ಜಮ್ಮು: ಪಾಕಿಸ್ಥಾನದ ಜೈಲಿನಲ್ಲಿ 29 ವರ್ಷಗಳ ಕಾಲ ಕಳೆದ ಕಥುವಾ ನಿವಾಸಿ ಕುಲದೀಪ್ ಸಿಂಗ್ ಶುಕ್ರವಾರ ರಾತ್ರಿ ಇಲ್ಲಿ ತಮ್ಮ ತವರು ಮನೆಗೆ ಮರಳಿದ್ದು, ಗ್ರಾಮಸ್ಥರು ಅದ್ದೂರಿ ಸ್ವಾಗತ ಕೋರಿದರು.
ಔರಂಗಾಬಾದ್‌ನ ಮೊಹಮ್ಮದ್ ಗುಫ್ರಾನ್ ಅವರೊಂದಿಗೆ ಸಿಂಗ್ (53) ಅವರನ್ನು ಸೋಮವಾರ ಪಾಕಿಸ್ಥಾನ ಬಿಡುಗಡೆ ಮಾಡಿತ್ತು, ಅವರು ವಾಪಸಾತಿ ನಂತರ ಪಂಜಾಬ್‌ನ ಗುರುನಾನಕ್ ದೇವ್ ಆಸ್ಪತ್ರೆಯ ರೆಡ್‌ಕ್ರಾಸ್ ಭವನವನ್ನು ತಲುಪಿದ್ದರು.
1992 ರಲ್ಲಿ ಬಂಧಿಸಿದ ನಂತರ ಪಾಕಿಸ್ಥಾನಿ ಏಜೆನ್ಸಿಗಳು ಮೂರು ವರ್ಷಗಳ ಕಾಲ ತನಗೆ ಚಿತ್ರಹಿಂಸೆ ನೀಡಿವೆ ಎಂದು ಸಿಂಗ್ ಹೇಳಿದರು.ದೇಶಕ್ಕಾಗಿ ಯಾವುದೇ ತ್ಯಾಗದಿಂದ ಹಿಂದೆ ಸರಿಯಬೇಡಿ ಎಂದು ಕುಲದೀಪ್ ಸಿಂಗ್ ಯುವಕರನ್ನು ಕೇಳಿಕೊಂಡರು.
ಪಾಕ್ ನಲ್ಲಿ ಗೂಢಚರ್ಯೆ ನಡೆಸಿದ ಆರೋಪದ ಮೇಲೆ ಅವರನ್ನು ನ್ಯಾಯಾಲಯಕ್ಕೆ ಹಾಜರುಪಡಿಸಿ ಮತ್ತು ನಂತರ 25 ವರ್ಷಗಳ ಜೈಲು ಶಿಕ್ಷೆಗೆ ಕಳುಹಿಸಲಾಗಿತ್ತು. ಕಥುವಾದ ಬಿಲ್ಲವರ್‌ನಲ್ಲಿರುವ ಮಕ್ವಾಲ್ ಗ್ರಾಮದ ನಿವಾಸಿ ಸಿಂಗ್ ಅವರನ್ನು ಗ್ರಾಮಸ್ಥರು ಪಟಾಕಿ ಸಿಡಿಸಿ, ದೇಶ ಮತ್ತು ಅವರನ್ನು ಹೊಗಳಿ ಘೋಷಣೆಗಳನ್ನು ಕೂಗಿ ಆತ್ಮೀಯವಾಗಿ ಸ್ವಾಗತಿಸಿದರು.
ನನ್ನ ಎಲ್ಲಾ ಸ್ನೇಹಿತರಿಗೆ, ಗ್ರಾಮಸ್ಥರಿಗೆ ಮತ್ತು ವಿಶೇಷವಾಗಿ ಯುವಕರಿಗೆ ನನ್ನ ಸಂದೇಶವೆಂದರೆ ಹಾನಿ ಮಾಡುವ ತಪ್ಪು ಮಾರ್ಗಗಳಿಂದ ದೂರವಿರಿ. ಆದರೆ, ದೇಶಕ್ಕಾಗಿ ಯಾವುದೇ ತ್ಯಾಗ ಮಾಡುವ ವಿಚಾರದಲ್ಲಿ ಹಿಂದೆ ಸರಿಯಬೇಡಿ ಎಂದರು. ಪಾಕಿಸ್ಥಾನದಲ್ಲಿ ಸಿಂಗ್ ಅವರನ್ನು ಬಂಧಿಸಿದ ನಂತರ, ಲಾಹೋರ್‌ನ ಕೋಟ್ ಲಖ್‌ಪತ್ ಜೈಲಿನಿಂದ ಅವರಿಗೆ ಪತ್ರ ಬರೆದಾಗ ಮಾತ್ರ ಅವರು ಎಲ್ಲಿದ್ದಾರೆ ಎಂದು ತಿಳಿಯಿತು ಎಂದು ಅವರ ಕುಟುಂಬ ಸದಸ್ಯರು ತಿಳಿಸಿದ್ದಾರೆ.
ಪಾಕ್ ನಲ್ಲಿ ಗೂಢಚಾರಿಕೆಗೆ ಶಿಕ್ಷೆಗೊಳಗಾದ ಭಾರತೀಯ ಖೈದಿ ಸರಬ್ಜಿತ್ ಸಿಂಗ್ ಅವರ ಹತ್ಯೆಯ ನಂತರ ಕಳೆದ ಎಂಟು ವರ್ಷಗಳಿಂದ ಸಿಂಗ್ ಅವರೊಂದಿಗೆ ಯಾವುದೇ ಸಂಪರ್ಕವಿಲ್ಲದ ಕಾರಣ ಅವರು ಎಲ್ಲಾ ಭರವಸೆಯನ್ನು ಕಳೆದುಕೊಂಡಿದ್ದರು ಎಂದು ಅವರು ಹೇಳಿದರು.
ಅವರು ಬಹಳ ವರ್ಷಗಳ ನಂತರ ಮರಳಿ ನಮ್ಮ ನಡುವೆ ಬಂದಿರುವುದು ನಮಗೆ ಅಪಾರ ಖುಷಿ ತಂದಿದೆ ಎಂದು ಸಂಬಂಧಿಕರೊಬ್ಬರು ಹೇಳಿದ್ದಾರೆ.
