ಜನರಲ್ ಬಿಪಿನ್ ರಾವತ್ ಗೆ ದೇಶದ ಮೂರು ಸೇನೆಗಳ ಪ್ರಥಮ ಮಹಾದಂಡನಾಯಕ ಪಟ್ಟ: ವರದಿ

ನವದೆಹಲಿ: ದೇಶದ ಮೂರು ರಕ್ಷಣಾ ಪಡೆಗಳ ಪ್ರಥಮ ಮಹಾದಂಡನಾಯಕರನ್ನಾಗಿ ಭಾರತೀಯ ಸೇನಾ ಮುಖ್ಯಸ್ಥ ಜನರಲ್ ಬಿಪಿನ್ ರಾವತ್ ಅವರನ್ನು ನೇಮಕ ಮಾಡಲಾಗಿದೆ ಎಂದು ರಕ್ಷಣಾ ಮೂಲಗಳು ತಿಳಿಸಿರುವುದಾಗಿ ಆಂಗ್ಲಮಾಧ್ಯಮಗಳು ವರದಿ ಮಾಡಿವೆ. ಈ ಬಗ್ಗೆ ಅಧಿಕೃತ ಘೋಷಣೆಯನ್ನು ನಿರೀಕ್ಷಿಸಲಾಗುತ್ತಿದೆ ಎಂದು ವರದಿ ಹೇಳಿದೆ.

ಭಾರತೀಯ ಸೇನಾಪಡೆಯ ಮುಖ್ಯಸ್ಥರಾಗಿ ಬಿಪಿನ್ ರಾವತ್ ಅವರು ಮೂರು ವರ್ಷಗಳ ಸೇವಾವಧಿಯನ್ನು ಪೂರ್ಣಗೊಳಿಸಿದ್ದು, ಇದೀಗ ಸೇವೆಯಿಂದ ನಿವೃತ್ತಿಗೊಳ್ಳಲು ಒಂದು ದಿನ ಇರುವ ಮುನ್ನ ಜನರಲ್ ರಾವತ್ ಅವರನ್ನು ಸೇನಾಮಹಾದಂಡನಾಯಕನನ್ನಾಗಿ ನೇಮಕ ಮಾಡಲಾಗಿದೆ ಎಂದು ವರದಿ ತಿಳಿಸಿದೆ.

ಡಿಸೆಂಬರ್ 24ರಂದು ಪ್ರಧಾನಿ ನರೇಂದ್ರ ಮೋದಿ ನೇತೃತ್ವದಲ್ಲಿ ನಡೆದ ಕೇಂದ್ರ ಸಂಪುಟ ಸಭೆಯಲ್ಲಿ ಸಿಡಿಎಸ್ (ಸೇನಾಮಹಾದಂಡನಾಯಕ) ಹುದ್ದೆ ಹಾಗೂ ಇದರ ಕರ್ತವ್ಯಗಳ ನಿರ್ಣಯಕ್ಕೆ ಅನುಮತಿ ನೀಡಲಾಗಿದೆ ಎಂದು ವರದಿ ವಿವರಿಸಿದೆ.

ಮೂರು ಸೇನೆಗಳ ವಿಷಯಗಳ ಸೇನಾ ಮುಖ್ಯ ಸಲಹೆಗಾರರಾಗಿ ಸಿಡಿಎಸ್ (ಸೇನಾಮಹಾದಂಡನಾಯಕ) ಕಾರ್ಯನಿರ್ವಹಿಸಲಿದ್ದಾರೆ. ತಮ್ಮ ಪಡೆಗಳ ಪ್ರಮುಖ ವಿಷಯಗಳ ಬಗ್ಗೆ ಮೂರು ಸೇನಾ ವರಿಷ್ಠರು ರಕ್ಷಣಾ ಸಚಿವರ ಜತೆ ಸಲಹೆಯನ್ನು ಪಡೆಯುವುದು ಮುಂದುವರಿಯಲಿದೆ ಎಂದು ವರದಿ ತಿಳಿಸಿದೆ.