ಅರಕೇರಾ ಕೆ. ಗ್ರಾಮಕ್ಕೆ ಜಿಪಂ ಸಿಇಒ ಭೇಟಿ

ಸುರಪುರ: ತಾಲೂಕಿನ ಅರಕೇರಾ ಗ್ರಾಮಕ್ಕೆ ಜಿಲ್ಲಾ ಪಂಚಾಯತ ಮುಖ್ಯ ಕಾರ್ಯ ನಿರ್ವಾಹಕ ಅಕಾರಿ ಶಿಲ್ಪಾ ಶರ್ಮಾ ಬುಧವಾರ ಬೇಟಿ ನೀಡಿದರು.

ಕೋವಿಡ್‌ ಲಸಿಕೆ ಹಾಕಿಕೊಳ್ಳಲು ಹಿಂಜರಿಯುತ್ತಿದ್ದ ಜನರ ಮನವೊಲಿಸಿ ಲಸಿಕೆ ಹಾಕಿಸಿದರು. ಲಸಿಕಾ ಮೇಳದ ಅಂಗವಾಗಿ ಜಿಲ್ಲಾ ಪಂಚಾಯಿತಿ ಮುಖ್ಯ ಕಾರ್ಯನಿರ್ವಾಣಾಕಾರಿ ಶಿಲ್ಪಾ ಶರ್ಮಾ ತಾಲೂಕಿನ ವಿವಿಧ ಗ್ರಾಮಗಳಿಗೆ ಖುದ್ದು ಭೇಟಿ ನೀಡಿ ಲಸಿಕೆಯಿಂದ ಹೊರ ಗುಳಿದಿದ್ದ ಜನರ ಮನವೊಲಿಸಿ ಲಸಿಕೆ ಹಾಕಿಸಿಕೊಳ್ಳುವಂತೆ ತಿಳಿ ಹೇಳಿದರು.

ಅಧಿಕಾರಿಯ ಮಾತಿಗೆ ಗೌರವ ನೀಡಿದ ಜನರು ಲಸಿಕೆ ಹಾಕಿಸಿಕೊಂಡರು. ತಾಲೂಕು ಪಂಚಾಯಿತಿ ಕಾರ್ಯ ನಿರ್ವಾಹಕ ಅಧಿಕಾರಿ ಅಮರೇಶ, ಗ್ರಾಪಂ ಪಿಡಿಒ, ಆರೋಗ್ಯ ಇಲಾಖೆ ಯವರು, ಅಂಗನವಾಡಿ ಮತ್ತು ಆಶಾ ಕಾರ್ಯಕರ್ತೆಯರು ಗ್ರಾಮದ ಮನೆ ಮನೆಗೂ ಭೇಟಿ ನೀಡಿ ಲಸಿಕೆ ಹಾಕಿದರು. ಲಸಿಕೆ ಹಾಕಿಕೊಳ್ಳುವುದಿಲ್ಲ ಎಂದು ಹೇಳುತ್ತಿದ್ದ ಕೆಲ ಮಹಿಳೆ ಮತ್ತು ಪುರಷರಿಗೂ ಲಸಿಕೆ ಮಹತ್ವ ತಿಳಿಸಿ ಲಸಿಕೆ ಹಾಕಲಾಯಿತು. ಅಧಿಕಾರಿಗಳು ಮತ್ತು ಸಿಬ್ಬಂದಿ ಜನರಿಗೆ ತಿಳಿ ಹೇಳಿ ಅವರ ಮನಸ್ಸು ಪರಿವರ್ತಿಸಿ ಕೊನೆಗೂ ಲಸಿಕೆ ಹಾಕುವಲ್ಲಿ ಯಶಿಸ್ವಿಯಾದರು. ಈ ವೇಳೆ ಗ್ರಾಮ ಪಂಚಾಯಿತಿ ಸದಸ್ಯರು ಮತ್ತು ಗ್ರಾಮದ ಮುಖಂಡರು ಇದ್ದರು.