ಟಿ20 ವಿಶ್ವಕಪ್‌: ಐರ್ಲೆಂಡ್‌ ಮೇಲೆ ಕಾಂಗರೂ ಸವಾರಿ

ಬ್ರಿಸ್ಬೇನ್: ಆಕ್ರಮಣಕಾರಿ ಅರ್ಧ ಶತಕದ ಮೂಲಕ ಫಾರ್ಮ್ ಗೆ ಮರಳಿದ ನಾಯಕ ಆರನ್‌ ಫಿಂಚ್‌, ಐರ್ಲೆಂಡ್‌ ಎದುರಿನ ಸೋಮವಾರದ ಟಿ20 ವಿಶ್ವಕಪ್‌ ಸೂಪರ್‌-12 ಪಂದ್ಯದಲ್ಲಿ ಆಸ್ಟ್ರೇಲಿಯದ ಗೆಲುವಿನ ರೂವಾರಿಯಾಗಿ ಮೂಡಿಬಂದರು.

ಇದರೊಂದಿಗೆ ಹಾಲಿ ಚಾಂಪಿಯನ್‌ ಆಸೀಸ್‌ ತನ್ನ 4ನೇ ಪಂದ್ಯದಲ್ಲಿ 2ನೇ ಜಯ ದಾಖಲಿಸಿತು. ಅಂತರ 42 ರನ್‌.

ಬ್ಯಾಟಿಂಗ್‌ಗೆ ಆಹ್ವಾನಿಸಲ್ಪಟ್ಟ ಆಸ್ಟ್ರೇಲಿಯ 5 ವಿಕೆಟಿಗೆ 179 ರನ್‌ ಪೇರಿಸಿದರೆ, ಐರ್ಲೆಂಡ್‌ 18.1 ಓವರ್‌ಗಳಲ್ಲಿ 137ಕ್ಕೆ ಆಲೌಟ್‌ ಆಯಿತು. ಅರ್ಹತಾ ಸುತ್ತಿನಲ್ಲಿ ಎರಡು ಬಾರಿಯ ಚಾಂಪಿಯನ್‌ ವೆಸ್ಟ್‌ ಇಂಡೀಸನ್ನು ಹೊರದಬ್ಬಿ, ಸೂಪರ್‌-12 ಹಂತದಲ್ಲಿ ಬಲಿಷ್ಠ ಇಂಗ್ಲೆಂಡ್‌ಗೆ ಸೋಲಿನ ಆಘಾತವಿಕ್ಕಿದ ಐರ್ಲೆಂಡ್‌ ಆಟ ಚಾಂಪಿಯನ್ನರ ಮುಂದೆ ನಡೆಯಲಿಲ್ಲ. ಅದು ಎಲ್ಲ ವಿಭಾಗಗಳಲ್ಲೂ ವೈಫ‌ಲ್ಯ ಕಂಡಿತು. ಆದರೂ ಅಂಕಪಟ್ಟಿಯಲ್ಲಿ 4ನೇ ಸ್ಥಾನಿಯಾಗಿದೆ. 4 ಪಂದ್ಯಗಳಲ್ಲಿ ಐರ್ಲೆಂಡ್‌ ಎದುರಿಸಿದ 2ನೇ ಸೋಲು ಇದಾಗಿದೆ. ಒಂದು ಪಂದ್ಯ ರದ್ದುಗೊಂಡಿದೆ.

