ವನಿತಾ ಏಷ್ಯಾ ಕಪ್‌ ಕ್ರಿಕೆಟ್‌; ಹ್ಯಾಟ್ರಿಕ್‌ ಗೆಲುವು ಸಾಧಿಸಿದ ಭಾರತ

ಬಾಂಗ್ಲಾದೇಶ: ವನಿತಾ ಏಷ್ಯಾ ಕಪ್‌ ಕ್ರಿಕೆಟ್‌ ಪಂದ್ಯಾವಳಿಯಲ್ಲಿ ಭಾರತ ಹ್ಯಾಟ್ರಿಕ್‌ ಗೆಲುವು ಸಾಧಿಸಿ ಅಂಕಪಟ್ಟಿಯಲ್ಲಿ ಅಗ್ರಸ್ಥಾನ ಅಲಂಕರಿಸಿದೆ.

ಮೂರನೇ ಮುಖಾಮುಖಿಯಲ್ಲಿ ಮಂಧನಾ ಬಳಗ ಯುಎಇಯನ್ನು 104 ರನ್ನುಗಳ ಭಾರೀ ಅಂತರದಿಂದ ಕೆಡವಿತು.

ಮೊದಲು ಬ್ಯಾಟಿಂಗ್‌ ಮಾಡಿದ ಭಾರತ 5 ವಿಕೆಟಿಗೆ 178 ರನ್‌ ಪೇರಿಸಿತು. ಜವಾಬಿತ್ತ ಯುಎಇ ಟೆಸ್ಟ್‌ ಶೈಲಿಯಲ್ಲಿ ಆಡಿತು; 20 ಓವರ್‌ಗಳಲ್ಲಿ ಗಳಿಸಿದ್ದು 4 ವಿಕೆಟಿಗೆ 74 ರನ್‌ ಮಾತ್ರ.

ಭಾರತದ ಅಜೇಯ ಓಟ
ಇದರೊಂದಿಗೆ ಭಾರತ ಆಡಿದ ಮೂರೂ ಪಂದ್ಯಗಳನ್ನು ಗೆದ್ದು ಸೆಮಿಫೈನಲ್‌ ಬಾಗಿಲಿನ ಸಮೀಪ ನಿಂತಿದೆ. ಮೊದಲೆರಡು ಪಂದ್ಯಗಳಲ್ಲಿ ಶ್ರೀಲಂಕಾ ಮತ್ತು ಮಲೇಷ್ಯಾವನ್ನು ಮಣಿಸಿತ್ತು. ಭಾರತದ ಮುಂದಿನ ಎದುರಾಳಿ ಪಾಕಿಸ್ಥಾನ. ಈ ಪಂದ್ಯ ಶುಕ್ರವಾರ ನಡೆಯಲಿದೆ.

ಭಾರತ ಆರಂಭಿಕ ಜೋಡಿಯಲ್ಲಿ ಮತ್ತೆ ಬದಲಾವಣೆ ಮಾಡಿತು. ಎಸ್‌. ಮೇಘನಾ ಜತೆ ರಿಚಾ ಘೋಷ್‌ ಆಡಳಿಳಿದರು. ಆದರೆ ಗೋಲ್ಡನ್‌ ಡಕ್‌ ಆಗಿ ತೆರಳಿದರು. ಮೇಘನಾ ಗಳಿಕೆ 10 ರನ್‌ ಮಾತ್ರ. ಡಿ. ಹೇಮಲತಾ 2 ರನ್‌ ಮಾಡಿ ರನೌಟ್‌ ಆದರು. 19 ರನ್ನಿಗೆ ಭಾರತದ 3 ವಿಕೆಟ್‌ ಬಿತ್ತು.

ವನ್‌ಡೌನ್‌ನಲ್ಲಿ ಬಂದ ದೀಪ್ತಿ ಶರ್ಮ, 5ನೇ ಕ್ರಮಾಂಕದಲ್ಲಿ ಆಡಳಿಲಿದ ಜೆಮಿಮಾ ರೋಡ್ರಿಗಸ್‌ ಬಿರುಸಿನ ಆಟಕ್ಕಿಳಿದರು. 4ನೇ ವಿಕೆಟಿಗೆ 129 ರನ್‌ ಹರಿದು ಬಂತು. ಲಂಕಾ ವಿರುದ್ಧ ಸಿಡಿದು ನಿಂತಿದ್ದ ಜೆಮಿಮಾ ಇಲ್ಲಿ 45 ಎಸೆತಗಳಿಂದ 75 ರನ್‌ ಬಾರಿಸಿದರು. ಈ ಪಂದ್ಯಶ್ರೇಷ್ಠ ಇನ್ನಿಂಗ್ಸ್‌ನಲ್ಲಿ 11 ಬೌಂಡರಿ ಒಳಗೊಂಡಿತ್ತು. ದೀಪ್ತಿ ಶರ್ಮ 49 ಎಸೆತ ಎದುರಿಸಿ 64 ರನ್‌ ಹೊಡೆದರು (5 ಬೌಂಡರಿ, 2 ಸಿಕ್ಸರ್‌).

ನಾಯಕಿ ಹರ್ಮನ್‌ಪ್ರೀತ್‌ ಕೌರ್‌ ಈ ಪಂದ್ಯದಿಂದ ಹೊರಗುಳಿದರು. ಸ್ಮೃತಿ ಮಂಧನಾ ತಂಡವನ್ನು ಮುನ್ನಡೆಸಿದರು. ಆದರೆ ಬ್ಯಾಟಿಂಗ್‌ಗೆ ಇಳಿಯಲಿಲ್ಲ.

ಯುಎಇ ಆಮೆಗತಿಯಾಟ
ಯುಎಇ ಎರಡು ಓವರ್‌ಗಳಲ್ಲಿ 3 ವಿಕೆಟ್‌ ಕಳೆದುಕೊಂಡು ಸಂಕಟಕ್ಕೆ ಸಿಲುಕಿತು. ತೀರ್ಥ ಸತೀಶ್‌ (1), ಇಶಾ ರೋಹಿತ್‌ ಓಜಾ (4), ನತಾಶಾ ಶೆರಿಯತ್‌ (0) ಬೇಗನೇ ಪೆವಿಲಿಯನ್‌ ಸೇರಿಕೊಂಡರು. ಆಗ ಸ್ಕೋರ್‌ಬೋರ್ಡ್‌ ಕೇವಲ 5 ರನ್‌ ದಾಖಲಿಸುತ್ತಿತ್ತು.

ಮುಂದಿನದು ಕವಿಶಾ ಮತ್ತು ಖುಷಿ ಶರ್ಮ ಅವರ ಆಮೆಗತಿಯ ಆಟ. 15.1 ಓವರ್‌ ನಿಭಾಯಿಸಿದ ಇವರು ಒಟ್ಟುಗೂಡಿಸಿದ್ದು 58 ರನ್‌ ಮಾತ್ರ!

ಸಂಕ್ಷಿಪ್ತ ಸ್ಕೋರ್‌: ಭಾರತ-5 ವಿಕೆಟಿಗೆ 178 (ಜೆಮಿಮಾ ಔಟಾಗದೆ 75, ದೀಪ್ತಿ 64). ಯುಎಇ-4 ವಿಕೆಟಿಗೆ 74 (ಕವಿಶಾ ಔಟಾಗದೆ 30, ಖುಷಿ 29, ರಾಜೇಶ್ವರಿ 29ಕ್ಕೆ 2).

ಪಂದ್ಯಶ್ರೇಷ್ಠ: ಜೆಮಿಮಾ ರೋಡ್ರಿಗಸ್‌.