ವಿನಯ್‌ ರಾಜಕುಮಾರ್‌ ಅವರು ಎರಡು ಹೊಸ ಸಿನಿಮಾಗಳನ್ನು ಒಪ್ಪಿಕೊಂಡಿರೋದು ನಿಮಗೆ ಗೊತ್ತೇ ಇದೆ. “ಅಚ್ಚರಿ’ ಹಾಗೂ “ಅನಂತು ವರ್ಸಸ್‌ ನುಸ್ರತ್‌’. ಅದರಲ್ಲಿ “ಅನಂತು ವರ್ಸಸ್‌ ನುಸ್ರತ್‌’ ಚಿತ್ರಕ್ಕೆ ವರಮಹಾಲಕ್ಷ್ಮೀ ಹಬ್ಬದಂದು ಪೂಜೆ ಕೂಡಾ ಆಗಿದೆ. ಆ ಚಿತ್ರದಲ್ಲಿ ವಿನಯ್‌ ಹೇಗೆ ಕಾಣಿಸಿಕೊಳ್ಳಬಹುದು, ಅವರ ಗೆಟಪ್‌ ಹೇಗಿರಬಹುದು ಎಂಬ ಕುತೂಹಲ ಅನೇಕರಲ್ಲಿತ್ತು.
ಈಗ ಆ ಕುತೂಹಲಕ್ಕೆ ತೆರೆಬಿದ್ದಿದೆ. ವಿನಯ್‌ ರಾಜಕುಮಾರ್‌ ಸಖತ್‌ ಸ್ಟಾಂಡರ್ಡ್‌ ಲುಕ್‌ನಲ್ಲಿ ಕಾಣಿಸಿಕೊಂಡಿದ್ದು, ವಕೀಲಿಕೆಗೆ ಸಂಬಂಧಿಸಿದ ಒಂದಷ್ಟು ಪುಸ್ತಕಗಳ ಮುಂದೆ ನಿಂತು, ಕೈಯಲ್ಲೊಂದು ಪುಸ್ತಕ ಹಿಡಿದುಕೊಂಡ ಗಂಭೀರ ಲುಕ್‌ನ ಫೋಟೋವೊಂದು ಬಿಡುಗಡೆಯಾಗಿದೆ. ಈ ಮೂಲಕ ಮತ್ತೂಂದು ಕುತೂಹಲ ಹುಟ್ಟಿದೆ.
ಅದೇನೆಂದರೆ ಈ ಚಿತ್ರದಲ್ಲಿ ವಿನಯ್‌ ಲಾಯರ್‌ ಪಾತ್ರವನ್ನು ಮಾಡುತ್ತಿದ್ದಾರಾ ಎಂಬುದು. ಆದರೆ, ಸದ್ಯಕ್ಕೆ ಆ ಪ್ರಶ್ನೆಗೆ ಉತ್ತರವಿಲ್ಲ. ಈ ಚಿತ್ರವನ್ನು ಸುಧೀರ್‌ ಶಾನುಭೋಗ್‌ ನಿರ್ದೇಶಿಸುತ್ತಿದ್ದು, ಮಾಣಿಕ್ಯ ಪ್ರೊಡಕ್ಷನ್ಸ್‌ನಡಿ ಈ ಚಿತ್ರ ನಿರ್ಮಾಣವಾಗುತ್ತಿದೆ. ಸದ್ಯಕ್ಕೆ ಫೋಟೋಶೂಟ್‌ ಆಗಿದ್ದು, ನಾಯಕಿ ಸೇರಿದಂತೆ ಇತರ ಅಂಶಗಳು ಇನ್ನಷ್ಟೇ ಅಂತಿಮವಾಗಬೇಕಿದೆ. ಚಿತ್ರಕ್ಕೆ ಸುನಾದ್‌ ಗೌತಮ್‌ ಅವರ ಸಂಗೀತವಿದೆ.
ಅಂದಹಾಗೆ, ವಿನಯ ರಾಜಕುಮಾರ್‌ ಅವರ “ಅಚ್ಚರಿ’ ಹಾಗೂ “ಅನಂತು ವರ್ಸಸ್‌ ನುಸ್ರತ್‌’ ಒಟ್ಟೊಟ್ಟಿಗೆ ಅನೌನ್ಸ್‌ ಆಗಿದ್ದವು. ಆದರೆ, ಮೊದಲು “ಅನಂತು’ಗೆ ಪೂಜೆಯಾಗಿದೆ. ಸದ್ಯದಲ್ಲೇ ಚಿತ್ರೀಕರಣ ಕೂಡಾ ಆರಂಭವಾಗಲಿದೆ. ಅಂದಹಾಗೆ, “ಸಿದ್ಧಾರ್ಥ’ ಚಿತ್ರದ ಮೂಲಕ ಎಂಟ್ರಿಕೊಟ್ಟ ವಿನಯ್‌, ಆ ನಂತರ “ರನ್‌ ಆಂಟೋನಿ’ಯಲ್ಲಿ ನಟಿಸಿದ್ದಾರೆ. ಇದು ವಿನಯ್‌ ಅವರ ಮೂರನೇ ಚಿತ್ರ.