ಆಸ್ಟ್ರೇಲಿಯವೀಗ ಅಂಕಪಟ್ಟಿಯಲ್ಲಿ ಇಂಗ್ಲೆಂಡನ್ನು ಹಿಂದಿಕ್ಕಿ ದ್ವಿತೀಯ ಸ್ಥಾನಕ್ಕೆ ಏರಿದೆ. ನ್ಯೂಜಿಲ್ಯಾಂಡ್‌ನ‌ಂತೆ 5 ಅಂಕ ಹೊಂದಿದೆ. ಆದರೆ ಕಾಂಗರೂಗಳ ರನ್‌ರೇಟ್‌ ಮಾತ್ರ ಮೈನಸ್‌ನಲ್ಲಿದೆ. ಶುಕ್ರವಾರದ ಅಂತಿಮ ಪಂದ್ಯದಲ್ಲಿ ಅದು ಅಫ್ಘಾನಿಸ್ಥಾನವನ್ನು ಎದುರಿಸಬೇಕಿದ್ದು, ಇಲ್ಲಿ ದೊಡ್ಡ ಗೆಲುವಿನೊಂದಿಗೆ ರನ್‌ರೇಟ್‌ನಲ್ಲಿ ಪ್ರಗತಿ ಸಾಧಿಸಬೇಕಿದೆ. ಇಂಗ್ಲೆಂಡ್‌ ಮತ್ತು ನ್ಯೂಜಿಲ್ಯಾಂಡ್‌ ಇನ್ನೂ 2 ಪಂದ್ಯಗಳನ್ನು ಆಡಬೇಕಿರುವುದರಿಂದ ಇಲ್ಲಿ ನಾಕೌಟ್‌ ಪೈಪೋಟಿ ತೀವ್ರಗೊಳ್ಳುವುದರಲ್ಲಿ ಅನುಮಾನವಿಲ್ಲ.

ಫಿಂಚ್‌ ಆಕ್ರಮಣಕಾರಿ ಆಟ
ಆರನ್‌ ಫಿಂಚ್‌ ಆಕ್ರಮಣಕಾರಿ ಆಟದ ಮೂಲಕ ಐರ್ಲೆಂಡ್‌ ಬೌಲರ್‌ಗಳ ಮೇಲೆರಗಿ ಹೋದರು. 44 ಎಸೆತಗಳಿಂದ 63 ರನ್‌ ಬಾರಿಸಿದರು. ಈ ಪಂದ್ಯಶ್ರೇಷ್ಠ ಇನ್ನಿಂಗ್ಸ್‌ 5 ಫೋರ್‌, 3 ಸಿಕ್ಸರ್‌ಗಳಿಂದ ರಂಗೇರಿಸಿಕೊಂಡಿತು. ಕಳೆದ 8 ಇನ್ನಿಂಗ್ಸ್‌ಗಳಲ್ಲಿ ಫಿಂಚ್‌ ಹೊಡೆದ ಮೊದಲ ಅರ್ಧ ಶತಕ ಇದಾಗಿದೆ.

ಡೇವಿಡ್‌ ವಾರ್ನರ್‌ (8) ಅವರನ್ನು ಬೇಗನೇ ಕಳೆದುಕೊಂಡ ಆಸ್ಟ್ರೇಲಿಯಕ್ಕೆ ಆರನ್‌ ಫಿಂಚ್‌-ಮಿಚೆಲ್‌ ಮಾರ್ಷ್‌ ಆಧಾರ ವಾದರು. ಇವರ ನಡುವೆ 6 ಓವರ್‌ಗಳ ಜತೆಯಾಟ ಸಾಗಿತು. 52 ರನ್‌ ಒಟ್ಟುಗೂಡಿತು. ಮಾರ್ಷ್‌ ಕೂಡ ಆಕ್ರಮಣಕಾರಿ ಆಟವಾಡಿದರು. ಅವರ 28 ರನ್‌ 2 ಬೌಂಡರಿ, 2 ಸಿಕ್ಸರ್‌ಗಳನ್ನು ಒಳಗೊಂಡಿತ್ತು.

ಆಸೀಸ್‌ ಸರದಿಯಲ್ಲಿ ಸಿಡಿದು ನಿಂತ ಮತ್ತೋರ್ವ ಬ್ಯಾಟರ್‌ ಮಾರ್ಕಸ್‌ ಸ್ಟೋಯಿನಿಸ್‌. ಅವರು 3 ಬೌಂಡರಿ, ಒಂದು ಸಿಕ್ಸರ್‌ ನೆರವಿನಿಂದ 35 ರನ್‌ ಹೊಡೆದರು.

