ಆಸ್ಟ್ರೇಲಿಯ ತಂಡದ ಭಾರತ ಪ್ರವಾಸ: ಅಬೋಟ್‌ ಗಾಯಾಳು; ಶಾರ್ಟ್‌ ಸೇರ್ಪಡೆ

ಮೆಲ್ಬರ್ನ್: ಏಕದಿನ ಸರಣಿಗಾಗಿ ಭಾರತ ಪ್ರವಾಸ ಕೈಗೊಳ್ಳಲಿರುವ ಆಸ್ಟ್ರೇಲಿಯ ತಂಡದಲ್ಲಿ ಒಂದು ಬದಲಾವಣೆ ಮಾಡಲಾಗಿದೆ. ಗಾಯಾಳು ಸೀನ್‌ ಅಬೋಟ್‌ ಬದಲು ಡಿ’ಆರ್ಸಿ ಶಾರ್ಟ್‌ ಅವರನ್ನು ಸೇರಿಸಿಕೊಳ್ಳಲಾಗಿದೆ. “ಕ್ರಿಕೆಟ್‌ ಆಸ್ಟ್ರೇಲಿಯ’ ಸೋಮವಾರ ಈ ಬದಲಾವಣೆಯನ್ನು ಪ್ರಕಟಿಸಿತು.

ವೇಗಿ ಸೀನ್‌ ಅಬೋಟ್‌ “ಬಿಗ್‌ ಬಾಶ್‌ ಲೀಗ್‌’ನಲ್ಲಿ ಆಡುತ್ತಿರುವ ವೇಳೆ ಗಾಯಾಳಾಗಿದ್ದು, ಅವರಿಗೆ 3ರಿಂದ 4 ವಾರಗಳ ವಿಶ್ರಾಂತಿ ಸೂಚಿಸಲಾಗಿದೆ. ಡಿ’ಆರ್ಸಿ ಶಾರ್ಟ್‌ ಸ್ಪಿನ್‌ ಬೌಲಿಂಗ್‌ ಆಲ್‌ರೌಂಡರ್‌ ಆಗಿದ್ದಾರೆ. ಆರಂಭಿಕನಾಗಿಯೂ ಬ್ಯಾಟ್‌ ಬೀಸಬಲ್ಲರು.

“ಅಬೋಟ್‌ ಹೊರಗುಳಿಯುವಂತಾದದ್ದು ನಿಜಕ್ಕೂ ದುರದೃಷ್ಟಕರ. ಶಾರ್ಟ್‌ ಸೇರ್ಪಡೆಯೊಂದಿಗೆ ತಂಡದಲ್ಲಿ ಮತ್ತೋರ್ವ ಸ್ಪಿನ್ನರ್‌ಗೆ ಅವಕಾಶ ಸಿಕ್ಕಂತಾಗಿದೆ. ಈಗಾಗಲೇ ಆ್ಯಶrನ್‌ ಅಗರ್‌, ಆ್ಯಡಂ ಝಂಪ ಇದ್ದಾರೆ. ಜತೆಗೆ ವಿಶ್ವ ದರ್ಜೆಯ ವೇಗಿಗಳನ್ನೂ ತಂಡ ಹೊಂದಿದೆ. ಯಾವುದೇ ಕ್ರಮಾಂಕದಲ್ಲೂ ಬ್ಯಾಟಿಂಗ್‌ ನಡೆಸಬಲ್ಲ ಸಾಮರ್ಥ್ಯ ಶಾರ್ಟ್‌ ಅವರಿಗಿದೆ’ ಎಂದು ರಾಷ್ಟ್ರೀಯ ಆಯ್ಕೆಗಾರ ಟ್ರೆವರ್‌ ಹಾನ್ಸ್‌ ಹೇಳಿದ್ದಾರೆ.

ಕೇವಲ 4 ಏಕದಿನ ಪಂದ್ಯಗಳ ಅನುಭವಿ ಡಿ’ಆರ್ಸಿ ಶಾರ್ಟ್‌ ಕೇವಲ 4 ಏಕದಿನ ಪಂದ್ಯಗಳನ್ನಷ್ಟೇ ಆಡಿದ್ದಾರೆ. ಕೊನೆಯ ಸಲ ಕಾಂಗರೂ ತಂಡವನ್ನು ಪ್ರತಿನಿಧಿಸಿದ್ದು 2018ರ ನವೆಂಬರ್‌ನಲ್ಲಿ, ದಕ್ಷಿಣ ಆಫ್ರಿಕಾ ವಿರುದ್ಧ.