Assam: ಯುಸಿಸಿ ಜಾರಿ ಸನ್ನಿಹಿತ, ಮುಸ್ಲಿಂ ವಿವಾಹ ಕಾನೂನು ವಾಪಸ್‌

ಗುವಾಹಾಟಿ: ಅಸ್ಸಾಂನಲ್ಲಿ ಸಮಾನ ನಾಗರಿಕ ಸಂಹಿತೆ ಜಾರಿ ಸನ್ನಿಹಿತವಾಗಿದೆ. ಇದಕ್ಕೆ ಪೂರಕ ಎನ್ನುವಂತೆ ಗುರುವಾರ ರಾಜ್ಯದಲ್ಲಿ ಮುಸ್ಲಿಮರ ವಿವಾಹ ಮತ್ತು ವಿಚ್ಛೇದನ ನೋಂದಣಿ ಕಾನೂನನ್ನು ವಾಪಸ್‌ ಪಡೆಯುವ ಮಸೂದೆಗೆ (ದಿ ಅಸ್ಸಾಂ ರಿಪೀಲಿಂಗ್‌ಬಿಲ್‌-2024) ವಿಧಾನಸಭೆ ಅಂಗೀಕಾರ ನೀಡಿದೆ.

ಅಂಗೀಕಾರಗೊಂಡಿರುವ ಮಸೂದೆಯು ಅಸ್ಸಾಂ ಮುಸ್ಲಿಮರ ವಿವಾಹ ಮತ್ತು ವಿಚ್ಛೇದನ ನೋಂದಣಿ ಕಾಯ್ದೆ -1935 ಅನ್ನು ರದ್ದುಗೊಳಿಸಲಿದೆ. ಈ ಹಿನ್ನೆಲೆಯಲ್ಲಿ ಇನ್ನು ಮುಂದೆ ಖಾಝಿಗಳು ಮದುವೆ ನೋಂದಣಿ ಮಾಡುವಂತಿಲ್ಲ. ಸರಕಾರದ ವ್ಯವಸ್ಥೆಯ ಅನ್ವಯವೇ ನೋಂದಣಿಗಳು ನಡೆಯಬೇಕಿದೆ. ಅಲ್ಲದೇ ಹೊಸ ಕಾನೂನು ಅಸ್ಸಾಂನಲ್ಲಿ ಬಾಲ್ಯ ವಿವಾಹಗಳನ್ನು ಕೊನೆಗೊಳಿಸಲಿದೆ ಎಂದು ಹೇಳಲಾಗುತ್ತಿದೆ.