ಮೈಸೂರು: ಮಹತ್ತರವಾದ ಕೆಲಸಗಳನ್ನೂ ಮಾಡಿಯೂ ತೆರೆಯಮರೆಯಲ್ಲೇ ಉಳಿದುಬಿಡುತ್ತಿದ್ದುದು ಅನಂತಕುಮಾರ್‌ ಕಾರ್ಯವೈಖರಿಯಾಗಿತ್ತು ಎಂದು ಕಾದಂಬದಿಕಾರ ಡಾ.ಎಸ್‌.ಎಲ್‌.ಭೈರಪ್ಪ ಸ್ಮರಿಸಿದರು. ನಗರದ ಶಾರದಾವಿಲಾಸ ಕಾಲೇಜು ಶತಮಾನೋತ್ಸವ ಭವನದಲ್ಲಿ ಗುರುವಾರ ಏರ್ಪಡಿಸಿದ್ದ ಕೇಂದ್ರ ಸಚಿವ ಅನಂತಕುಮಾರ್‌ ಭಾವಪೂರ್ಣ ಶ್ರದ್ಧಾಂಜಲಿ ಕಾರ್ಯಕ್ರಮದಲ್ಲಿ ಅವರು ನುಡಿನಮನ ಸಲ್ಲಿಸಿದರು.
ಭಾರತೀಯ ಸ್ಟೇಟ್‌ ಬ್ಯಾಂಕ್‌ಗೆ ಬ್ಯಾಂಕ್‌ಗಳ ವಿಲೀನ ಮಾಡಿದ ಪರಿಣಾಮ ಬ್ಯಾಂಕಿಂಗ್‌ ನೇಮಕಾತಿ ಪರೀಕ್ಷೆಯಲ್ಲಿ ಹಿಂದಿ ಮತ್ತು ಇಂಗ್ಲಿಷ್‌ನಲ್ಲಿ ಮಾತ್ರ ಪ್ರಶ್ನೆಪತ್ರಿಕೆ ಇರುತ್ತಿತ್ತು. ಇದರಿಂದ ಕನ್ನಡಿಗರಿಗೆ ತೊಂದರೆಯಾಗುತ್ತದೆ ಎಂಬ ಕಾರಣಕ್ಕೆ ನಾವು ಐದಾರು ಜನ ಸಾಹಿತಿಗಳು ದೆಹಲಿಗೆ ಹೋಗಿ ಕೇಂದ್ರ ವಿತ್ತಮಂತ್ರಿ ಅರುಣ್‌ಜೇಟ್ಲಿ ಅವರಿಗೆ ಮನವಿ ಮಾಡಲು ನಿರ್ಧರಿಸಿದೆವು.
ಅದರಂತೆ ದೆಹಲಿಗೆ ಹೋಗಿ ಅನಂತ್‌ಕುಮಾರ್‌ಗೆ ದೂರವಾಣಿ ಕರೆ ಮಾಡಿ ವಿಚಾರ ತಿಳಿಸಿದಾಗ ಮರು ದಿನ ತಮ್ಮ ಮನೆಗೆ ಉಪಾಹಾರಕ್ಕೆ ಬರುವಂತೆ ಆಹ್ವಾನಿಸಿದರು. ಬೆಳಗ್ಗೆ ಅವರ ಮನೆಗೆ ಹೋದಾಗ ಗೇಟಿನವರೆಗೆ ಬಂದು ನಮ್ಮನ್ನು ಬರಮಾಡಿಕೊಂಡು, ನಮ್ಮಿಂದ ವಿಚಾರ ತಿಳಿದುಕೊಂಡು ಬೆಳಗ್ಗೆ 11.30ಕ್ಕೆ ಜೇಟ್ಲಿಯವರ ಭೇಟಿಗೆ ಸಮಯವನ್ನೂ ನಿಗದಿಮಾಡಿಕೊಟ್ಟರು.
ನಾವು ಜೇಟ್ಲಿ ಅವರ ಬಳಿಗೆ ಹೋಗುವಷ್ಟರಲ್ಲಿ ಅನಂತಕುಮಾರ್‌ ಅವರು ಜೇಟ್ಲಿಗೆ ಎಲ್ಲ ವಿಚಾರ ತಿಳಿಸಿದ್ದರಿಂದ ಕೆಲವೇ ಗಂಟೆಗಳಲ್ಲಿ ಸಮಸ್ಯೆ ಬಗೆಹರಿದು, ಆಯಾಯ ದೇಶಭಾಷೆಯಲ್ಲೇ ಬ್ಯಾಂಕಿಂಗ್‌ ಪರೀಕ್ಷೆ ನಡೆಸಬೇಕು ಎಂಬ ಆದೇಶ ಹೊರಬಿದ್ದಿತು. ಮರು ದಿನ ಪತ್ರಿಕೆಗಳಲ್ಲಿ ತಮ್ಮ ಹೆಸರು, ಫೋಟೋ ಬಂತು ಅನಂತಕುಮಾರ್‌ ಹೆಸರು ಎಲ್ಲಿಯೂ ಬರಲಿಲ್ಲ. ಅದು ಅನಂತಕುಮಾರ್‌ ಕಾರ್ಯವೈಖರಿಯಾಗಿತ್ತು ಎಂದು ನೆನೆದರು.
