Diamond League: ಸ್ಟೀಪಲ್‌ ಚೇಸರ್‌ ಸಾಬ್ಲೆಗೆ 9ನೇ ಸ್ಥಾನ

ಬ್ರಸೆಲ್ಸ್‌ (ಬೆಲ್ಜಿಯಂ): ಬ್ರಸೆಲ್ಸ್‌ ಡೈಮಂಡ್‌ ಲೀಗ್‌ ಫೈನಲ್ಸ್‌ನಲ್ಲಿ ಭಾರತದ ಅವಿನಾಶ್‌ ಸಾಬಲೆ ನಿರೀಕ್ಷಿತ ಮಟ್ಟ ತಲುಪುವಲ್ಲಿ ವಿಫ‌ಲರಾಗಿದ್ದಾರೆ. ಅವರು 3,000 ಮೀ. ಸ್ಟೀಪಲ್‌ಚೇಸ್‌ನ 10 ಮಂದಿ ಸ್ಪರ್ಧಿಗಳ ಫೈನಲ್‌ನಲ್ಲಿ 9ನೇ ಸ್ಥಾನಿಯಾದರು.

ಶುಕ್ರವಾರವಷ್ಟೇ 30ನೇ ವರ್ಷಕ್ಕೆ ಕಾಲಿಟ್ಟ, ರಾಷ್ಟ್ರೀಯ ದಾಖಲೆ ಹೊಂದಿರುವ ಅವಿನಾಶ್‌ ಸಾಬಲೆ 8 ನಿಮಿಷ, 17.09 ಸೆಕೆಂಡ್‌ಗಳಲ್ಲಿ ಸ್ಪರ್ಧೆ ಮುಗಿಸಿದರು. ಕೀನ್ಯಾದ ಅಮೋಸ್‌ ಸೆರೆಮ್‌ (8:06.90), ಮೊರೊಕ್ಕೋದ ಸೌಫಿಯಾನ್‌ ಎಲ್‌ ಬಕ್ಕಲಿ (8:08.60), ಕೀನ್ಯಾದ ಅಮಿನ್‌ ಜಿನೂಯಿ ಮೊಹಮ್ಮದ್‌ (8:09.68) ಮೊದಲ 3 ಸ್ಥಾನ ಅಲಂಕರಿಸಿದರು.

ಪ್ಯಾರಿಸ್‌ ಒಲಿಂಪಿಕ್ಸ್‌ನಲ್ಲಿ ಅವಿನಾಶ್‌ ಸಾಬಲೆ 8:14.18 ಸೆಕೆಂಡ್‌ಗಳೊಂದಿಗೆ 11ನೇ ಸ್ಥಾನ ಪಡೆದಿದ್ದರು. ನಿಧಾನ ಗತಿಯಿಂದ ಸ್ಪರ್ಧೆ ಆರಂಭಿಸಿದ ಅವರು ಕೊನೆಗೂ ನಿಗದಿತ ವೇಗವನ್ನು ಪಡೆಯದೇ ಹೋದರು. ಇನ್ನೊಂದೆಡೆ ಅಮೋಸ್‌ ಸೆರೆಮ್‌ ಕೊನೆಯ 400 ಮೀ.ಗಳಲ್ಲಿ ಒಲಿಂಪಿಕ್‌ ಚಾಂಪಿಯನ್‌ ಸೌಫಿಯಾನ್‌ ಅವರನ್ನು ಹಿಂದಿಕ್ಕುವಲ್ಲಿ ಯಶಸ್ವಿಯಾದರು.