West Indies ವಿರುದ್ಧ ಇನ್ನಿಂಗ್ಸ್‌ ಗೆಲುವಿನ ನಿರೀಕ್ಷೆಯಲ್ಲಿ ಆಸ್ಟ್ರೇಲಿಯ

ಅಡಿಲೇಡ್‌: ಪ್ರವಾಸಿ ವೆಸ್ಟ್‌ ಇಂಡೀಸ್‌ ವಿರುದ್ಧದ ಮೊದಲ ಟೆಸ್ಟ್‌ ಪಂದ್ಯದಲ್ಲಿ ಆಸ್ಟ್ರೇಲಿಯ ತಂಡವು ಇನ್ನಿಂಗ್ಸ್‌ ಗೆಲುವಿನ ಕನಸು ಕಾಣುತ್ತಿದೆ. ಪಂದ್ಯದ ಮೂರನೇ ದಿನವೇ ಫ‌ಲಿತಾಂಶ ಬರುವುದು ಖಚಿತವಾಗಿದೆ. ಮೊದಲ ಇನ್ನಿಂಗ್ಸ್‌ನಲ್ಲಿ 95 ರನ್‌ ಹಿನ್ನಡೆ ಪಡೆದ ಬಳಿಕ ದ್ವಿತೀಯ ಇನ್ನಿಂಗ್ಸ್‌ ಆರಂಭಿಸಿದ್ದ ವೆಸ್ಟ್‌ಇಂಡೀಸ್‌ ತಂಡವು ದ್ವಿತೀಯ ದಿನದಾಟದ ಅಂತ್ಯಕ್ಕೆ ಕೇವಲ 73 ರನ್ನಿಗೆ ಆರು ವಿಕೆಟ್‌ ಕಳೆದುಕೊಂಡು ಒದ್ದಾಡುತ್ತಿದೆ. ಇನ್ನೂ 22 ರನ್‌ ಹಿನ್ನಡೆಯಲ್ಲಿರುವ ವೆಸ್ಟ್‌ಇಂಡೀಸ್‌ ತಂಡವು ಇನ್ನಿಂಗ್ಸ್‌ ಸೋಲು ತಪ್ಪಿಸಲು ಒದ್ದಾಡಬೇಕಿದೆ.

ಈ ಮೊದಲು ಎರಡು ವಿಕೆಟಿಗೆ 59 ರನ್ನುಗಳಿಂದ ದ್ವಿತೀಯ ದಿನದಾಟದ ಆಟ ಮುಂದುವರಿಸಿದ ಆಸ್ಟ್ರೇಲಿಯ ತಂಡವು ಟ್ರ್ಯಾವಿಸ್‌ ಹೆಡ್‌ ಅವರ ಆಕರ್ಷಕ ಶತಕದಿಂದಾಗಿ 283 ರನ್‌ ಗಳಿಸಿ ಆಲೌಟಾಯಿತು. ಇದ ರಿಂದಾಗಿ ತಂಡವು 95 ರನ್‌ ಮೊದಲ ಇನ್ನಿಂಗ್ಸ್‌ ಮುನ್ನಡೆ ಪಡೆಯಿತು. 134 ಎಸೆತ ಎದುರಿಸಿದ ಹೆಡ್‌ 119 ರನ್‌ ಹೊಡೆದರು. 12 ಬೌಂಡರಿ ಮತ್ತು 3 ಸಿಕ್ಸರ್‌ ಬಾರಿಸಿದ್ದರು.

ದ್ವಿತೀಯ ಇನ್ನಿಂಗ್ಸ್‌ನಲ್ಲೂ ವೆಸ್ಟ್‌ ಇಂಡೀಸ್‌ ಕುಸಿಯಿತು. ರನ್‌ ಖಾತೆ ತೆರೆ ಯುವ ಮೊದಲೆ ಮೊದಲ ವಿಕೆಟ್‌ ಪತನ ಗೊಂಡಿತ್ತು. 19 ರನ್‌ ಗಳಿಸುವಷ್ಟರಲ್ಲಿ ನಾಲ್ಕು ವಿಕೆಟ್‌ ಉರುಳಿದ್ದವು. ದಿನದಾಟದ ಅಂತ್ಯಕ್ಕೆ ತಂಡ ಆರು ವಿಕೆಟಿಗೆ 73 ರನ್‌ ಗಳಿಸಿ ಆಟುತ್ತಿದೆ.

ಸಂಕ್ಷಿಪ್ತ ಸ್ಕೋರು: ವೆಸ್ಟ್‌ಇಂಡೀಸ್‌ 188 ಮತ್ತು ಆರು ವಿಕೆಟಿಗೆ 73 (ಕಿರ್ಕ್‌ ಮೆಕೆಂಝಿ 26, ಜಸ್ಟಿನ್‌ ಗ್ರೀವ್ಸ್‌ 24ಐ ಹೇಝಲ್‌ವುಡ್‌ 18ಕ್ಕೆ 4); ಆಸ್ಟ್ರೇಲಿಯ 283 (ಖ್ವಾಜಾ 45, ಹೆಡ್‌ 119, ಶಮರ್‌ ಜೋಸೆಫ್ 94ಕ್ಕೆ 5).