ಆರೆಸ್ಸೆಸ್‌ ಗುಣ: ಸದಾ ಹಸನ್ಮುಖೀಯಾಗಿರುತ್ತಿದ್ದ ಅನಂತಕುಮಾರ್‌, ಕೋಪ ಮಾಡಿಕೊಂಡಿದ್ದನ್ನು ನಾನು ಕಂಡಿಲ್ಲ. ಹುಟ್ಟಿನಿಂದಲೇ ಅವರಿಗೆ ಆ ಗುಣ ಇತ್ತು. ಆರೆಸ್ಸೆಸ್‌ ಅವರಿಗೆ ಈ ಮೂಲಭೂತ ಗುಣಗಳನ್ನು ಕಲಿಸಿತ್ತು. ಅನಂತಕುಮಾರ್‌ ಅವರಲ್ಲಿದ್ದ ಗುಣಗಳನ್ನು ಜ್ಞಾಪಿಸಿಕೊಂಡರೆ ನಾವೂ ಸ್ವಲ್ಪ ಉತ್ತಮರಾಗಬಹುದು ಎಂಬ ಕಾರಣಕ್ಕೆ ಶ್ರದ್ಧಾಂಜಲಿ ಸಭೆಗಳನ್ನು ಮಾಡುತ್ತೇವೆ. ಇನ್ನಾದರೂ ಕ್ಯಾನ್ಸರ್‌ ಗುಣವಾಗುವ ಔಷಧಿ ಬಂದು ಮಾನವ ಜನಾಂಗಕ್ಕೆ ಒಳಿತಾಗಲಿ ಎಂದು ಆಶಿಸಿದರು.
ರಾಜ್‌ ಬಿಡುಗಡೆಗೆ ನೆರವು: ಮಾಜಿ ಸಚಿವ ವಿ.ಶ್ರೀನಿವಾಸಪ್ರಸಾದ್‌ ಮಾತನಾಡಿ, ಮನುಷ್ಯನಿಗೆ ಅಧಿಕಾರ, ಅಂತಸ್ತು ಬರಬಹುದು. ಆದರೆ, ಸಾವು ಬೆನ್ನ ಹಿಂದೆಯೇ ಇರುತ್ತದೆ. ಅಟಲ್‌ ಬಿಹಾರಿ ವಾಜಪೇಯಿ ಅವರ ಸಂಪುಟದಲ್ಲಿ ಅನಂತಕುಮಾರ್‌ ವಿಮಾನಯಾನ ಖಾತೆ ಸಚಿವರಾಗಿದ್ದರು, ನಾನು ರಾಜ್ಯ ಸಚಿವನಾಗಿದ್ದೆ. ಡಾ.ರಾಜ್‌ಕುಮಾರ್‌ ಅವರನ್ನು ವೀರಪ್ಪನ್‌ ಅಪಹರಿಸಿದ್ದ ಸಂದರ್ಭದಲ್ಲಿ ಕೇಂದ್ರ ಸಚಿವ ಸಂಪುಟದಲ್ಲಿ ಆ ಬಗ್ಗೆ ಚರ್ಚೆ ನಡೆದು, ಅಂದಿನ ತಮಿಳುನಾಡು ಮುಖ್ಯಮಂತ್ರಿ ಕರುಣಾನಿಧಿ ಅವರೊಂದಿಗೆ ಮಾತನಾಡಲು ಅನಂತಕುಮಾರ್‌ಗೆ ಜವಾಬ್ದಾರಿ ನೀಡಲಾಯಿತು.
ನಾನು ಕೂಡ ಅವರೊಂದಿಗೆ ತೆರಳಿದ್ದೆ. ಅನಂತಕುಮಾರ್‌, ಡಾ.ರಾಜ್‌ ಬಿಡುಗಡೆಗೆ ಅನುಸರಿಸಬೇಕಾದ ಕ್ರಮಗಳ ಕರುಣಾನಿಧಿ ಅವರಿಗೆ ಮನವರಿಕೆ ಮಾಡಿಕೊಟ್ಟಿದ್ದರು. ಪಕ್ಷದ ಸಂಘಟನೆ ಹಾಗೂ ಜನಪ್ರತಿನಿಧಿಯಾಗಿ ಅತ್ಯಂತ ಯಶಸ್ವಿಯಾಗಿ ಜವಾಬ್ದಾರಿ ನಿರ್ವಹಿಸಿ, ಕರ್ನಾಟಕ ರಾಜ್ಯ ಹೆಮ್ಮೆಪಡುವಂತ ಸಾಧನೆ ಮಾಡಿ ಹೋಗಿದ್ದಾರೆ ಎಂದು ನೆನೆದರು. ವಿಧಾನಪರಿಷತ್‌ ಮಾಜಿ ಸದಸ್ಯ ತೋಂಟದಾರ್ಯ ಮಾತನಾಡಿ, ರಾಜ್ಯದಲ್ಲಿ ಪಕ್ಷದ ಬೆಳವಣಿಗೆಗೆ ಅನಂತಕುಮಾರ್‌,ಯಡಿಯೂರಪ್ಪ, ಈಶ್ವರಪ್ಪ ತ್ರಿಮೂರ್ತಿಗಳಂತೆ ದುಡಿದರು ಎಂದು ಸ್ಮರಿಸಿದರು.
