ಊರ್ವಶಿ ಹೂವು

ಹೂವಿನ ಹೆಸರನ್ನು ಹೆಣ್ಣು ಮಕ್ಕಳಿಗೆ ಇಡುವುದು ಸಾಮಾನ್ಯ ವಿಷಯ. ಆದರೆ ಊರ್ವಶಿ ರೌತೇಲಾ ವಿಚಾರದಲ್ಲಿ ಇದು ಉಲ್ಟಾ ಆಗಿದೆ. ಊರ್ವಶಿಯೇ ಈಗ ಹೂವಾಗಿ ಕಂಗೊಳಿಸುತ್ತಿದ್ದಾಳೆ. 

ವಿಷಯ ಏನಪ್ಪಾ ಅಂದರೆ ಅಂಡಮಾನ್‌-ನಿಕೋಬಾರ್‌ ದ್ವೀಪ ಸಮುತ್ಛಯದ ಆಡಳಿತ ಊರ್ವಶಿಗೆ ಫಿದಾ ಆಗಿದೆ. ಇತ್ತೀಚೆಗಷ್ಟೇ ಆಕೆಗೆ ಅಲ್ಲಿ ಸೌಂದರ್ಯ ಪ್ರಶಸ್ತಿಯೊಂದನ್ನು ನೀಡಲಾಗಿತ್ತು. ಇದರ ಬೆನ್ನಿಗೆ ಅಂಡಮಾನ್‌ನಲ್ಲಿ ಬೆಳೆಯುವ ಒಂದು ವಿಶಿಷ್ಟ ಹೂವಿಗೆ ಊರ್ವಶಿ ಎಂದು ಹೆಸರಿಟ್ಟು ನಟಿಯ ಹೆಸರನ್ನು ಚಿರಸ್ಥಾಯಿಯಾಗಿಸಿದೆ. ಇದರ ಬೆನ್ನಿಗೆ ಊರ್ವಶಿ ತನ್ನ ಮುಂದಿನ ಚಿತ್ರವನ್ನು ಅಂಡಮಾನ್‌-ನಿಕೊಬಾರ್‌ ದ್ವೀಪದಲ್ಲಿ ಚಿತ್ರೀಕರಿಸಲು ನಿರ್ಧಾರಿಸಿದ್ದಾಳಂತೆ. ಊರ್ವಶಿ ನಟಿಸಿದ ಹೇಟ್‌ ಸ್ಟೋರಿ 4 ಚಿತ್ರ ಸೂಪರ್‌ಹಿಟ್‌ ಆಗಿದ್ದು, ಇದರ ಖುಷಿಯಲ್ಲಿ ಆಕೆ ಒಂದು ಮರ್ಸಿಡಿಸ್‌ ಬೆಂಝ್ ಕಾರು ಖರೀದಿಸಿದ್ದಾಳಂತೆ. ಹೀಗೆ ಸದ್ಯ ಊರ್ವಶಿಯ ವೃತ್ತಿ ಬದುಕು ಚಿಗಿತುಕೊಳ್ಳುತ್ತಿದೆ. 

ಹೇಟ್‌ ಸ್ಟೋರಿ 4 ಬೆನ್ನಿಗೆ ಇನ್ನೂ ಹೆಸರಿಡದ ಚಿತ್ರವೊಂದರಲ್ಲಿ ಊರ್ವಶಿ ನಟಿಸುತ್ತಿದ್ದಾಳೆ. ಐದು ವರ್ಷದ ಹಿಂದೆಯೇ ಬಾಲಿವುಡ್‌ಗೆ ಬಂದಿದ್ದರೂ ಇಷ್ಟರ ತನಕ ಕುಂಟುತ್ತ ಸಾಗುತ್ತಿದ್ದ ಅವಳ ವೃತ್ತಿ ಬದುಕು ಈಗ ವೇಗ ಪಡೆದುಕೊಂಡಿದೆ. ಕನ್ನಡ ಮತ್ತು ಬಂಗಾಳಿಯ  ಒಂದು ಚಿತ್ರವೂ ಸೇರಿದಂತೆ ಸುಮಾರು 12 ಚಿತ್ರಗಳಲ್ಲಿ ನಟಿಸಿರುವ ಊರ್ವಶಿ ಸಹಜ ಸುಂದರಿ. ಉತ್ತರಾಖಂಡದ ಡೆಹ್ರಾಡೂನ್‌ನ ಸಿರಿವಂತ ಕುಟುಂಬದಲ್ಲಿ ಹುಟ್ಟಿದ ಆಕೆ ಇಂಜಿನಿಯರ್‌ ಆಗುವ ಉದ್ದೇಶದಿಂದ ಪ್ರವೇಶ ಪರೀಕ್ಷೆಯನ್ನೂ ಬರೆದಿದ್ದಾಳಂತೆ. ಅನಂತರ ಬಣ್ಣದ ಸೆಳೆತಕ್ಕೊಳಗಾಗಿ ಬಾಲಿವುಡ್‌ಗೆ ಬಂದ ಬಳಿಕ ಇಲ್ಲಿಯೇ ಸ್ಥಿರವಾಗಿದ್ದಾಳೆ.