AI News: ಜಾತಕ ಹೇಳುತ್ತೆ ಕುಂಡಲಿ GPT !

ತಂತ್ರಜ್ಞಾನ, ಶಿಕ್ಷಣ ಸೇರಿದಂತೆ ಈಗಾಗಲೇ ವಿವಿಧ ಕ್ಷೇತ್ರಗಳನ್ನು ಆವರಿಸಿರುವ ಕೃತಕ ಬುದ್ಧಿಮತ್ತೆ (ಆರ್ಟಿಫಿಶಿಯಲ್‌ ಇಂಟೆಲಿಜೆನ್ಸ್‌ -ಎಐ) ಇದೀಗ ಜ್ಯೋತಿಷ್ಯಕ್ಕೂ ಕಾಲಿಟ್ಟಿದ್ದು, ಜನರ ಭವಿಷ್ಯ ಹೇಳಲು ಮುಂದಾಗಿದೆ. ಸೂರತ್‌-ಎನ್‌ಐಟಿಯ ಹಳೆಯ ವಿದ್ಯಾರ್ಥಿ ರಾಜ್‌ ಸುತಾರಿಯಾ ಅವರು ಎಐ ಆಧರಿತ ಕುಂಡಲಿ ಜಿಪಿಟಿ ಎನ್ನುವ ವೆಬ್‌ಸೈಟ್‌ ಅಭಿವೃದ್ಧಿಪಡಿಸಿದ್ದಾರೆ.

ಈ ಮೂಲಕ ಜನರು ತಮ್ಮ ಜಾತಕ ಹಾಗೂ ಭವಿಷ್ಯದ ಬಗ್ಗೆ ಎಐನಿಂದಲೇ ತಿಳಿದುಕೊಳ್ಳಬಹುದಾಗಿದೆ. ಜನರು ತಮ್ಮ ಕುಂಡಲಿಯನ್ನು ಆಯ್ಕೆ ಮಾಡಿದರೆ ಸಾಕು, ಎಐ ತಾನೇ ನಿಮ್ಮ ಜಾತಕ, ಅದರಲ್ಲಿರುವ ದೋಷ, ಗ್ರಹಗಳ ಸ್ಥಾನ-ಸಮಸ್ಯೆ, ಪರಿಹಾರ ಎಲ್ಲವನ್ನೂ ತಿಳಿಸಲಿದೆ. ಆರೋಗ್ಯ, ಅಂತಸ್ತು, ಕೌಟುಂಬಿಕ ವಿಚಾರ ಸೇರಿದಂತೆ ಎಲ್ಲವನ್ನೂ ಥೇಟ್‌ ಜೋತಿಷಿಗಳು ಹೇಳುವಂತೆಯೇ ವೆಬ್‌ಸೈಟ್‌ ಸಂಪೂರ್ಣವಾಗಿ ಬಳಕೆದಾರನ ಮುಂದೆ ತೆರೆದಿಡಲಿದೆ.