Asian Youth Chess :ಕಿಯಾನಾ, ಹರ್ಷ್‌ಗೆ ಚಿನ್ನ

ಹೊಸದಿಲ್ಲಿ: ಭಾರತದ ಇಬ್ಬರು ಯುವ ಚೆಸ್‌ ತಾರೆಗಳಾದ ಕಿಯನಾ ಪರಿಹರ್‌ ( ಅಂಡರ್‌-8 ಬಾಲಕಿಯರು) ಮತ್ತು ಹರ್ಷ್‌ ಸುರೇಶ್‌ (ಅಂಡರ್‌-16 ಮುಕ್ತ) ಅವರು ಯುಎಇಯ ಆಲ್‌ ಐನ್‌ ಕನ್ವೆನ್ಶನ್‌ ಸೆಂಟರ್‌ನಲ್ಲಿ ನಡೆದ 25ನೇ ಏಷ್ಯನ್‌ ಯೂತ್‌ ಚೆಸ್‌ ಚಾಂಪಿಯನ್‌ಶಿಪ್‌ನಲ್ಲಿ ಚಿನ್ನ ಗೆದ್ದುಕೊಂಡಿದ್ದಾರೆ.

ಕಿಯಾನಾ ಅವರು ಕಳೆದ ವಾರ ನಡೆದ ಅಂಡರ್‌-8 ಬಾಲಕಿಯರ ರ್ಯಾಪಿಡ್‌ ಚೆಸ್‌ ಚಾಂಪಿಯನ್‌ಶಿಪ್‌ನಲ್ಲಿ ಬೆಳ್ಳಿಯ ಪದಕ ಜಯಿಸಿದ್ದರು. ಭಾರತದ ಎಎಸ್‌ ಶರ್ವಾನಿಕಾ (ಅಂಡರ್‌-8 ಬಾಲಕಿಯರು), ಆರಿತ್‌ ಕಪಿಲ್‌ (ಅಂಡರ್‌-8 ಮುಕ್ತ) ಮತ್ತು ಜಿ. ತೇಜಸ್ವಿನಿ (ಅಂಡರ್‌-18 ಬಾಲಕಿಯರು) ಅವರು ತಮ್ಮ ವಿಭಾಗದ ಹೋರಾಟದಲ್ಲಿ ಬೆಳ್ಳಿಯ ಪದಕ ಜಯಿಸಿದ್ದಾರೆ. ಆದ್ಯ ರಂಗನಾಥ್‌ ಅವರು ಅಂಡರ್‌-10 ಬಾಲಕಿಯರ ವಿಭಾಗದಲ್ಲಿ ಕಂಚಿನ ಪದಕ ಜಯಿಸಿದ್ದಾರೆ.