Asian Games ತಯಾರಿ: ಹಾಕಿ ಶಿಬಿರಕ್ಕೆ 39 ಆಟಗಾರರು

ಹೊಸದಿಲ್ಲಿ: ಏಷ್ಯನ್‌ ಗೇಮ್ಸ್‌ಗೆ ಭರದಿಂದ ಸಿದ್ಧತೆ ಆರಂಭಿಸಿರುವ “ಹಾಕಿ ಇಂಡಿಯಾ’ 39 ಮಂದಿ ಆಟಗಾರರನ್ನು ತರಬೇತಿ ಶಿಬಿರಕ್ಕಾಗಿ ಆಯ್ಕೆ ಮಾಡಿದೆ. ಪರುಷರ ವಿಭಾಗದ ಈ ಶಿಬಿರ ಸೋಮವಾರದಿಂದ ಸೆ. 18ರ ತನಕ ಬೆಂಗಳೂರಿನ ಸಾಯ್‌ ಸೆಂಟರ್‌ನಲ್ಲಿ ನಡೆಯಲಿದೆ. ಸೆ. 23ರಿಂದ ಅ. 8ರ ತನಕ ಚೀನದ ಆತಿಥ್ಯದಲ್ಲಿ ಏಷ್ಯನ್‌ ಗೇಮ್ಸ್‌ ನಡೆಯಲಿದೆ.

ಭಾರತ ತಂಡ ಇತ್ತೀಚೆಗಷ್ಟೇ ದಾಖಲೆ 4ನೇ ಬಾರಿಗೆ ಏಷ್ಯನ್‌ ಚಾಂಪಿಯನ್ಸ್‌ ಟ್ರೋಫಿ ಪ್ರಶಸ್ತಿಯನ್ನೆತ್ತಿತ್ತು. ಆದರೆ ಏಷ್ಯನ್‌ ಗೇಮ್ಸ್‌ ಇದಕ್ಕೂ ಮಿಗಿಲಾದ ಕ್ರೀಡಾಕೂಟವಾಗಿದ್ದು, ಏಷ್ಯಾದ ಬಲಿಷ್ಠ ತಂಡಗಳೆಲ್ಲ ಕಣಕ್ಕಿಳಿಯಲಿವೆ. ತಂಡದ ಕೆಲವು ಪ್ರಮುಖ ದೋಷಗಳನ್ನು ತಿದ್ದಿಕೊಂಡು ಏಷ್ಯಾಡ್‌ಗೆ ಹುರಿಗೊಳಿಸುವುದು ಕೋಚ್‌ ಕ್ರೆಗ್‌ ಫುಲ್ಟನ್‌ ಅವರ ಯೋಜನೆ.

ಏಷ್ಯನ್‌ ಗೇಮ್ಸ್‌ನಲ್ಲಿ ಭಾರತ “ಎ’ ವಿಭಾಗದಲ್ಲಿ ಸ್ಥಾನ ಪಡೆದಿದೆ. ಪಾಕಿಸ್ಥಾನ, ಜಪಾನ್‌, ಬಾಂಗ್ಲಾದೇಶ, ಸಿಂಗಾಪುರ ಮತ್ತು ಉಜ್ಬೆಕಿಸ್ಥಾನ ಈ ವಿಭಾಗದ ಉಳಿದ ತಂಡಗಳು. ಭಾರತ ತನ್ನ ಮೊದಲ ಪಂದ್ಯವನ್ನು ಸೆ. 24ರಂದು ಉಜ್ಬೆಕಿಸ್ಥಾನ ವಿರುದ್ಧ ಆಡಲಿದೆ.

ನಿರಂತರ ಕಲಿಕೆ
“ಕಳೆದ ಕೆಲವು ತಿಂಗಳಿಂದ ನಾವು ಬೆಳವಣಿಗೆ ಕಾಣುತ್ತ ಬಂದಿದ್ದೇವೆ. ನಿರಂತರವಾಗಿ ಕಲಿಕೆ ಪ್ರಕ್ರಿಯೆ ನಡೆಯುತ್ತಿದೆ. ಏಷ್ಯಾಡ್‌ನ‌ಲ್ಲಿ ಉತ್ತಮ ಪ್ರದರ್ಶನ ನೀಡಿ 2024ರ ಪ್ಯಾರಿಸ್‌ ಒಲಿಂಪಿಕ್ಸ್‌ಗೆ ಅರ್ಹತೆ ಸಂಪಾದಿಸುವ ಉದ್ದೇಶದಿಂದ ಈ ತರಬೇತಿ ಶಿಬಿರವನ್ನು ಏರ್ಪಡಿಸಲಾಗಿದೆ. ಚೆನ್ನೈಯಲ್ಲಿ ನಡೆದ ಹೀರೋ ಏಷ್ಯನ್‌ ಚಾಂಪಿಯನ್ಸ್‌ ಟ್ರೋಫಿ ಪಂದ್ಯಾವಳಿಯಲ್ಲಿ ನಮ್ಮ ಪ್ರದರ್ಶನ ಉತ್ತಮ ಮಟ್ಟದಲ್ಲಿತ್ತು. ನಾವು ಅಜೇಯ ಅಭಿಯಾನಗೈದು ಪ್ರಶಸ್ತಿ ಗೆದ್ದೆವು. ಏಷ್ಯಾಡ್‌ನ‌ಲ್ಲೂ ಇದೇ ಮಟ್ಟದ ನಿರ್ವಹಣೆಯನ್ನು ಕಾಯ್ದುಕೊಳ್ಳಬೇಕಿದೆ’ ಎಂಬುದಾಗಿ ಫುಲ್ಟನ್‌ ಹೇಳಿದರು.