ಶಾ ರ್ಯಾಲಿಯಲ್ಲಿ 3000 ಕೆಜಿ “ಖೀಚಡಿ’

ಹೊಸದಿಲ್ಲಿ: ರಾಷ್ಟ್ರ ರಾಜಧಾನಿಯ ರಾಮಲೀಲಾ ಮೈದಾನದಲ್ಲಿ ಇದೇ ರವಿವಾರ ನಡೆಯಲಿರುವ ಬಿಜೆಪಿ ರಾಷ್ಟ್ರಾಧ್ಯಕ್ಷ ಅಮಿತ್‌ ಶಾ ಅವರ ರ್ಯಾಲಿಯಲ್ಲಿ ದಲಿತರ ಮನೆಗಳಿಂದ ತರಲಾದ ಸಾಮಗ್ರಿಗಳನ್ನು ಉಪಯೋಗಿಸಿ 3,000 ಕೆ.ಜಿ.ಯಷ್ಟು ಖೀಚಡಿಯನ್ನು ತಯಾರಿಸಿ ಹಂಚಲು ನಿರ್ಧರಿಸಲಾಗಿದೆ. ಇದಕ್ಕೆ “ಸಂರಾಷ್ಟ್ರ ಖೀಚಡಿ’ ಎಂದು ಹೆಸರಿಡಲಾಗಿದ್ದು, ಇದಕ್ಕೆ ಬೇಕಾಗುವ ಅಕ್ಕಿ ಮತ್ತಿತರ ಸಾಮಗ್ರಿಗಳನ್ನು ಮೂರು ಲಕ್ಷ ದಲಿತರ ಮನೆಯಿಂದ ದೇಣಿಗೆಯ ರೂಪದಲ್ಲಿ ಸಂಗ್ರಹಿಸಲಾಗುತ್ತದೆ ಎಂದು ಹೇಳಲಾಗಿದೆ.

2019ರ ಚುನಾವಣೆಯ ಹೊತ್ತಿಗೆ ದಲಿತ ಸಮುದಾಯಗಳ ಜತೆಗಿನ ಸಂಪರ್ಕವನ್ನು ಮತ್ತಷ್ಟು ಬಲಿಷ್ಠಗೊಳಿಸಲು ನಿರ್ಧರಿಸಿರುವ ಬಿಜೆಪಿಯ ದಿಲ್ಲಿ ಘಟಕದ ಎಸ್ಸಿ ಮೋರ್ಚಾ ಈ ರ್ಯಾಲಿ ಆಯೋಜಿಸಿದೆ.

ಅಮಿತ್‌ ಶಾ ರ್ಯಾಲಿಯಲ್ಲಿ 3,000 ಕೆಜಿ ಖೀಚಡಿ ವಿತರಣೆಯಾದರೆ ಅದು ನಿಜಕ್ಕೂ ಗಿನ್ನೆಸ್‌ ದಾಖಲೆಯಾಗಲಿದೆ.