ಲಡಾಖ್ ಆಯ್ತು ಈಗ ಭಾರತ-ಪಾಕ್ ಅಂತಾರಾಷ್ಟ್ರೀಯ ಗಡಿಗೆ ಸೇನಾ ವರಿಷ್ಠ ನರಾವಣೆ ಭೇಟಿ

ನವದೆಹಲಿ:ಭಾರತ, ಚೀನಾ ನಡುವಿನ ಲಡಾಖ್ ಗಡಿ ಪ್ರದೇಶದ ವಿವಾದ ತಣ್ಣಗಾಗುತ್ತಿದ್ದರೆ, ಮತ್ತೊಂದೆಡೆ ಭಾರತದ ಸೇನಾ ಮುಖ್ಯಸ್ಥ ಎಂಎಂ ನರಾವಣೆ ಅವರು ಸೋಮವಾರ ಭಾರತ್- ಪಾಕ್ ನ ಸುಮಾರು 198 ಕಿಲೋ ಮೀಟರ್ ದೂರದ ಅಂತರಾಷ್ಟ್ರೀಯ ಗಡಿ ಪ್ರದೇಶಕ್ಕೆ ಭೇಟಿ ನೀಡಿ ಭದ್ರತೆಯನ್ನು ಪರಿಶೀಲಸಿರುವುದಾಗಿ ವರದಿ ತಿಳಿಸಿದೆ.

ಸೇನಾ ವರಿಷ್ಠ ನರಾವಣೆ ಅವರು ಮೊದಲು ಜಮ್ಮು ವಿಮಾನ ನಿಲ್ದಾಣಕ್ಕೆ ಆಗಮಿಸಿದ್ದರು. ನಂತರ ಹೆಲಿಕಾಪ್ಟರ್ ನಲ್ಲಿ ಟೈಗರ್ ಡಿವಿಷನ್ ಗೆ ಭೇಟಿ ನೀಡಿ ಭದ್ರತೆಯ ಹಾಗೂ ಸೇನಾ ಕಾರ್ಯಾಚರಣೆಯ ಸಿದ್ಧತೆಗಳ ಪರಿಶೀಲನೆ ನಡೆಸಿದ್ದರು ಎಂದು ಹಿರಿಯ ಸೇನಾ ಅಧಿಕಾರಿ ತಿಳಿಸಿದ್ದಾರೆ.

ಭಾರತದ ಜಮ್ಮು ಪ್ರದೇಶದ ಅಂತಾರಾಷ್ಟ್ರೀಯ ಗಡಿಯಲ್ಲಿ ಬಿಎಸ್ ಎಫ್ ಹಾಗೂ ಪಾಕಿಸ್ತಾನ ಕಡೆ ಪಾಕಿಸ್ತಾನಿ ರೇಂಜರ್ಸ್ ಕಾರ್ಯನಿರ್ವಹಿಸುತ್ತಿದ್ದಾರೆ. ಇತ್ತೀಚೆಗಷ್ಟೇ ಅಂತಾರಾಷ್ಟ್ರೀಯ ಗಡಿ ಭಾಗದಲ್ಲಿ ಆರು ಸೇತುವೆಗಳನ್ನು ನಿರ್ಮಿಸಿತ್ತು. ಇದರಲ್ಲಿ ಕಥುವಾ ಜಿಲ್ಲೆಯ ಹೀರಾನಗರದ ಟರ್ರಾನ್ ನಲ್ಲಿ ಎರಡು, ಅಕ್ನೂರ್-ಪಲ್ಲಾನ್ ವಾಲಾ ಸೆಕ್ಟರ್ ನಲ್ಲಿ ನಾಲ್ಕು ಸೇತುವೆಯನ್ನು ಭಾರತ ನಿರ್ಮಿಸಿದ್ದು, ರಾಜ್ ನಾಥ್ ಸಿಂಗ್ ಉದ್ಘಾಟಿಸಿದ್ದರು.