ಲಾರಿ-ವ್ಯಾನ್ ಡಿಕ್ಕಿ : ಯೋಧ ಸೇರಿ ಮೂವರ ದುರ್ಮರಣ  

ಬಿಹಾರ: ಟ್ರಕ್ ಹಾಗೂ ಪಿಕಪ್ ವ್ಯಾನ್ ನಡುವೆ ಅಪಘಾತ ಸಂಭವಿಸಿ ಓರ್ವ ಯೋಧ ಸೇರಿ ಮೂವರು ಸಾವನ್ನಪ್ಪಿರುವ ‍ಘಟನೆ ಬಿಹಾರಿನ ಕತಿಹಾರ್ ಜಿಲ್ಲೆಯಲ್ಲಿ ಭಾನುವಾರ ನಡೆದಿದೆ.

ಇಂದು ಮುಂಜಾನೆ 5 ಗಂಟೆಗೆ ಈ ಅಪಘಾತ ಜರುಗಿದ್ದು,ಕತಿಹಾರ್ ಜಿಲ್ಲೆಯ ಪೊತೈ ಔಟ್‍ಪೋಸ್ಟ್ ಏರಿಯಾ ಸಮೀಪ ರಾಷ್ಟ್ರೀಯ ಹೆದ್ದಾರಿ 31ರ ಬಳಿ ನಿಲ್ಲಿಸಲಾಗಿದ್ದ ಲಾರಿಗೆ ವ್ಯಾನ್ ಡಿಕ್ಕಿ ಹೊಡೆದಿದೆ ಎಂದು ಹೆಚ್ಚುವರಿ ಇನ್ಸ್ಪೆಕ್ಟರ್ ಸಂಜಯ್ ಸಿಂಗ್ ಮಾಧ್ಯಮಗಳಿಗೆ ಹೇಳಿದ್ದಾರೆ.

ವ್ಯಾನ್ ಡ್ರೈವರ್ ಅಬ್ದುಲ್ ಹಮೀದ್ (ವ.50) ಹಾಗೂ ರಾಕೇಶ್ ಪಂಡಿತ್ (ವ.22) ಸ್ಥಳದಲ್ಲಿಯೇ ಅಸುನೀಗಿದ್ದಾರೆ. ಗಂಭೀರವಾಗಿ ಗಾಯಗೊಂಡಿದ್ದ 28 ವರ್ಷ ವಯಸ್ಸಿನ ಯೋಧ ಆದರ್ಶ್ ಕುಮಾರ್ ಆಸ್ಪತ್ರೆಗೆ ಸಾಗಿಸುವ ಮಾರ್ಗಮಧ್ಯದಲ್ಲಿ ಸಾವನ್ನಪ್ಪಿರುವುದಾಗಿ ಪೊಲೀಸ್ ಅಧಿಕಾರಿಗಳು ತಿಳಿಸಿದ್ದಾರೆ.

ಪಂಡಿತ್ ಹಾಗೂ ಆದರ್ಶ್ ಬೆಗುಸರೈ ಜಿಲ್ಲೆಯವರು, ಹಾಗೂ ಹಮೀದ್ ಹಮೀರ್ಪುರ ನಿವಾಸಿ ಎಂದು ತಿಳಿದು ಬಂದಿದೆ. ಮೃತ ಯೋಧ ಆದರ್ಶ ಪಶ್ಚಿಮ ಬಂಗಾಳದ ಜಲ್ಪೈಗುರಿ ಎಂಬಲ್ಲಿ ಕಾರ್ಯನಿರ್ವಹಿಸುತ್ತಿದ್ದ. ರಜೆ ನಿಮಿತ್ತ ತವರಿಗೆ ಆಗಮಿಸುವ ಸಲುವಾಗಿ  ಬಾಡಿಗೆ ವ್ಯಾನ್ ಪಡೆದಿದ್ದ ಎಂದು ತಿಳಿದು ಬಂದಿದೆ.