IPL 2024; ನಮ್ಮ ಜ್ಞಾನಕ್ಕೆ ಮಾಡಿದ ಅಪಮಾನ..: ವಿರಾಟ್ ವಿರುದ್ಧ ಸಿಟ್ಟಾದ ಸುನೀಲ್ ಗಾವಸ್ಕರ್

ಬೆಂಗಳೂರು: ಆರ್ ಸಿಬಿ ಆಟಗಾರ ವಿರಾಟ್ ಕೊಹ್ಲಿ ಮತ್ತು ಮಾಜಿ ಆಟಗಾರ ಸುನೀಲ್ ಗಾವಸ್ಕರ್ ನಡುವಿನ ಮಾತಿನ ಚಕಮಕಿ ಮುಂದುವರಿದಿದೆ. ಕೆಲ ದಿನಗಳ ಹಿಂದೆ ‘ಬಾಕ್ಸ್ ನಲ್ಲಿ ಕುಳಿತು ಮಾತನಾಡುವವರಿಗೆ ಏನು ಗೊತ್ತು’ ಎಂಬ ವಿರಾಟ್ ಹೇಳಿಕೆಗೆ ಸುನೀಲ್ ಗಾವಸ್ಕರ್ ಗರಂ ಆಗಿದ್ದು, ಕಟು ಮಾತುಗಳಲ್ಲಿ ವಿರಾಟ್ ಕೊಹ್ಲಿಯನ್ನು ಟೀಕೆ ಮಾಡಿದ್ದಾರೆ.

ಅಹಮದಾಬಾದ್ ನಲ್ಲಿ ನಡೆದ ಪಂದ್ಯದ ಬಳಿಕ ವಿರಾಟ್ ಕೊಹ್ಲಿ ಅವರು ತನ್ನ ಸ್ಟ್ರೈಕ್ ರೇಟ್ ಬಗ್ಗೆ ಮಾತನಾಡುವವರ ವಿರುದ್ಧ ಮಾತನಾಡಿದ್ದರು. “ಸ್ಟ್ರೈಕ್-ರೇಟ್‌ ಗಳ ಬಗ್ಗೆ ಮತ್ತು ನಾನು ಸ್ಪಿನ್ ಚೆನ್ನಾಗಿ ಆಡುತ್ತಿಲ್ಲ ಎನ್ನುವ ಬಗ್ಗೆ ಜನರು ಮಾತನಾಡುತ್ತಾರೆ. ಆದರೆ ನನಗೆ, ತಂಡಕ್ಕಾಗಿ ಪಂದ್ಯಗಳನ್ನು ಗೆಲ್ಲುವುದು ಮುಖ್ಯ.  15 ವರ್ಷಗಳಿಂದ ಇದನ್ನೇ ಮಾಡುತ್ತಿದ್ದೇನೆ. ನೀವು ಈ ಪರಿಸ್ಥಿಯಿಲ್ಲಿ ಇರದಿದ್ದರೆ ನೀವು ಬಾಕ್ಸ್ ನಲ್ಲಿ ಕುಳಿತು ಮಾತನಾಡಲು ಆಗದು. ಜನರು ಕುಳಿತು ಅವರ ಅಂದಾಜಿನಲ್ಲಿ ಮಾತನಾಡುತ್ತಾರೆ. ಆದರೆ ಪ್ರತಿದಿನ ಮೈದನಾದಲ್ಲಿ ಆಡುತ್ತಿರುವವರಿಗೆ ಮಾತ್ರ ಇಲ್ಲಿ ಏನಾಗುತ್ತಿದೆ ಎನ್ನುವುದು ಗೊತ್ತಿದೆ” ಎಂದು ಹೇಳಿದ್ದರು.

