ಪ್ಲಾಸ್ಟಿಕ್‌ ಬಳಸಿ ಅಂಗನವಾಡಿ ನಿರ್ಮಿಸಲು ಅಸ್ಸಾಂ ಜಿಲ್ಲಾಡಳಿತ ನಿರ್ಧಾರ

ಹೈಲಾಕಂಡಿ: ಅಸ್ಸಾಂನ ಹೈಲಾಕಂಡಿ ಜಿಲ್ಲಾ ಕೇಂದ್ರದಲ್ಲಿ ಸದ್ಯದಲ್ಲೇ ನಿರ್ಮಾಣವಾಗಲಿರುವ ಅಂಗನವಾಡಿ ಕೇಂದ್ರಕ್ಕೆ ಪ್ಲಾಸ್ಟಿಕ್‌ ಹಾಗೂ ಜೈವಿಕವಾಗಿ ವಿಘಟನೀಯವಾಗದ ಸಾಮಗ್ರಿಗಳನ್ನು ಬಳಸಲಾಗುತ್ತದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ. ನಗರದ ಲಾಲಾ ಬ್ಲಾಕ್‌ನಲ್ಲಿರುವ ಸಿಂಘಲ್ಲಾ ಪ್ರಾಂತ್ಯದಲ್ಲಿ ಈ ಕಟ್ಟಡವನ್ನು ಜಿಲ್ಲಾಡಳಿತದ ವತಿಯಿಂದ 3.36 ಲಕ್ಷ ರೂ.ಗಳ ವೆಚ್ಚದಲ್ಲಿ ನಿರ್ಮಿಸಲಾಗುತ್ತದೆ ಎಂದು ಹೈಲಾಕಂಡಿಯ ಹೆಚ್ಚುವರಿ ಜಿಲ್ಲಾಧಿಕಾರಿ ಆರ್‌.ಕೆ. ದಾಮ್‌ ತಿಳಿಸಿದ್ದಾರೆ.

ಈ ಯೋಜನೆಗೆ ಯುಎನ್‌ಡಿಪಿ, ರಾಜ್ಯ ಶಿಕ್ಷಣ ಇಲಾಖೆ, ಸಮಾಜ ಕಲ್ಯಾಣ ಇಲಾಖೆ ಹಾಗೂ ಲೋಕೋಪಯೋಗಿ ಇಲಾಖೆಗಳೂ ಕೈ ಜೋಡಿಸಲಿವೆ ಎಂದು ಅವರು ತಿಳಿಸಿದ್ದಾರೆ. ಪ್ಲಾಸ್ಟಿಕ್‌ ಹಾಗೂ ನಾನ್‌-ಬಯೋಡೀಗ್ರೇಡಬಲ್‌ ಸಾಮಗ್ರಿಗಳನ್ನು ಬಳಸಿ ಮೊದಲಿಗೆ ಪರಿಸರ ಸ್ನೇಹಿ ಇಟ್ಟಿಗೆಗಳನ್ನು ತಯಾರಿಸಲಾಗುತ್ತದೆ. ಇವುಗಳ ಜೋಡಣೆ ಹಾಗೂ ಅವುಗಳ ಮೇಲೆ ಮೆತ್ತಲು ದ್ರವರೂಪದ ಸಿಮೆಂಟ್‌ ಬಳಸಲಾಗುತ್ತದೆ. ಇದೊಂದು ವಿಭಿನ್ನ ತಂತ್ರಜ್ಞಾನವಾಗಿದ್ದು, ಇದರಿಂದ ತಯಾರಾಗುವ ಕಟ್ಟಡ ಭೂಕಂಪವಾದರೂ ಹಾನಿಯಾಗದ ಸಾಮರ್ಥ್ಯ ಹೊಂದಿರಲಿದೆ ಎಂದು ದಾಮ್‌ ವಿವರಿಸಿದ್ದಾರೆ.