‘ಬಾಳ ಠಾಕ್ರೆ’ಸಿನಿಮಾ ನಿರ್ಮಾಪಕಿ ಸ್ವಪ್ನಾ ಪಾಟಕರ್ ಬಂಧನ

ಮುಂಬಯಿ: ನಕಲಿ ಪಿಎಚ್ ಡಿ ಪ್ರಮಾಣ ಪತ್ರ ಬಳಸಿಕೊಂಡು ಆಸ್ಪತ್ರೆಯಲ್ಲಿ ಉದ್ಯೊಗ ಪಡೆದ ಆರೋಪದಡಿ ಮರಾಠಿ ಚಿತ್ರರಂಗದ ಸಿನಿಮಾ ನಿರ್ಮಾಪಕಿ ಸ್ವಪ್ನಾ ಪಾಟಕರ್‌ ಅವರನ್ನು ಮುಂಬೈ ಪೊಲೀಸರು ಮಂಗಳವಾರ ( ಜೂನ್.08) ಬಂಧಿಸಿದ್ದಾರೆ.

39 ವರ್ಷದ ಸ್ವಪ್ನಾ ಪಾಟಕರ್‌ ಕ್ಲಿನಿಕಲ್‌ ಫಿಸಿಯೋಲಜಿಯಲ್ಲಿ ಪಿಎಚ್‌ಡಿ ಮಾಡಿರುವುದಾಗಿ ದಾಖಲೆಗಳನ್ನು ತೋರಿಸಿ ಆಸ್ಪತ್ರೆಯಲ್ಲಿ ಕೆಲಸ ಪಡೆದುಕೊಂಡಿದ್ದಾರೆ. ಈಕೆಯ ವಿರುದ್ಧ ಮುಂಬೈನ ಬಾಂದ್ರಾ ಪೊಲೀಸ್‌ ಠಾಣೆಯಲ್ಲಿ ಮೇ 26ರಂದು ನಕಲಿ ಪಿಎಚ್‌ಡಿ ಹೊಂದಿರುವ ಕುರಿತು ದೂರು ದಾಖಲಾಗಿದೆ.

ವಂಚನೆ, ನಕಲು ಮತ್ತು ಮೋಸ ಮಾಡುವುದಕ್ಕಾಗಿ ನಕಲು ಮಾಡಿದ ಆರೋಪಗಳು ಸ್ವಪ್ನಾ ಅವರ ಮೇಲಿವೆ. ಐಪಿಸಿ ಕಾಯ್ದೆ 419, 420, 467 ಮತ್ತು 468 ಅಡಿಯಲ್ಲಿ ಎಫ್‌ಐಆರ್‌ ದಾಖಲಿಸಲಾಗಿದೆ ಎಂದು ಪೊಲೀಸ್‌ ಅಧಿಕಾರಿಗಳು ತಿಳಿಸಿದ್ದಾರೆ.

ಇನ್ನು ಶಿವಸೇನೆ ಸ್ಥಾಪಕ ಬಾಳ್‌ ಠಾಕ್ರೆ ಅವರ ಜೀವನಚಿತ್ರ ಮರಾಠಿಯ ‘ಬಾಳ್‌ ಕಡು’ ಚಿತ್ರವನ್ನು ಸ್ವಪ್ನಾ ನಿರ್ಮಿಸಿದ್ದಾರೆ. ಇದು  2015ರಲ್ಲಿ ಬಿಡುಗಡೆಯಾಗಿತ್ತು.