ಸಾಲು ಸಾಲು ಹಬ್ಬಗಳಿಂದಾಗಿ ಶತಕದ ಗಡಿ ದಾಟಿದ ಬಾಳೆಹಣ್ಣಿನ ಬೆಲೆ

ಬೆಂಗಳೂರು: ಶ್ರಾವಣ ಮಾಸ ಬಂತೆಂದರೆ ಹಣ್ಣುಗಳ ಬೆಲೆ ಏರುವುದು ಮಾಮೂಲಿ. ಅದರಲ್ಲೂ ಈ ಮಾಸದಲ್ಲಿ ನಡೆಯುವ ವ್ರತಾಚರಣೆ, ಪೂಜೆಗಳಿಗೆ ಅಗತ್ಯವಿರುವ ಬಾಳೆ ಹಣ್ಣಿನ ದರ ಗಗನಮುಖೀಯಾಗುತ್ತದೆ. ಆದರೆ ಈ ಬಾರಿ ಮಾರುಕಟ್ಟೆಗೆ ಏಲಕ್ಕಿ ಬಾಳೆ ಹಣ್ಣಿನ ಸರಬರಾಜು ಅಸಮರ್ಪಕವಾಗಿದೆ. ಇದರೊಂದಿಗೆ ಶ್ರೀಕೃಷ್ಣ ಜನ್ಮಾಷ್ಟಮಿ, ಗಣೇಶ ಚತುರ್ತಿ, ದಸರಾ ಸೇರಿ ವಿವಿಧ ಹಬ್ಬಗಳು ಸಾಲುಸಾಲಾಗಿ ಬಂದಿರುವ ಹಿನ್ನೆಲೆಯಲ್ಲಿ ಏಲಕ್ಕಿ ಬಾಳೆಹಣ್ಣಿನ ಬೆಲೆ ನೂರರ ಗಡಿ ದಾಟಿದೆ.

ಕಳೆದ ಎರಡು ವಾರಗಳ ಹಿಂದೆ ಕೆಜಿ ಬಾಳೆಹಣ್ಣಿಗೆ ಕೇವಲ 60ರಿಂದ 70 ರೂ.ಗಳವರೆಗೆ ಇದ್ದ ಏಲಕ್ಕಿ ಬಾಳೆ ದರ ಇದ್ದಕ್ಕಿದ್ದಂತೆ 115ಕ್ಕೆ ಏರಿದೆ. ಶ್ರಾವಣ ಆರಂಭಗೊಂಡು ವರಮಹಾಲಕ್ಷ್ಮೀ ಹಬ್ಬದಿಂದಲೇ ಬೆಲೆಯಲ್ಲಿ ಏರಿಕೆ ಕಂಡು ಬಂದಿತ್ತು. ಇದೀಗ ಇದು ನೂರರ ಗಡಿ ದಾಟಿದ್ದು, ಮುಂದಿನ ದಿನಗಳಲ್ಲಿ ಪೂರೈಕೆ ಕೊರತೆ ಕಂಡುಬಂದಲ್ಲಿ ಮತ್ತಷ್ಟು ಬೆಲೆ ಹೆಚ್ಚಳವಾಗುವ ಸಾಧ್ಯತೆ ಇದೆ ಎಂಬುದು ಬಾಳೆ ಮಂಡಿ ಮಾಲೀಕರ ಲೆಕ್ಕಾಚಾರ.

ಮಳೆ ಕೊರತೆ ಒಂದೆಡೆಯಾದರೆ, ಈ ಮಾಸದಲ್ಲಿ ಪೂಜೆಗೆ ಅಗತ್ಯ ಹಣ್ಣುಗಳ ಕೊರತೆ ಕಂಡು ಬರುತ್ತದೆ. ಇದು ಕೂಡ ವರ್ಷ ಪೂರ್ತಿ ಬೆಳೆಯಾಗಿರುವ ಬಾಳೆಗೆ ಬೇಡಿಕೆ ಬರಲು ಕಾರಣ. ಸೇಬು, ಮೂಸಂಬಿ ಸೇರಿದಂತೆ ವಿವಿಧ ಹಣ್ಣುಗಳ ಬೆಲೆಯಲ್ಲೂ ಏರಿಕೆಯಾಗಿದೆ.

ಸರಬರಾಜು ಕೊರತೆ
ಬೆಂಗಳೂರು ನಗರಕ್ಕೆ ಪ್ರತಿದಿನ ಸುಮಾರು 1500 ಟನ್‌ ಬಾಳೆಹಣ್ಣಿನ ಅವಶ್ಯಕತೆ ಇದೆ. ಆದರೆ, ಪ್ರಸ್ತುತ ಕೇವಲ 300ರಿಂದ 400 ಟನ್‌ ಮಾತ್ರ ಸರಬರಾಜಾಗುತ್ತಿದೆ. ಆಂಧ್ರಪ್ರದೇಶ, ಕರ್ನಾಟಕ, ಕೇರಳ ರಾಜ್ಯಗಳಿಗೆ ಹೆಚ್ಚಾಗಿ ಬಾಳೆ ಹಣ್ಣನ್ನು ರಫ್ತು ಮಾಡುವ ತಮಿಳುನಾಡಿನಲ್ಲಿ ಮಳೆ ಕೊರತೆಯಿಂದ ಬಾಳೆ ಬೆಳೆ ನೆಲಕ್ಕಚ್ಚಿದ್ದು, ಕೊರತೆಗೆ ಕಾರಣ. ರಾಜ್ಯದ ಶಿವಮೊಗ್ಗ, ಶಿಕಾರಿಪುರ, ಕೊಳ್ಳೇಗಾಲ, ಕನಕಪುರ, ಚಾಮರಾಜನಗರ, ಹೊಸಪೇಟೆ ಸೇರಿ ಹಲವೆಡೆಯಿಂದ ಬೆಂಗಳೂರು ಮಾರುಕಟ್ಟೆಗೆ ಬಾಳೆ ಸರಬರಾಜಾಗುತ್ತದೆ. ಇಲ್ಲಿಯೂ ಮಳೆ ಕೊರತೆ ಬಾಧಿಸಿದ್ದು, ಸಮರ್ಪಕವಾಗಿ ಬಾಳೆ ಬೆಳೆದಿಲ್ಲ ಎನ್ನುತ್ತಾರೆ ಶ್ರೀಸರಸ್ವತಿ ಬನಾನಾ ಮರ್ಜೆಂಟ್‌ ಮಾಲೀಕ ಎಸ್‌.ಚಕ್ರಪಾಣಿ. 

ಪ್ರಸ್ತು ಮಾರುಕಟ್ಟೆಯಲ್ಲಿ ಬಾಳೆಹಣ್ಣಿನ ದರ
ಬಾಳೆ ತಳಿ    ಹೋಲ್‌ಸೇಲ್‌    ರೀಟೆಲ್‌    ಹಾಪ್‌ಕಾಮ್ಸ್‌
ಏಲಕ್ಕಿ ಬೆಳೆ    90    120    105 
ಚಂದ್ರಬಾಳೆ    60    80    78 
ಪಚ್ಚಬಾಳೆ    25    37    33
ನೇಂದ್ರ ಬಾಳೆ    60    80    78