ಬ್ಯಾಟ್‌ನೊಂದಿಗೆ ವೆಡ್ಡಿಂಗ್‌ ಫೋಟೋ ಶೂಟ್‌: ಬಾಂಗ್ಲಾ ಆಟಗಾರ್ತಿ ಸಂಜಿದಾ ವಿಶಿಷ್ಟ ಹೆಜ್ಜೆ

ಢಾಕಾ: ವಿಭಿನ್ನ ರೀತಿಯಲ್ಲಿ “ವೆಡ್ಡಿಂಗ್‌ ಫೋಟೋ ಶೂಟ್‌’ ನಡೆಸುವುದು ಈಗಿನ ಟ್ರೆಂಡ್‌. ಈ ನಿಟ್ಟಿನಲ್ಲಿ ಬಾಂಗ್ಲಾದೇಶ ರಾಷ್ಟ್ರೀಯ ಕ್ರಿಕೆಟ್‌ ತಂಡದ ಆಟಗಾರ್ತಿ ಸಂಜಿದಾ ಇಸ್ಲಾಮ್‌ ವಿಶಿಷ್ಟ ಹೆಜ್ಜೆ ಇರಿಸಿದ್ದಾರೆ. ಮದುವೆಯ ಸಾಂಪ್ರದಾಯಕ ಉಡುಗೆಯಲ್ಲೇ ಅಂಗಳಕ್ಕಿಳಿದು, ಬ್ಯಾಟಿಂಗ್‌ ಮಾಡುವ ಶೈಲಿಯಲ್ಲಿ ಫೋಟೋ ತೆಗೆಸಿಕೊಂಡು ಸಾಮಾಜಿಕ ಜಾಲತಾಣಗಳಲ್ಲಿ ಹರಿಯಬಿಟ್ಟಿದ್ದಾರೆ. ಇದೀಗ ವೈರಲ್‌ ಆಗಿದೆ.

24 ವರ್ಷದ ಮಧ್ಯಮ ಕ್ರಮಾಂಕದ ಆಟಗಾರ್ತಿ ಸಂಜಿದಾ ಅವರ ವಿವಾಹ ಪ್ರಥಮ ದರ್ಜೆ ಕ್ರಿಕೆಟಿಗ ಮಿಮ್‌ ಮೊಸೆದ್ದೆಕ್‌ ಅವರೊಂದಿಗೆ ಇತ್ತೀಚೆಗೆ ನಡೆದಿತ್ತು. ಈ ಸಮಾರಂಭವನ್ನು ಸ್ಮರಣೀಯಗೊಳಿಸುವುದು ಅವರ ಉದ್ದೇಶವಾಗಿತ್ತು. ಹೀಗಾಗಿ ಮದುವಣಗಿತ್ತಿಯ ಉಡುಗೆಯಲ್ಲೇ ಅಂಗಳಕ್ಕಿಳಿದ ಸಂಜಿದಾ ಬ್ಯಾಟಿಂಗ್‌ ಶೈಲಿಯಲ್ಲಿ ಫೋಟೋ ಶೂಟ್‌ ಮಾಡಿಸಿಕೊಂಡರು.

ಈ ಚಿತ್ರ ಐಸಿಸಿಯ ವೆಬ್‌ಸೈಟ್‌ನಲ್ಲೂ ಹರಿದಾಡಿದೆ. “ಡ್ರೆಸ್‌, ಜ್ಯುವೆಲ್ಲರಿ, ಕ್ರಿಕೆಟರ್‌ ಬ್ಯಾಟ್‌’ ಎಂದು ಐಸಿಸಿ ಈ ಚಿತ್ರಕ್ಕೆ ಅಡಿಬರಹ ನೀಡಿದೆ!

ಸಂಜಿದಾ ಇಸ್ಲಾಮ್‌ ಬಾಂಗ್ಲಾ ಪರ 16 ಏಕದಿನ, 54 ಟಿ20 ಪಂದ್ಯ ಗಳನ್ನಾಡಿದ್ದಾರೆ.