ಪ್ರಭಾಸ್‌ ‘ಸಾಹೂ’ಚಿತ್ರದಿಂದ ಅನುಷ್ಕಾ ಶೆಟ್ಟಿ ಔಟ್‌!: ಕಾರಣವೇನು?

ಹೈದರಾಬಾದ್‌ : ಬಾಹುಬಲಿ-2  ಖ್ಯಾತಿಯ ಸೂಪರ್‌ ಜೋಡಿ  ಪ್ರಭಾಸ್‌, ಅನುಷ್ಕಾ ಶೆಟ್ಟಿ ‘ಸಾಹೂ’ ಎನ್ನುವ ಚಿತ್ರದಲ್ಲಿ ಮತ್ತೆ ಜೊತೆಯಾಗಲಿದ್ದಾರೆ ಎನ್ನುವ ಸುದ್ದಿ ನೀವೆಲ್ಲ ಕೇಳಿದ್ದೀರಿ.ಅಭಿಮಾನಿಗಳಿಗೆ ತೀವ್ರ ನಿರಾಸೆಯಾಗುವ ಸುದ್ದಿಯೊಂದು ಕೇಳಿ ಬಂದಿದ್ದು, ಅದು ಅನುಷ್ಕಾ ಶೆಟ್ಟಿ ಸಾಹೂ ಚಿತ್ರದಿಂದ ಹೊರ ಬಿದ್ದಿದ್ದಾರೆ ಎನ್ನುವುದು. 

ಪಾತ್ರಕ್ಕೆ ಅಗತ್ಯವಿರುವುದಕ್ಕಿಂದ ಹೆಚ್ಚು ತೂಕ ಹೊಂದಿರುವ ಅನುಷ್ಕಾ ಪಾತ್ರಕ್ಕೆ ಸರಿಯಾಗುತ್ತಿಲ್ಲ ಎನ್ನುವ ಕಾರಣದಿಂದ ಅವರನ್ನು ಚಿತ್ರದಿಂದ ಕೈಬಿಡಲಾಗಿದೆ ಎಂದು ವರದಿಯಾಗಿದೆ.

ಯೋಗ ಪಟುವಾಗಿರುವ ಅನುಷ್ಕಾ ಪಾತ್ರಕ್ಕಾಗಿ ತೂಕ ಕಳೆದುಕೊಳ್ಳಲು ಯತ್ನಿಸಿದರಾದರೂ 5 ರಿಂದ 8 ಕೆ.ಜಿ ಹೆಚ್ಚು ತೂಕ ಹೊಂದಿದ್ದಾರೆ ಎನ್ನಲಾಗಿದೆ. 

ಇದೀಗ ಚಿತ್ರತಂಡ ಅನುಷ್ಕಾ ಜಾಗಕ್ಕೆ ಬೇರೆ ನಟಿಯನ್ನು ಆಯ್ಕೆ ಮಾಡುವಲ್ಲಿ ನಿರತವಾಗಿದ್ದು, ದೊಡ್ಡ ಸವಾಲಾಗಿ ಪರಿಣಮಿಸಿದೆ. ಸುಜಿತ್‌ ನಿರ್ದೇಶನದ ಚಿತ್ರ ಹಿಂದಿ, ತಮಿಳು, ತೆಲುಗು ಮತ್ತು ಮಲಯಾಳಂ ಭಾಷೆಯಲ್ಲಿ 2018 ರ ವರ್ಷಾರಂಭದಲ್ಲಿ ಬಿಡುಗಡೆಯಾಗುವ ಸಾಧ್ಯತೆಗಳಿವೆ. 

ಒಟ್ಟಿನಲ್ಲಿ ಚಿತ್ರರಂಗದ ಸಾರ್ವಕಾಲಿಕ ಹಿಟ್‌ ಚಿತ್ರದಲ್ಲಿ ನಾಯಕಿಯಾಗಿ ಕಾಣಿಸಿಕೊಂಡಿದ್ದ ಅನುಷ್ಕಾಗೆ ದೇಹತೂಕ ಇಳಿಸಿಕೊಳ್ಳುವುದು ಇದೀಗ ಸವಾಲಾಗಿದೆ.