ಬಂಗಾಳದಲ್ಲಿ ಮುರಿದು ಬಿದ್ದ ಮೈತ್ರಿ

ಪಶ್ಚಿಮ ಬಂಗಾಳದಲ್ಲಿ ಏರ್ಪಡಬೇಕಿದ್ದ ಕಾಂಗ್ರೆಸ್‌ ಹಾಗೂ ಎಡಪಕ್ಷಗಳ ನಡುವಿನ  ಮೈತ್ರಿ ಮುರಿದುಬಿದ್ದಿದೆ. ಕ್ಷೇತ್ರಗಳ ಹೊಂದಾಣಿಕೆಯ ಬಗ್ಗೆ ಕಾಂಗ್ರೆಸ್‌ ಹಾಗೂ ಸಿಪಿಎಂ ನೇತೃತ್ವದ ಎಡಪಕ್ಷಗಳ ಲೆಫ್ಟ್ ಫ್ರಂಟ್‌ ನಡುವಿನ ಮಾತುಕತೆಗಳು ವಿಫ‌ಲವಾಗಿದ್ದವು.  

ಕಾಂಗ್ರೆಸ್‌ನಿಂದ ಬುಧವಾರದ ಒಳಗಾಗಿ  ಮೈತ್ರಿ ಬಗ್ಗೆ ಅಧಿಕೃತ ಪ್ರಕಟಣೆ ಹೊರಬೀಳಬಹುದೆಂಬ ನಿರೀಕ್ಷೆಯನ್ನು  ಎಡಪಕ್ಷಗಳು ಹೊಂದಿದ್ದವು. ಜತೆಗೆ ಕಾಂಗ್ರೆಸ್‌ ಕೇಳಿದ ಸ್ಥಾನಗಳನ್ನು ನೀಡಲು ಸಾಧ್ಯವಿಲ್ಲ ಎಂದು ಸಿಪಿಎಂ ನಾಯಕ ಬಿಮನ್‌ ಬೋಸ್‌ ಸ್ಪಷ್ಟವಾಗಿ ಹೇಳಿದ್ದರಿಂದ ಮೈತ್ರಿ ಮುರಿದು ಬಿದ್ದಿದೆ.  

ಬಿಹಾರದಲ್ಲಿ ಏರ್ಪಡಬೇಕಿದ್ದ ಕಾಂಗ್ರೆಸ್‌-ಆರ್‌ಜೆಡಿ ನಡುವಿನ ಮಹಾಮೈತ್ರಿಗೆ ಹಿನ್ನಡೆಯಾಗಿದೆ ಎಂಬ ವದಂತಿಗಳನ್ನು ಆರ್‌ಜೆಡಿ ನಾಯಕ ತೇಜಸ್ವಿ ಯಾದವ್‌ ತಳ್ಳಿಹಾಕಿದ್ದಾರೆ. ಕ್ಷೇತ್ರಗಳ ಹೊಂದಾಣಿಕೆ ಬಗ್ಗೆ ಅಂತಿಮ ತೀರ್ಮಾನವಾಗಿಲ್ಲ. 22ರಂದು 40 ಕ್ಷೇತ್ರಗಳಿಗೆ ಕಾಂಗ್ರೆಸ್‌-ಆರ್‌ಜೆಡಿ ತನ್ನ ಅಭ್ಯರ್ಥಿಗಳನ್ನು ಪ್ರಕಟಿಸಲಿವೆ ಎಂದಿದ್ದಾರೆ.