ಅನೀಶ್‌ ತೇಜೇಶ್ವರ್‌ ಹಾಗೂ ನಿರ್ದೇಶಕ ಅಭಿಷೇಕ್‌ ಶೆಟ್ಟಿ ಕಾಂಬಿನೇಶನ್‌ನಲ್ಲಿ ಮೂಡಿ ಬರುತ್ತಿರುವ ಆರಾಮ್‌ ಅರವಿಂದ್‌ ಸ್ವಾಮಿ ಚಿತ್ರದ ಕ್ಯಾರೆಕ್ಟರ್‌ ಇಂಟ್ರೊಡಕ್ಷನ್‌ ಕೆಲಸ ಭರದಿಂದ ಸಾಗುತ್ತಿದೆ.
ನಾಗಾರ್ಜುನ್‌ ಶರ್ಮಾ ಸಾಹಿತ್ಯ ಬರೆದು, ಅರ್ಜುನ್‌ ಜನ್ಯ ಟ್ಯೂನ್‌ ಹಾಕಿರುವ ಈ ಹಾಡಿನಲ್ಲಿ ಅನೀಶ್‌ ಕುಣಿಸಲು ತಮಿಳಿನ ಖ್ಯಾತ ಕೊರಿಯೋಗ್ರಾಫರ್‌ ಬಾಬಾ ಭಾಸ್ಕರ್‌ ಎಂಟ್ರಿ ಕೊಟ್ಟಿದ್ದಾರೆ. ಸಖತ್‌ ಸ್ಟೈಲಿಶ್‌ ಆಗಿ ತಯಾರಾಗುತ್ತಿರುವ ಹಾಡಿಗೆ ಬಾಬಾ ಭಾಸ್ಕರ್‌ ಕೊರಿಯೋಗ್ರಫಿ ಮಾಡುತಿದ್ದಾರೆ.
ಈ ಹಿಂದೆ ಅನೀಶ್‌ ನಟನೆಯ ವಾಸು ನನ್‌ ಪಕ್ಕ ಕಮರ್ಸಿಯಲ್‌ ಸಿನಿಮಾದ ಹೀರೋ ಹಾಡಿಗೂ ಸಂಯೋಜನೆ ಮಾಡಿದ್ದ ಭಾಸ್ಕರ್‌ ಮತ್ತೂಮ್ಮೆ ಅನೀಶ್‌ ಸಿನಿಮಾಗೆ ಕೊರಿಯೋಗ್ರಫಿ ಮಾಡುತ್ತಿದ್ದಾರೆ. ರೋಮ್ಯಾಂಟಿಕ್‌ ಕಾಮಿಡಿ ಸಬ್ಜೆಕ್ಟ್ ಒಳಗೊಂಡ “ಆರಾಮ್‌ ಅರವಿಂದ್‌ ಸ್ವಾಮಿ’ ಸಿನಿಮಾದ ಟಾಕಿ ಭಾಗದ ಶೂಟಿಂಗ್‌ ಮುಗಿದಿದ್ದು, ಎರಡು ಹಾಡುಗಳ ಚಿತ್ರೀಕರಣವಷ್ಟೇ ಬಾಕಿ ಇದೆ.
ನಮ್‌ ಗಣಿ ಬಿಕಾಂ ಪಾಸ್‌, ಗಜಾನನ ಅಂಡ್‌ ಗ್ಯಾಂಗ್‌ ಸಿನಿಮಾಗಳ ಮೂಲಕ ಭರವಸೆ ಮೂಡಿಸಿರುವ ಅಭಿಷೇಕ್‌ ಶೆಟ್ಟಿ ನಿರ್ದೇಶನದಲ್ಲಿ ಮೂಡಿ ಬರುತ್ತಿರುವ ಮೂರನೇ ಸಿನಿಮಾವಿದು. ಅನೀಶ್‌ ತೇಜೇಶ್ವರ್‌ ಗೆ ಜೋಡಿಯಾಗಿ ಮಿಲನ ನಾಗರಾಜ್‌ ಹಾಗೂ ಹೃತಿಕ ಶ್ರೀನಿವಾಸ್‌ ನಟಿಸುತ್ತಿದ್ದಾರೆ.
ಅಕಿರ ಸಿನಿಮಾ ಖ್ಯಾತಿಯ ಶ್ರೀಕಾಂತ್‌ ಪ್ರಸನ್ನ, “ಗುಳ್ಟು’ ಸಿನಿಮಾ ಖ್ಯಾತಿಯ ಪ್ರಶಾಂತ್‌ ರೆಡ್ಡಿ ಈ ಚಿತ್ರವನ್ನು ನಿರ್ಮಾಣ ಮಾಡುತ್ತಿದ್ದಾರೆ. ಅರ್ಜುನ್‌ ಜನ್ಯ ಸಂಗೀತ ನಿರ್ದೇಶನ, ಸಾಗರ್‌ ಛಾಯಾಗ್ರಹಣ, ಉಮೇಶ್‌ ಸಂಕಲನ ಚಿತ್ರಕ್ಕಿದೆ.
