ವೆಸ್ಟ್‌ ಇಂಡೀಸ್‌ ವಿರುದ್ಧದ ಟಿ20 ಸರಣಿಗೆ ಪಾಕಿಸ್ಥಾನ ತಂಡ ಪ್ರಕಟ

ಕರಾಚಿ: ಪಿಎಸ್‌ಎಲ್‌ನಲ್ಲಿ ನೀಡಿದ ಮಹೋನ್ನತ ನಿರ್ವಹಣೆಯಿಂದಾಗಿ ಆಸಿಫ್ ಅಲಿ, ಹುಸೈನ್‌ ತಲತ್‌ ಮತ್ತು ಶಾಹೀನ್‌ ಅಫ್ರಿದಿ ಅವರನ್ನು ಕರಾಚಿಯಲ್ಲಿ ನಡೆಯಲಿರುವ ಮುಂಬರುವ ವೆಸ್ಟ್‌ ಇಂಡೀಸ್‌ ವಿರುದ್ಧದ ಟಿ20 ಸರಣಿಗೆ ಪಾಕಿಸ್ಥಾನ ತಂಡದಲ್ಲಿ ಸೇರಿಸಿಕೊಳ್ಳಲಾಗಿದೆ. 

15 ಸದಸ್ಯರ ತಂಡದಲ್ಲಿ ಆಸಿಫ್, ತಲತ್‌ ಮತ್ತು ಶಾಹೀನ್‌ ಹೊಸಮುಖಗಳಾಗಿದ್ದಾರೆ. ವೇಗಿಗಳಾದ ರಹತ್‌ ಅಲಿ ಮತ್ತು ಉಸ್ಮಾನ್‌ ಖಾನ್‌ ಅವರು ತಂಡಕ್ಕೆ ಮರಳಿದ್ದಾರೆ. ಗಾಯದಿಂದ ಚೇತರಿಸಿಕೊಳ್ಳದ ಇಮದ್‌ ವಸೀಮ್‌ ಮತ್ತು ರುಮ್ಮಾನ್‌ ರಯೀಸ್‌ ಅವರನ್ನು ಕೈಬಿಡಲಾಗಿದೆ. ಕ್ಯಾಚ್‌ ಪಡೆಯುವ ವೇಳೆ ತಲೆ ನೆಲಕ್ಕೆ ಬಡಿದ ಕಾರಣ ಇಮದ್‌ ಗಾಯಗೊಂಡಿದ್ದರೆ ರಯೀಸ್‌ ಬೌಂಡರಿ ಗೆರೆಯ ಸಮೀಪ ಚೆಂಡಿನೊಂದಿಗೆ ಉರುಳಾಡಿ ಮೊಣಕಾಲಿಗೆ ಗಾಯಮಾಡಿಕೊಂಡಿದ್ದಾರೆ. ಅಗ್ರ ಕ್ರಮಾಂಕದಲ್ಲಿ ಅಹ್ಮದ್‌ ಶೆಹಜಾದ್‌ ತನ್ನ ಸ್ಥಾನವನ್ನು ಉಳಿಸಿಕೊಂಡಿದ್ದರೆ ಶೋಯಿಬ್‌ ಮಲಿಕ್‌ ಕೂಡ ತಂಡಕ್ಕೆ ಮರಳಿದ್ದಾರೆ.

ಟಿ20 ಸರಣಿಯ ಮೂರು ಪಂದ್ಯಗಳು ಕರಾಚಿಯಲ್ಲಿ ಅನುಕ್ರಮವಾಗಿ ಎಪ್ರಿಲ್‌ 1, 2, ಮತ್ತು 3ರಂದು ನಡೆಯಲಿವೆ. ಎಲ್ಲ ಪಂದ್ಯಗಳು ಕರಾಚಿಯ ನ್ಯಾಶನಲ್‌ ಕ್ರೀಡಾಂಗಣದಲ್ಲಿ ನಡೆಯಲಿವೆ. ಇದೇ ಮೈದಾನದಲ್ಲಿ ಇತ್ತೀಚೆಗೆ ಪಾಕಿಸ್ಥಾನ ಸೂಪರ್‌ ಲೀಗ್‌ನ ಫೈನಲ್‌ ಪಂದ್ಯ ನಡೆದಿತ್ತು. 2009ರ ಬಳಿಕ ಇದೇ ಮೊದಲ ಬಾರಿಗೆ ಕರಾಚಿಯಲ್ಲಿ ಅಂತಾರಾಷ್ಟ್ರೀಯ ಕ್ರಿಕೆಟ್‌ ಪಂದ್ಯವೊಂದು ನಡೆಯಲಿದೆ. ಈ ತಾಣದಲ್ಲಿ ಟಿ20 ಪಂದ್ಯ ನಡೆಯುತ್ತಿರುವುದು ಇದೇ ಮೊದಲ ಸಲವಾಗಿದೆ.

ಟಿ20 ತಂಡ: ಅಹ್ಮದ್‌ ಶೆಹಜಾದ್‌, ಫ‌ಖಾರ್‌ ಜಮಾನ್‌, ಬಾಬರ್‌ ಅಜಮ್‌, ಶೋಯಿಬ್‌ ಮಲಿಕ್‌, ಆಸಿಫ್ ಅಲಿ, ಸಫ‌ìರಾಜ್‌ ಅಹ್ಮದ್‌ (ನಾಯಕ), ಹುಸೈನ್‌ ತಲತ್‌, ಫಾಹೀಮ್‌ ಅಶ್ರಫ್, ಮುಹಮ್ಮದ್‌ ನವಾಜ್‌, ಶಾದಾಬ್‌ ಖಾನ್‌, ಮೊಹಮ್ಮದ್‌ ಆಮಿರ್‌, ಹಸನ್‌ ಅಲಿ, ರಹತ್‌ ಅಲಿ, ಉಸ್ಮಾನ್‌ ಖಾನ್‌, ಶಾಹೀನ್‌ ಅಫ್ರಿದಿ.