ಬ್ಯಾಂಕ್‌ ಕ್ಯಾಶ್‌ಕೌಂಟರ್‌ನಲ್ಲಿ ಬೆಂಕಿ ಆಕಸ್ಮಿಕ 

ಮಂಗಳೂರು: ನಗರದ ಎಂ.ಜಿ .ರಸ್ತೆಯಲ್ಲಿರುವ  ಕಾರ್ಪೊರೇಶನ್‌ ಬ್ಯಾಂಕ್‌  ಶಾಖೆಯಲ್ಲಿ  ಶುಕ್ರವಾರ ಸಂಜೆ ಬೆಂಕಿ ಕಾಣಿಸಿಕೊಂಡು ಆತಂಕದ ವಾತಾವರಣ ನಿರ್ಮಾಣಗೊಂಡಿತು. ಘಟನೆಯಲ್ಲಿ  ಕ್ಯಾಶ್‌ ಕೌಂಟರ್‌ನಲ್ಲಿ  ನೋಟು ಲೆಕ್ಕಮಾಡುವ ಯಂತ್ರ  ಹಾಗೂ ಫ್ಯಾನ್‌ ಸುಟ್ಟು ಹೋಗಿದ್ದು   ಅಗ್ನಿ ಶಾಮಕದಳ ಸಿಬಂದಿ ತತ್‌ಕ್ಷಣ ಸ್ಥಳಕ್ಕೆ ಆಗಮಿಸಿ ನಡೆಸಿದ ಕಾರ್ಯಾಚರಣೆಯಿಂದ ಹೆಚ್ಚಿನ ಅನಾಹುತ ತಪ್ಪಿದೆ. 

ಶುಕ್ರವಾರ ಬ್ಯಾಂಕ್‌ಗೆ ರಜೆ ಇದ್ದರೂ ಆಡಿಟ್‌ ನಡೆಯುತ್ತಿರುವ ಹಿನ್ನೆಲೆಯಲ್ಲಿ  ಶಾಖಾ ಪ್ರಬಂಧಕರು ಹಾಗೂ ಆಡಿಟ್‌ ಮಾಡುವವರು ಬ್ಯಾಂಕ್‌ನಲ್ಲಿದ್ದರು. ಸಂಜೆ ಸುಮಾರು 5.15ರ ವೇಳೆಗೆ ಕ್ಯಾಶ್‌ ಕೌಂಟರ್‌ನಲ್ಲಿ  ಬೆಂಕಿ ಕಾಣಿಸಿಕೊಂಡಿದ್ದು  ಇದನ್ನು ಗಮನಿಸಿದ ಶಾಖಾ ಪ್ರಬಂಧಕರು  ಕೂಡಲೇ  ಪಾಂಡೇಶ್ವರ ಅಗ್ನಿ ಶಾಮಕದಳಕ್ಕೆ ಕರೆ ಮಾಡಿ ಮಾಹಿತಿ ನೀಡಿದರು. ಇದಲ್ಲದೆ ಕದ್ರಿ ಪೊಲೀಸ್‌ ಠಾಣೆಯ ಪೊಲೀಸರಿಗೆ ಮಾಹಿತಿ ನೀಡಲಾಯಿತು.  ಸ್ಥಳಕ್ಕೆ ಧಾವಿಸಿದ ಅಗ್ನಿಶಾಮಕ ದಳದ ಸಿಬಂದಿ ಕಾರ್ಯಾಚರಣೆ ನಡೆಸಿ ಬೆಂಕಿಯನ್ನು  ನಂದಿಸಿ ಹೆಚ್ಚಿನ ಅನಾಹುತವಾಗುವುದನ್ನು  ತಪ್ಪಿಸಿದರು. 

ರಜೆಯ ದಿನವಾದ ಕಾರಣ ಕ್ಯಾಶ್‌ಕೌಂಟರ್‌ ಮುಚ್ಚಿದ್ದು ನಗದು ಇರಲಿಲ್ಲ. ಶಾರ್ಟ್‌ ಸರ್ಕ್ನೂಟ್‌ ಉಂಟಾಗಿ  ನೋಟು ಎಣಿಸುವ ಯಂತ್ರಕ್ಕೆ  ಬೆಂಕಿ ಹತ್ತಿಕೊಂಡು ಬಳಿಕ ಮೇಲ್ಗಡೆ ಇದ್ದ  ಫ್ಯಾನ್‌ಗೆ ಹರಡಿದೆ. ಎಸಿಪಿ ಹಾಗೂ ಕದ್ರಿ ಪೊಲೀಸರು  ಕಾರ್ಯಾಚರಣೆ ಸಂದರ್ಭದಲ್ಲಿ  ಉಪಸ್ಥಿತರಿದ್ದರು.