ಡೆತ್‌ ಓವರ್‌ನಲ್ಲಿ ಫಿಂಚ್‌ ಮತ್ತು ಸ್ಟೋಯಿನಿಸ್‌ ವಿಕೆಟ್‌ ಉರುಳಿದ್ದರಿಂದ ಆಸೀಸ್‌ ರನ್‌ಗತಿ ಕುಂಟಿತಗೊಂಡಿತು. ಇನ್ನೂರರ ಗಡಿ ಮರೀಚಿಕೆಯಾಯಿತು.

4 ಓವರ್‌, 5 ವಿಕೆಟ್‌!
ಐರ್ಲೆಂಡ್‌ ಚೇಸಿಂಗ್‌ ಅತ್ಯಂತ ಆಘಾತಕಾರಿಯಾಗಿತ್ತು. ಸ್ಟಾರ್ಕ್‌, ಮ್ಯಾಕ್ಸ್‌ವೆಲ್‌, ಕಮಿನ್ಸ್‌ ಬೌಲಿಂಗ್‌ ಆಕ್ರಮಣಕ್ಕೆ ತತ್ತರಿಸಿದ ಅದು 4 ಓವರ್‌ ಆಗುವಷ್ಟರಲ್ಲಿ 5 ವಿಕೆಟ್‌ ಕಳೆದುಕೊಂಡಿತು. ಸ್ಕೋರ್‌ ಕೇವಲ 25 ರನ್‌ ಆಗಿತ್ತು. ವನ್‌ಡೌನ್‌ ಬ್ಯಾಟರ್‌ ಲಾರ್ಕನ್‌ ಟ್ಯುಕರ್‌ ಒಂದೆಡೆ ಕ್ರೀಸ್‌ ಆಕ್ರಮಿಸಿಕೊಂಡು, ಕೆಳ ಕ್ರಮಾಂಕದ ಆಟಗಾರರ ಅಲ್ಪಸ್ವಲ್ಪ ಬೆಂಬಲ ಪಡೆದು ಹೋರಾಟವೊಂದನ್ನು ಸಂಘಟಿಸಿದರು. ಸ್ಕೋರ್‌ 130ರ ಗಡಿ ದಾಟಿತು. ಟ್ಯುಕರ್‌ ಪಂದ್ಯದಲ್ಲೇ ಸರ್ವಾಧಿಕ 71 ರನ್‌ ಬಾರಿಸಿದರು (48 ಎಸೆತ, 9 ಬೌಂಡರಿ, 1 ಸಿಕ್ಸರ್‌).

ಸಂಕ್ಷಿಪ್ತ ಸ್ಕೋರ್‌
ಆಸ್ಟ್ರೇಲಿಯ-5 ವಿಕೆಟಿಗೆ 179 (ಫಿಂಚ್‌ 63, ಸ್ಟೋಯಿನಿಸ್‌ 35, ಮಾರ್ಷ್‌ 28, ಮೆಕಾರ್ಥಿ 29ಕ್ಕೆ 3, ಲಿಟ್ಲ 21ಕ್ಕೆ 2). ಐರ್ಲೆಂಡ್‌-18.1 ಓವರ್‌ಗಳಲ್ಲಿ 137 (ಟ್ಯುಕರ್‌ 71, ಡೆಲಾನಿ 14, ಮ್ಯಾಕ್ಸ್‌ವೆಲ್‌ 14ಕ್ಕೆ 2, ಝಂಪ 19ಕ್ಕೆ 2, ಕಮಿನ್ಸ್‌ 28ಕ್ಕೆ 2, ಸ್ಟಾರ್ಕ್‌ 43ಕ್ಕೆ 2).
ಪಂದ್ಯಶ್ರೇಷ್ಠ: ಆರನ್‌ ಫಿಂಚ್‌.