ಹಾವೇರಿಯ ಸವಣೂರಿನ ಮತ್ತೋರ್ವನಿಗೆ ಕೋವಿಡ್-19 ಸೋಂಕು ಪತ್ತೆ

ಹಾವೇರಿ: ಜಿಲ್ಲೆಯಲ್ಲಿ ಮಂಗಳವಾರ ಇನ್ನೊಂದು ಕೋವಿಡ್-19 ಪಾಸಿಟಿವ್ ಪ್ರಕರಣ ಪತ್ತೆಯಾಗಿದೆ. ಸೋಮವಾರವಷ್ಟೇ ಮೊದಲ ಕೋವಿಡ್-19 ಸೋಂಕು ಪತ್ತೆಯಾಗಿತ್ತು. ಈಗ ಜಿಲ್ಲೆಯಲ್ಲಿ ಎರಡು ಕೋವಿಡ್ ಪಾಸಿಟಿವ್ ಪ್ರಕರಣ ಪತ್ತೆಯಾದಂತಾಗಿದೆ.

ಕೊವಿಡ್-19 ಸೋಂಕಿತ 40 ವರ್ಷದ ಈ ವ್ಯಕ್ತಿ ಪಿ-639ರ ಸಹೋದರನಾಗಿದ್ದು ಈತ ಪಿ-639 ನೊಂದಿಗೆ ಮುಂಬಯಿಯಿಂದ ಸವಣೂರಿಗೆ ಲಾರಿಯಲ್ಲಿ ಬಂದಿದ್ದನು. ಇಬ್ಬರು ಒಂದೇ ಮನೆಯವರಾಗಿದ್ದಾರೆ. ಈತನನ್ನು ಈಗ 672ನೇ ಸೋಂಕಿತ ಎಂದು ಗುರುತಿಸಲಾಗಿದೆ.

ಮುಂಬಯಿಯಲ್ಲಿ ಗಾರೆ ಕೆಲಸ ಮಾಡುವ ಈತ ಪಿ-639ನೊಂದಿಗೆ ಲಾರಿಯಲ್ಲಿ ಏಪ್ರಿಲ್ 24ರ ರಾತ್ರಿ ೧೧ ಗಂಟೆಗೆ ಸವಣೂರಿಗೆ ಬಂದಿದ್ದನು. ಸೋಮವಾರ ಬಂದ ಈತನ ರಕ್ತ ಮತ್ತು ಗಂಟಲು ಮಾದರಿಯ ಪ್ರಥಮ ಪರೀಕ್ಷಾ ವರದಿ ಪಾಸಿಟಿವ್ ಆಗಿತ್ತು. ಇನ್ನೊಮ್ಮೆ ಅದನ್ನು ಮರು ಪರೀಕ್ಷೆಗೆ ಕಳುಹಿಸಲಾಗಿತ್ತು. ಈಗ ಎರಡನೇ ವರದಿಯಲ್ಲಿಯೂ ಕೋವಿಡ್-19 ಪಾಸಿಟಿವ್ ಬಂದಿದೆ