ಬಾಂಬ್‌ ಇದೆ ಎಂದು ವಿಮಾನ ಇಳಿಸಿದಳು!

ಕೋಲ್ಕತಾ: ಮಹಿಳಾ ಪ್ರಯಾಣಿಕರೊಬ್ಬರು ತನ್ನ ದೇಹದಲ್ಲಿ ಬಾಂಬ್‌ ಇದೆ. ಇದು ಸ್ಫೋಟಗೊಳ್ಳಲಿದೆ ಎಂದು ನೀಡಿದ ಹುಸಿ ಸಂದೇಶದಿಂದ ಏರ್‌ ಏಷ್ಯಾ ವಿಮಾನ ಕೋಲ್ಕತಾ ವಿಮಾನ ನಿಲ್ದಾಣಕ್ಕೆ ಹಿಂತಿರುಗಿದ ಘಟನೆ ನಡೆದಿದೆ.

ಶನಿವಾರ ರಾತ್ರಿ ಮುಂಬಯಿಗೆ ಹೋಗಬೇಕಿದ್ದ ಈ ವಿಮಾನವು ಸುಭಾಷ್‌ ಚಂದ್ರಬೋಸ್‌ ನಿಲ್ದಾಣದಿಂದ ಟೇಕ್‌ ಆಫ್ ಆಗಿತ್ತು. ಈ ವೇಳೆ ಮಹಿಳೆಯು, ಪೈಲಟ್‌ಗೆ ಹುಸಿ ಬಾಂಬ್‌ ಮಾಹಿತಿ ನೀಡಿದ್ದಾಳೆ. ಇದಾದ ಕೆಲವೇ ನಿಮಿಷಗಳಲ್ಲಿ ವಿಮಾನ ವಾಪಸ್‌ ಆಗಿದೆ.

20 ವರ್ಷದ ಈ ಮಹಿಳೆಯನ್ನು ವಶಕ್ಕೆ ಪಡೆದು ವಿಚಾರಣೆ ನಡೆಸಿದಾಗ, ಆಕೆಯು ಕೋಲ್ಕತಾಕ್ಕೆ ವಾಪಸ್‌ ಹೋಗಲು ಹೂಡಿದ ತಂತ್ರ ಇದಾಗಿದೆ ಎಂಬುದು ತಿಳಿದು ಬಂದಿದೆ.