ಅರಮನೆ ಪ್ರವೇಶಿಸಿದ ಆದ್ಯವೀರ್‌ ಒಡೆಯರ್‌

ಮೈಸೂರು: ಸಾಂಸ್ಕೃತಿಕ ನಗರಿ ಮೈಸೂರಿನ ಯದುವಂಶದ ಕುಡಿ ಶುಕ್ರವಾರ ಅಂಬಾವಿಲಾಸ ಅರಮನೆ ಪ್ರವೇಶಿಸಿತು. ಕಳೆದ ಕೆಲವು ದಿನಗಳ ಹಿಂದಷ್ಟೇ ತ್ರಿಷಿಕಾ ಕುಮಾರಿ ಅವರು ಬೆಂಗಳೂರಿನ ಖಾಸಗಿ ಆಸ್ಪತ್ರೆಯಲ್ಲಿ ಗಂಡು ಮಗುವಿಗೆ ಜನ್ಮ ನೀಡಿದ್ದರು.

ಕಳೆದ ವಾರವಷ್ಟೇ ಬೆಂಗಳೂರಿನ ಅರಮನೆಯಲ್ಲಿ ನಡೆದ ಸಮಾರಂಭದಲ್ಲಿ ರಾಜವಂಶದ ಹೊಸ ಅತಿಥಿಗೆ ಆದ್ಯವೀರ್‌ ಎಂಬ ನಾಮಕರಣ ಮಾಡಲಾಗಿತ್ತು. ಬೆಂಗಳೂರಿನಿಂದ ಮೈಸೂರು ಅರಮನೆಗೆ ಮಗುವಿನೊಂದಿಗೆ ಆಗಮಿಸಿದ ರಾಜವಂಶಸ್ಥ ಯದುವೀರ್‌ ಹಾಗೂ ತ್ರಿಷಿಕಾ ದಂಪತಿಗೆ ಆರತಿ ಮಾಡಿ, ಇಳಿ ತೆಗೆದು ಸಂಭ್ರಮದಿಂದ ಬರಮಾಡಿಕೊಳ್ಳಲಾಯಿತು.

ಯದುವೀರ್‌ ಮಾತನಾಡಿ, ಆದ್ಯವೀರ್‌ ಎಂದರೆ ದುರ್ಗಿ, ಚಾಮುಂಡಿ ಎಂದರ್ಥ. ಆದ್ಯ ತುಂಬಾ ಚೆನ್ನಾಗಿದ್ದಾನೆ. ಶೀಘ್ರದಲ್ಲೇ ಚಾಮುಂಡಿಬೆಟ್ಟಕ್ಕೆ ತೆರಳಿ ತಾಯಿ ಚಾಮುಂಡೇಶ್ವರಿ ದೇವಿಯ ದರ್ಶನ ಪಡೆಯಲಾಗುವುದು. ಮುಂದಿನ ಕಾರ್ಯಕ್ರಮಗಳು ನನ್ನ ಅಮ್ಮ (ಪ್ರಮೋದಾದೇವಿ ಒಡೆಯರ್‌)ನ ಸಲಹೆ, ಸೂಚನೆಯಂತೆ ನಡೆಯಲಿದೆ. ಬೆಂಗಳೂರಿನಲ್ಲಿ ನಾಮಕರಣ ಮಾಡಿದ್ದು, ನಮ್ಮ ಅನುಕೂಲಕ್ಕಾಗಿ ಹೊರತು ಇದರ ಹಿಂದೆ ಬೇರೆ ಯಾವುದೇ ಉದ್ದೇಶವಿಲ್ಲ ಎಂದರು.