ಉತ್ತರ ಸಿರಿಯ ಮಸೀದಿ ಮೇಲೆ ವೈಮಾನಿಕ ದಾಳಿ: 42 ನಾಗರಿಕರ ಸಾವು

ಬೇರೂತ್‌ : ಉತ್ತರ ಸಿರಿಯಾದ ಗ್ರಾಮವೊಂದರ ಮಸೀದಿಯ ಮೇಲೆ ಅಪರಿಚಿತ ವಿಮಾನಗಳು ನಡೆಸಿದ ಬಾಂಬ್‌ ದಾಳಿಗೆ ಕನಿಷ್ಠ 42 ಮಂದಿ ಮೃತಪಟ್ಟಿರುವುದಾಗಿ ಸಿರಿಯದ ಮಾನವ ಹಕ್ಕು ವಿಚಕ್ಷಣ ಕೇಂದ್ರ ತಿಳಿಸಿದೆ.

ಅಲೆಪ್ಪೋ ಪ್ರಾಂತ್ಯದಲ್ಲಿನ ಈ ಮಸೀದಿಯಲ್ಲಿ ಜನರು ಪ್ರಾರ್ಥನೆಗಾಗಿ ಸೇರಿದ್ದರು. ಆಗ ಅಪರಿಚಿತ ವಿಮಾನಗಳು ಮಸೀದಿಯನ್ನು ಗುರಿ ಇರಿಸಿ ಬಾಂಬ್‌ ದಾಳಿ ನಡೆಸಿದವು. ಪರಿಣಾಮವಾಗಿ 42 ನಾಗರಿಕರು ಹತರಾದರು ಎಂದು ಬ್ರಿಟನ್‌ನಲ್ಲಿ ನೆಲೆಗೊಂಡಿರುವ ಮಾನವ ಹಕ್ಕು ವಿಚಕ್ಷಣ ಕೇಂದ್ರದ ಮುಖ್ಯಸ್ಥ ರಾಮಿ ಅಬ್‌ದೆಲ್‌ ರೆಹಮಾನ್‌ ತಿಳಿಸಿದ್ದಾರೆ.

ಈ ವೈಮಾನಿಕ ಬಾಂಬ್‌ ದಾಳಿಯಲ್ಲಿ ನೂರಕ್ಕೂ ಅಧಿಕ ಜನರು ಗಾಯಗೊಂಡರೆಂದು ಅವರು ತಿಳಿಸಿದ್ದಾರೆ.