ಪ್ಲಾಸ್ಟಿಕ್‌ ಬಳಕೆಗೆ ನಿಷೇಧ

ಅಡಹಳ್ಳಿ: ಗ್ರಾಮದಲ್ಲಿರುವ ಅಂಗಡಿ-ಮುಂಗಟ್ಟುಗಳ ಮಾಲೀಕರು, ಸಗಟು ವ್ಯಾಪಾರಸ್ಥರು, ಹೋಟೆಲ್‌ ಸೇರಿದಂತೆ ಸಣ್ಣ ಹಾಗೂ ಗೃಹ ಕೈಗಾರಿಕೆ ಮಾಲೀಕರು ಪ್ಲಾಸ್ಟಿಕ್‌ ಬಳಕೆ ಮಾಡಬಾರದು ಎಂದು ಅಡಹಳ್ಳಿ ಗ್ರಾಪಂ ಅಭಿವೃದ್ಧಿ ಅಧಿಕಾರಿ ಎಸ್‌.ಎಸ್‌. ಪೋತದಾರ ಹೇಳಿದರು.

ಗ್ರಾಮದಲ್ಲಿ ಜರುಗಿದ ಪ್ಲಾಸ್ಟಿಕ್‌, ಕ್ಯಾರಿ ಬ್ಯಾಗಗಳು ಹಾಗೂ ದೈನಂದಿನ ಬಳಕೆಯಲ್ಲಿರುವ ಪ್ಲಾಸ್ಟಿಕ್‌ ವಸ್ತುಗಳ ನಿಷೇಧದ ತಿಳಿವಳಿಕೆ ನೀಡಿ ನಂತರ ಅವರು ಮಾತನಾಡಿ, ಪ್ಲಾಸ್ಟಿಕ್‌ ಬಳಕೆಯಿಂದ ಪರಿಸರ ಹಾನಿಯಾಗಿತ್ತಿದ್ದು, ಸರಕಾರದ ಆದೇಶದಂತೆ ಅಕ್ಟೋಬರ್‌ 2ರಿಂದ ಕಟ್ಟುನಿಟ್ಟಾಗಿ ಪ್ಲಾಸ್ಟಿಕ್‌ ನಿಷೇಧಕ್ಕೆ ಆದೇಶಿಸಿರುವ ಹಿನ್ನಲೆಯಲ್ಲಿ ಅಡಹಳ್ಳಿ ಗ್ರಾಪಂ ವ್ಯಾಪ್ತಿಯಲ್ಲಿ ಯಾರು ಪ್ಲಾಸ್ಟಿಕ್‌ ವಸ್ತುಗಳನ್ನು ಬಳಸಬಾರದು. ಒಂದು ವೇಳೆ ಬಳಸಿದ್ದು ಕಂಡು ಬಂದರೆ ಅಂಥವರ ವಿರುದ್ಧ ದಂಡ ವಿಧಿಸಿ ಕ್ರಮ ಕೈಗೊಳ್ಳಲಾಗುವುದು ಎಂದರು. ನಂತರ ಪ್ಲಾಸ್ಟಿಕ್‌ ಬಳಕೆ ಮಾಡುತ್ತಿದ್ದ ಅಂಗಡಿ ಮಾಲೀಕರಿಗೆ ಗ್ರಾಪಂ ಆಧಿಕಾರಿಗಳು ನೋಟಿಸ್‌ ನೀಡಿದರು. ಈ ವೇಳೆ ಗ್ರಾಪಂ ಸಿಬ್ಬಂದಿ ಡಿ.ಕೆ. ಸೂರ್ಯವಂಶಿ, ಜಗದೀಶ ಸೂರ್ಯವಂಶಿ, ಮಹಾದೇವ ತಾಂವಶಿ, ಮುನ್ನೀರ್‌ ಮುಲ್ಲಾ ಇದ್ದರು.