ಅಂಬರೀಶ್ ಸಾಕಿದ್ದ ಪ್ರೀತಿಯ ಕನ್ವರ್ ಇನ್ನಿಲ್ಲ..!

ಬೆಂಗಳೂರು : ರೆಬೆಲ್​ ಸ್ಟಾರ್​​ ಅಂಬರೀಶ್​ ಸಾಕಿದ್ದ ಮುದ್ದಿನ ನಾಯಿ ಕನ್ವರ್​ ಇಂದು(ಸೋಮವಾರ) ಕೊನೆಯುಸಿರೆಳೆದಿದೆ. ಕನ್ವರ್​ ಹೆಸರಿನ ಶ್ವಾನವು ಅಂಬರೀಶ್​ ಅವರ ಪ್ರೀತಿಯ ನಾಯಿ. ‘ಅಂತ’ ಸಿನಿಮಾದಲ್ಲಿ ಅಂಬರೀಶ್ ಅವರಿಗೆ ಕನ್ವರ್ ಎಂಬ ಹೆಸರನ್ನು ಇಡಲಾಗಿತ್ತು. ಇದೇ ಹೆಸರನ್ನು ಅಂಬರೀಶ್ ತಮ್ಮ ನಾಯಿಗೆ ಇಟ್ಟಿದ್ದರು. ಆಗಾಗ ಕನ್ವರ್​ ಜೊತೆ ಅಂಬರೀಶ್ ವಾಕಿಂಗ್ ಹೋಗುತ್ತಿದ್ದರು. ಇದರಿಂದ ಬಹಳ ಖುಷಿ ಕೊಡ್ತಿತ್ತಂತೆ.

ಅಂಬರೀಶ್​ ಜೊತೆ ಸಾಕಷ್ಟು ಒಡನಾಟ ಹೊಂದಿದ್ದ ಕನ್ವರ್ ನಾಯಿಯು, ಅಂಬರೀಶ್​ ಎಲ್ಲಿಗೆ ಹೋದ್ರೂ ​​ ಹಿಂಬಾಲಿಸ್ತಿತ್ತಂತೆ. ಅಂಬರೀಶ್​ ನಿಧನದ ನಂತರ ಕನ್ವರ್​ ಊಟ-ತಿಂಡಿಯನ್ನೂ ಸರಿಯಾಗಿ ಸೇವಿಸ್ತಿರಲಿಲ್ಲ. ಅಂಬರೀಶ್​ ನಂತರ ಒಬ್ಬಂಟಿಯಾಗಿತ್ತು ಕನ್ವರ್​. ಇಂದಿಗೆ ಅಂಬರೀಶ್​ ಅಗಲಿ ಸರಿಯಾಗಿ ಎರಡೂವರೆ ವರ್ಷ. ಒಡೆಯನನ್ನ ಕಳೆದುಕೊಂಡ ಎರಡೂವರೆ ವರ್ಷಕ್ಕೆ ಕನ್ವರ್​​ ಪ್ರಾಣ ಬಿಟ್ಟಿದೆ.

ಸೈಂಟ್ ಬರ್ನಾಡ್ ತಳಿಯ ಶ್ವಾನವಾಗಿದ್ದ ಕನ್ವರ್​, ಅಂಬರೀಶ್​ ಪುತ್ರ ಅಭಿಷೇಕ್​ ಅಂಬರೀಶ್​​ಗೂ ಸಿಕ್ಕಾಪಟ್ಟೆ ಇಷ್ಟವಂತೆ. ಇನ್ನು ಅಂಬಿ ಇದ್ದಾಗ, ಯಾವಾಗಲೂ ‘ಏ..ಕನ್ವರ್​ ಲಾಲ್​ ಬರೋ ಇಲ್ಲಿ’ ಅಂದ್ರೆ ಸಾಕು ಎಲ್ಲಿದ್ದರೂ ಅಂಬರೀಶ್​ ಮುಂದೆ ಪ್ರತ್ಯಕ್ಷವಾಗಿ ಬಿಡ್ತಿತ್ತು ಅನ್ನೋ ಮಾತಿದೆ. ಕನ್ವರ್​ ಹೊರತುಪಡಿಸಿ ಅಂಬರೀಶ್​ ಮನೆಯಲ್ಲಿ ‘ಬುಲ್​ಬುಲ್’​ ಅನ್ನೋ ಹೆಸರಿನ ಶ್ವಾನವೂ ಇದೆ. ಎರಡು ಶ್ವಾನಗಳಿಗೂ ತಮ್ಮ ಸಿನಿಮಾಗಳಿಗೆ ಸಂಬಂಧಪಟ್ಟ ಹೆಸರನ್ನೇ ಇಟ್ಟಿದ್ದರು ನಟ ಅಂಬರೀಶ್​.