಂದ ಈ ಮಾರ್ಗದಲ್ಲಿ ಸಂಚಾರ ದುಸ್ತರ ಗೊಂಡಿದೆ.

ಕುಸಿದ ಸ್ಥಳದಲ್ಲಿ ಗ್ರಾ.ಪಂ.ನವರು ಒಂದು ಗಿಡ ನೆಟ್ಟು ಎಚ್ಚರಿಕೆಯಿಂದ ಸಂಚರಿಸುವಂತೆ ಸೂಚನೆ ನೀಡಿದ್ದಾರೆ.

ಲಘು ಮತ್ತು ಘನ ವಾಹನಗಳು ಈ ಮಾರ್ಗದಲ್ಲಿ ಸಂಚರಿಸಲು ಸಾಧ್ಯವಿಲ್ಲ ಎಂಬಂತಾಗಿದೆ. ಸಂಬಂಧಪಟ್ಟವರು ಶೀಘ್ರ ಈ ಮೋರಿಯ ದುರಸ್ತಿ ಕಾರ್ಯ ಮಾಡಬೇಕೆಂದು ಸ್ಥಳೀಯರು ಆಗ್ರಹಪಡಿಸಿದ್ದಾರೆ.

ಸಂಚಾರ ಸಂಕಷ್ಟ
ಪ್ರತಿನಿತ್ಯ ಬಸ್ರೂರು ಕೆಳಪೇಟೆ ಯಿಂದ ಈ ರಸ್ತೆಯ ಮೂಲಕ ಕುಂದಾಪುರದ ಅಂಗಡಿಗೆ ಕಾರಿನಲ್ಲಿ ಹೋಗಬೇಕಾಗಿದೆ. ಈಗ ಮೋರಿ ಕುಸಿದಿದ್ದು ಈ ಮಾರ್ಗದಲ್ಲಿ ಈಗ ದ್ವಿಚಕ್ರ ವಾಹನ ಮಾತ್ರ ಸಂಚರಿಸುವಂತಾಗಿದೆ. ಸಂಬಂಧಪಟ್ಟವರು ಶೀಘ್ರ ಈ ಬಗ್ಗೆ ಗಮನಹರಿಸಿ, ಪರಿಹರಿಸಬೇಕು.
-ನಿತ್ಯ ಪ್ರಯಾಣಿಕ

ಮೋರಿ ದುರಸ್ತಿಗೆ ಸೂಚನೆ
ಪ್ರಸ್ತುತ ನಿರ್ಮಾಣವಾಗುತ್ತಿರುವ ಹಟ್ಟಿಕುದ್ರು ಸೇತುವೆ ಕಾಮಗಾರಿಗೆ ಸರಕುಗಳನ್ನು ಹೊತ್ತು ತರುತ್ತಿರುವ ಬೃಹತ್‌ ವಾಹನ ಈ ರಸ್ತೆಯಲ್ಲಿ ಚಲಿಸುತ್ತಿರುವಾಗ ಈ ರಸ್ತೆಯ ಕಿರಿದಾದ ಮೋರಿಯು ಕುಸಿದಿದೆ. ಮೋರಿ ಕುಸಿದ ವಿಷಯವನ್ನು ಸಂಬಂಧಪಟ್ಟವರಿಗೆ ತಿಳಿಸಿದ್ದು ಅವರೇ ಸರಿಪಡಿಸುವಂತೆ ಸೂಚಿಸಲಾಗಿದೆ.
-ನಾಗೇಂದ್ರ ಜೆ. ಬಸ್ರೂರು ಪಿಡಿಒ