ರೆಗ್ಯುಲರ್‌ ಪ್ಯಾಟರ್ನ್ ಬಿಟ್ಟು ಮಾಡಿದ ಸಿನಿಮಾವಾಗಲೀ, ಹಾಡಾಗಲೀ ಬೇಗನೇ ಜನರ ಗಮನ ಸೆಳೆಯುತ್ತದೆ ಮತ್ತು ಇಷ್ಟವಾಗುತ್ತದೆ. ಅದಕ್ಕೆ ಕಾರಣ ಜನರಿಗೆ ಒಂದೇ ಶೈಲಿ ಕೇಳಿ ಬೇಸರ ಬಂದಿರೋದು. ಈಗ ಈ ವಿಚಾರ ಯಾಕೆ ಎಂದು ನೀವು ಕೇಳಬಹುದು.
ಅದಕ್ಕೆ ಕಾರಣ “ತೋತಾಪುರಿ’ ಚಿತ್ರದ ಹಾಡು. ಕೆಲ ದಿನಗಳ ಹಿಂದಷ್ಟೇ ಜಗ್ಗೇಶ್‌ ನಟನೆಯ “ತೋತಾಪುರಿ’ ಚಿತ್ರದ ಹಾಡಿನ ಟೀಸರ್‌ ಬಿಡುಗಡೆಯಾಗಿ ಕುತೂಹಲ ಹುಟ್ಟಿಸಿತ್ತು. ಈಗ ಆ ವಿಡಿಯೋ ಸಾಂಗ್‌ ಬಿಡುಗಡೆಯಾಗಿದ್ದು, ಮೆಚ್ಚುಗೆ ವ್ಯಕ್ತವಾಗುತ್ತಿದೆ.
ರೆಗ್ಯುಲರ್‌ ಶೈಲಿ ಬಿಟ್ಟಿರುವ ಈ ಹಾಡು ಹಾಗೂ ಅದನ್ನು ಫ‌ನ್ನಿಯಾಗಿ ಚಿತ್ರೀಕರಿಸಿದ ರೀತಿ ಇಷ್ಟವಾಗುತ್ತದೆ. ಅದಿತಿ- ಜಗ್ಗೇಶ್‌ ಈ ಹಾಡಿನಲ್ಲಿ ಸಖತ್‌ ಕಲರ್ಫುಲ್ ಆಗಿ ಕಾಣಿಸಿಕೊಂಡಿದ್ದು, ಜಗ್ಗೇಶ್‌ ಅವರ ಮ್ಯಾನರಿಸಂ ಹಾಡಿನ ಫ‌ನ್‌ ಹೆಚ್ಚಿಸುವಂತಿದೆ. “ಬಾಗ್ಲು ತೆಗಿ ಮೇರಿ ಜಾನ್‌…’ ಎಂದು ಆರಂಭವಾಗುವ ಹಾಡು ಕೌಂಟರ್‌-ಪ್ರತಿ ಕೌಂಟರ್‌ನೊಂದಿಗೆ ಸಾಗುತ್ತದೆ.
ಇದನ್ನೂ ಓದಿ:ಯೂಟ್ಯೂಬ್‌ ವಿಡಿಯೋದಲ್ಲಿ ಬಂಟ್ವಾಳದ ಯುವತಿ ಫೋಟೋ ದುರ್ಬಳಕೆ: ಸಾಫ್ಟ್ವೇರ್‌ ದಂಪತಿ ಬಂಧನ
ಸಂಗೀತ ನಿರ್ದೇಶಕ ಅನೂಪ್‌ ಸೀಳೀನ್‌ ವಿಜಯ್‌ ಪ್ರಸಾದ್‌ ಅವರ ಸಾಹಿತ್ಯಕ್ಕೆ ಪೂರಕವಾದ ಸಂಗೀತ ನೀಡಿದ್ದಾರೆ. ಮೋಹನ್‌ ಬಿ ಕೆರೆ ಸ್ಟುಡಿಯೋದಲ್ಲಿನ ಕಲರ್ಫುಲ್ ಸೆಟ್‌ನಲ್ಲಿ ಈ ಹಾಡನ್ನು ಚಿತ್ರೀಕರಿಸಲಾಗಿದೆ. ಜಗ್ಗೇಶ್‌, ಅದಿತಿ, ವೀಣಾ ಸುಂದರ್‌ ಹಾಗೂ ಹೇಮಾದತ್‌ ಜೊತೆ ನೂರಾರು ಡ್ಯಾನ್ಸರ್ ಹೆಜ್ಜೆ ಹಾಕಿದ್ದಾರೆ. ವ್ಯಾಸರಾಜ್‌ ಸೋಸಲೆ, ಅನನ್ಯ ಭಟ್‌ ಹಾಗೂ ಸುಪ್ರಿಯಾ ರಾಮ್‌ ಈ ಹಾಡಿಗೆ ದನಿಗೂಡಿಸಿದ್ದಾರೆ.
ಗೋವಿಂದಾಯ ನಮಃ, ಶಿವಲಿಂಗ, ಶ್ರಾವಣಿ ಸುಬ್ರಹ್ಮಣ್ಯ ಮೊದಲಾದ ಹಿಟ್‌ ಸಿನಿಮಾಗಳನ್ನು ನಿರ್ಮಿಸಿರುವ ಕೆ.ಎ.ಸುರೇಶ್‌ ‘ತೋತಾಪುರಿ’ ಭಾಗ 1 ಹಾಗೂ ಭಾಗ 2 ಸಿನಿಮಾವನ್ನು ನಿರ್ಮಿಸಿದ್ದಾರೆ. ಮೋನಿಫಿಕ್ಸ್‌ ಸ್ಟುಡಿಯೋಸ್‌ ಹಾಗೂ ಸುರೇಶ್‌ ಆರ್ಟ್ಸ್ ಬ್ಯಾನರ್‌ನಲ್ಲಿ”ತೋತಾಪುರಿ’ ನಿರ್ಮಾಣವಾಗಿದೆ.
