ತಾಲ್‌ ಮೆಮೋರಿಯಲ್‌ ರಾಪಿಡ್‌ ಚೆಸ್‌ ಗೆದ್ದ ಆನಂದ್‌

ಮಾಸ್ಕೋ : ವರ್ಲ್ಡ್ ರಾಪಿಡ್‌ ಚಾಂಪ್ಯನ್‌ ವಿಶ್ವನಾಥನ್‌ ಆನಂದ್‌ ವೇಗದ ಆವೃತ್ತಿಯ ಈ ಕ್ರೀಡೆಯಲ್ಲಿ ತನ್ನ ಅತ್ಯುತ್ತಮ ನಿರ್ವಹಣೆಯನ್ನು ಮುಂದುವರಿಸಿದ್ದು ಇದೀಗ ಅರು ತಾಲ್‌ ಮೆಮೋರಿಯಲ್‌ ರಾಪಿಡ್‌ ಚೆಸ್‌ ಪ್ರಶಸ್ತಿಯನ್ನು ಗೆದ್ದುಕೊಂಡಿದ್ದಾರೆ.

ಇಸ್ರೇಲ್‌ನ ಬೋರಿಸ್‌ ಗೆಲ್‌ಫಾಂಡ್‌ ವಿರುದ್ಧದ ಫೈನಲ್‌ ರೌಂಡ್‌ನ‌ಲ್ಲಿ ಆನಂದ್‌ ಡ್ರಾ ಸಾಧಿಸುವ ಮೂಲಕ ಪ್ರಶಸ್ತಿಗೆ ಭಾಜನರಾದರು. 

ಗರಿಷ್ಠ ಸಾಧ್ಯತೆಯ 9 ಅಂಕಗಳಲ್ಲಿ ಆನಂದ್‌ 6 ಅಂಕ ಗಳಿಸಿದರು. ನಾಲ್ಕು ವಿಜಯ, ನಾಲ್ಕು ಡ್ರಾ -ಇದು ಆನಂದ್‌ ಸಾಧನೆ.

ಮೂರನೇ ಸುತ್ತಿನಲ್ಲಿ ಅಜರ್‌ಬೈಜಾನ್‌ನ ಶಕ್ರಿಯಾರ್‌ ಮ್ಯಾಮೆದ್ಯಾರೋವ್‌ ಅವರ ಕೈಯಲ್ಲಿ ಆನಂದ್‌ ಏಕೈಕ ಸೋಲು ಅನುಭವಿಸಿದ್ದರು. ಅನಂತರದಲ್ಲಿ ಆನಂದ್‌ ಅತ್ಯದ್ಭುತ ನಿರ್ವಹಣೆ ತೋರಿ ತಾಲ್‌ ಮೆಮೋರಿಯಲ್‌ ರಾಪಿಡ್‌ ಚೆಸ್‌ ವಿಜೇತರಾದರು.