ಸುನಿಲ್ ಗಾವಸ್ಕರ್ ಶನಿವಾರ ಆರ್ ಸಿಬಿ – ಜಿಟಿ ಪಂದ್ಯದ ಮೊದಲು ಸಂದರ್ಶನವನ್ನು ಉಲ್ಲೇಖಿಸಿದರು, ಅದನ್ನು ಪದೇ ಪದೇ ತೋರಿಸುತ್ತಿದ್ದಂತೆ ಕಟುವಾದ ದಾಳಿ ನಡೆಸಿದರು. ಇಂತಹ ಹೇಳಿಗಳು ಐಪಿಎಲ್ ನಲ್ಲಿ ತಜ್ಞರಂತೆ ಕೆಲಸ ಮಾಡುತ್ತಿರುವ ಮಾಜಿ ಕ್ರಿಕೆಟಿಗರ ಜ್ಞಾನಕ್ಕೆ ನೇರವಾದ ಅವಮಾನ ಎಂದು ಅವರ ಅಭಿಪ್ರಾಯಪಟ್ಟಿದೆ.

“ಅವರ ಸ್ಟ್ರೈಕ್ ರೇಟ್ 118 ಆಗಿದ್ದಾಗ ಮಾತ್ರ ಕಾಮೇಂಟೇಟರ್ಸ್ ಪ್ರಶ್ನಿಸಿದ್ದಾರೆ. ನನಗೆ ತುಂಬಾ ಖಚಿತವಿಲ್ಲ. ನಾನು ಹೆಚ್ಚು ಪಂದ್ಯಗಳನ್ನು ನೋಡುವುದಿಲ್ಲ, ಹಾಗಾಗಿ ಇತರ ಕಾಮೆಂಟೇಟರ್‌ ಗಳು ಏನು ಹೇಳಿದ್ದಾರೆಂದು ನನಗೆ ತಿಳಿದಿಲ್ಲ. ಆದರೆ ನೀವು ಆರಂಭಿಕರಾಗಿ ಬಂದು ನೀವು 14ನೇ ಅಥವಾ 15ನೇ ಓವರ್‌ನಲ್ಲಿ ಔಟಾದಾಗ 118 ಗಳ ಸ್ಟ್ರೈಕ್ ನಲ್ಲಿ ರನ್ ಗಳಿಸಿದಾಗಲೂ ನಿಮ್ಮನ್ನು ಹೊಗಳಬೇಕು ಎಂದರೆ ಅದು ವಿಚಿತ್ರ” ಎಂದು ಗಾವಸ್ಕರ್ ಸ್ಟಾರ್ ಸ್ಪೋರ್ಟ್ಸ್‌ನಲ್ಲಿ ಹೇಳಿದರು.

” ನಮಗೆ ಹೊರಗಿನ ಮಾತುಗಳ ಬಗ್ಗೆ ಕಾಳಜಿ ಇಲ್ಲ ಎಂದು ಈ ಹುಡುಗರೆಲ್ಲ ಮಾತನಾಡುತ್ತಾರೆ. ಹೌದಾ! ಹಾಗಾದರೆ ನೀವು ಯಾವುದೇ ಹೊರಗಿನ ಟೀಕೆಗಳಿಗೆ ಯಾಕೆ ಉತ್ತರಿಸುತ್ತಿದ್ದೀರಿ. ನಾವೆಲ್ಲರೂ ಬಹಳಷ್ಟು ಅಲ್ಲದಿದ್ದರೂ ಕ್ರಿಕೆಟ್ ಆಡಿದ್ದೇವೆ. ನಮಗೆ ಯಾವುದೇ ಅಜೆಂಡಾಗಳಿಲ್ಲ. ನಾವು ನೋಡುವ ವಿಷಯಗಳ ಬಗ್ಗೆ ನಾವು ಮಾತನಾಡುತ್ತೇವೆ, ನಮಗೆ ನಮ್ಮ ಇಷ್ಟಗಳು ಮತ್ತು ಇಷ್ಟವಿಲ್ಲದಿದ್ದರೂ ಸಹ, ನಾವು ವಾಸ್ತವವಾಗಿ ಏನು ನಡೆಯುತ್ತಿದೆ ಎಂಬುದರ ಕುರಿತು ಮಾತನಾಡುತ್ತೇವೆ” ಎಂದು ವಿರಾಟ್ ಹೆಸರು ಹೇಳದೆ ಟೀಕೆ ಮಾಡಿದರು.