ಚಿನ್ನಮ್ಮ ಬಗ್ಗೆ ಎಐಎಡಿಎಂಕೆ ಮೌನ

ಚೆನ್ನೈ: ಪ್ರಸ್ತುತ ಜೈಲಿನಿಂದ ಬಿಡುಗಡೆಯಾಗಿ ತವರಿಗೆ ಮರಳಿರುವ ಎಸ್‌. ಶಶಿಕಲಾ ಬಗ್ಗೆ ಎಐಎಡಿಎಂಕೆ ಸದಸ್ಯರು ಮೃದುಧೋರಣೆ ತಾಳುತ್ತಿದ್ದು, ಆಕೆಯ ಅಳಿಯನ ವಿರುದ್ಧ ಮಾತ್ರವೇ ಕಠಿನ ನಿಲುವು ಪ್ರದರ್ಶಿಸಲಾಗುತ್ತಿದೆ.

4 ವರ್ಷಗಳ ಹಿಂದೆ ಶಶಿಕಲಾ ಪಕ್ಷದಿಂದ ಉಚ್ಚಾಟನೆಗೊಂಡಿದ್ದರು. ಜೈಲಿನಿಂದ ಮರಳಿದ ಬಳಿಕವೂ ಚಿನ್ನಮ್ಮನ ವಿರುದ್ಧ ಎಐಎಡಿಎಂಕೆ ಪಕ್ಷದ ಸದಸ್ಯರು ಆರೋಪಗಳ ಮಳೆ ಸುರಿಸುತ್ತಾರೆ ಎಂದೇ ಭಾವಿ ಸಲಾಗಿತ್ತು. ಆದರೆ, ಈಗ ತಮಿಳುನಾಡಿನಲ್ಲಿ ಎಲ್ಲವೂ ಉಲ್ಟಾ! ಚಿನ್ನಮ್ಮನ ಬದಲಾಗಿ ಅಳಿಯ ದಿನಕರನ್‌ ಮಾತ್ರವೇ ಟಾರ್ಗೆಟ್‌ ಆಗುತ್ತಿದ್ದಾರೆ. ಇತ್ತೀಚೆಗಷ್ಟೇ ಸಿಎಂ ಪಳನಿಸ್ವಾಮಿ, “ಟಿಟಿ ದಿನಕರನ್‌ 10 ವರ್ಷಗಳಿಂದ ಪಕ್ಷದಲ್ಲಿಲ್ಲ. ಅಮ್ಮ ನಮ್ಮ ನಡುವೆ ಇದ್ದಾಗಲೂ ಆತನನ್ನು ಪ್ರಾಥಮಿಕ ಸದಸ್ಯತ್ವದಿಂದ ಕಿತ್ತುಹಾಕಲಾಗಿತ್ತು. ಯಾವುದೋ ಸಂದರ್ಭದಲ್ಲಿ ಮತ್ತೆ ಅವರು ಸೇರಿಕೊಂಡರು. ಈಗ ಮತ್ತೆ ಆತ ಪಿತೂರಿ ನಡೆಸುತ್ತಿದ್ದಾನೆ. ಆತ ಎಷ್ಟು ಅವತಾರ ತಾಳಿದರೂ ಪಕ್ಷ ಒಪ್ಪಿಕೊಳ್ಳದು’ ಎಂದಿದ್ದಾರೆ.