ಪ್ರಶ್ನೆ ಕೇಳಿದವರು, ಉತ್ತರ ನೀಡುವವರೂ ಗೈರು

ವಿಧಾನಪರಿಷತ್ತು: ರಾಜ್ಯಪಾಲರ ಭಾಷಣದ ಮೇಲಿನ ಚರ್ಚೆಯ ಐದನೇ ದಿನವಾದ ಶುಕ್ರವಾರ ಬಹಳಷ್ಟು ಸದಸ್ಯರು, ಸಚಿವರ ಗೈರುಹಾಜರಿಯಿಂದಾಗಿ ಚುಕ್ಕೆ ಗುರುತಿನ ಪ್ರಶ್ನೆ ಕೇಳಿದವರ ಪರವಾಗಿ ಮತ್ತೂಬ್ಬರು ಪ್ರಶ್ನೆ ಕೇಳಿದರೆ ಸಂಬಂಧಪಟ್ಟ ಸಚಿವರ ಪರವಾಗಿ ಮತ್ತೂಬ್ಬರು ಉತ್ತರಿಸುವಂತಾಯಿತು. ಇದಕ್ಕೆ ಸಭಾಪತಿ ಕೂಡ ಬೇಸರ ವ್ಯಕ್ತಪಡಿಸಿದರು.

ಬಿಜೆಪಿಯ ಭಾನುಪ್ರಕಾಶ್‌, ಸೋಮಣ್ಣ ಬೇವಿನಮರದ, ಅರುಣ್‌ ಶಹಾಪುರ ಪರವಾಗಿ ಗಣೇಶ್‌ ಕಾರ್ಣಿಕ್‌, ಕಾಂಗ್ರೆಸ್‌ನ ಮೋಟಮ್ಮ ಪರವಾಗಿ ಆಡಳಿತ ಪಕ್ಷದ ಮುಖ್ಯ ಸಚೇತಕ ಐವಾನ್‌ ಡಿಸೋಜಾ ಪ್ರಶ್ನೆ ಕೇಳಿದರು. ಹಾಗೆಯೇ ಗ್ರಾಮೀಣಾಭಿವೃದ್ಧಿ ಮತ್ತು ಪಂಚಾಯತ್‌ರಾಜ್‌ ಇಲಾಖೆ ಸಚಿವರ ಪರವಾಗಿ ಸಚಿವ ಆರ್‌.ವಿ.ದೇಶಪಾಂಡೆ ಉತ್ತರ ನೀಡಿದರು. ಪ್ರಾಥಮಿಕ ಮತ್ತು ಪ್ರೌಢಶಿಕ್ಷಣ ಸಚಿವ ತನ್ವೀರ್‌ ಸೇಠ್ ಅವರು ಸಾರಿಗೆ ಸಚಿವರು ಹಾಗೂ ಉನ್ನತ ಶಿಕ್ಷಣ ಸಚಿವರಿಗೆ ಸಂಬಂಧಪಟ್ಟ ಪ್ರಶ್ನೆಗಳಿಗೆ ಉತ್ತರ ನೀಡಿದರು.

ಪ್ರಶ್ನೋತ್ತರ ವೇಳೆಯಲ್ಲಿ ಕೊನೆಯ ಪ್ರಶ್ನೆಯನ್ನು ಬಿಜೆಪಿಯ ಅರುಣ್‌ ಶಹಾಪುರ ಪರವಾಗಿ ಗಣೇಶ್‌ ಕಾರ್ಣಿಕ್‌ ಕೇಳಿದ ಪ್ರಶ್ನೆಗೆ ಉನ್ನತ ಶಿಕ್ಷಣ ಸಚಿವರ ಪರವಾಗಿ ಸಚಿವ ತನ್ವೀರ್‌  ಸೇಠ್ ಉತ್ತರ ನೀಡಿದರು. ಆಗ ಸಭಾಪತಿ ಡಿ.ಎಚ್‌.ಶಂಕರಮೂರ್ತಿ, ಸದನದಲ್ಲಿ ಪ್ರಶ್ನೆ ಕೇಳಬೇಕಾದ ಸದಸ್ಯರು ಹಾಗೂ  ಉತ್ತರ ನೀಡಬೇಕಾದ ಸಚಿವರು ಗೈರಾಗಿದ್ದು, ಈ ರೀತಿಯ ಸ್ಥಿತಿ ನಿರ್ಮಾಣವಾಗಿರುವುದು ವಿಪರ್ಯಾಸ ಎಂದು ಬೇಸರ ವ್ಯಕ್ತಪಡಿಸಿದರು.