ಗ್ಯಾಂಗ್‌ಸ್ಟರ್‌ ಅಬು ಸಲೇಂ ನಿಕಟವರ್ತಿ ಜಾನ್‌ ಉಸ್ಮಾನ್‌ ಖಾನ್‌ ಸೆರೆ

ಹೊಸದಿಲ್ಲಿ : ಗ್ಯಾಂಗ್‌ಸ್ಟರ್‌ ಅಬುಸಲೇಂನ ಶಂಕಿತ ನಿಕಟವರ್ತಿಯೊಬ್ಬನನ್ನು ಪೂರ್ವ ದಿಲ್ಲಿಯಲ್ಲಿ ಪೊಲೀಸರು  ಬಂಧಿಸಿದ್ದಾರೆ. ಈತನು ಕೊಲೆ, ಸುಲಿಗೆ ಸಹಿತ ಹಲವು ಅಪರಾಧ ಪ್ರಕರಣಗಳಿಗೆ ಸಂಬಂಧಿಸಿ ಪೊಲೀಸರಿಗೆ ಬೇಕಾಗಿದ್ದ. 

ಬಂಧಿತ ಜಾನ್‌ಉಸ್ಮಾನ್‌ ಖಾನ್‌ ಅಲಿಯಾಸ್‌ ರೀನು 30ರ ಹರೆಯದವನಾಗಿದ್ದು ಮುಂಬಯಿ ಮತ್ತು ದಿಲ್ಲಿಯಲ್ಲಿ ಈ ಹಿಂದೆ ಹಲವು ಬಾರಿ ಬಂಧಿತನಾಗಿದ್ದ. ಈತನನ್ನು ನಿನ್ನೆ ತಡರಾತ್ರಿ ದಿಲ್ಲಿಯ ಸಂಜಯ್‌ ಝೀಲ್‌ ಸಮೀಪ ಸೆರೆ ಹಿಡಿಯಲಾಯಿತು.

ಕಳೆದ ಜೂನ್‌ 3ರಂದು ತನ್ನ ಪತ್ನಿಯನ್ನು ಜನಕಪುರಿಯಲ್ಲಿ ಗುಂಡಿಕ್ಕಿ ಕೊಂದಿದ್ದ  ಖಾನ್‌, ಬಾಲಿವುಡ್‌ ನಟಿ ರವೀನಾ ಟಂಡನ್‌ ಳ ಪತಿ ಅನಿಲ್‌ ಥಡಾನಿಯ ಮೇಲೆ ಗುಂಡು ಹಾರಿಸಿದ ಪ್ರಕರಣದಲ್ಲಿ ಮುಂಬಯಿ ಪೊಲೀಸರಿಂದ ಬಂಧಿತನಾಗಿದ್ದ. 

ಪೂರ್ವ ದಿಲ್ಲಿಯ ಡೆಪ್ಯುಟಿ ಪೊಲೀಸ್‌ ಕಮಿಶನರ್‌ ಓಂ ವೀರ್‌ ಸಿಂಗ್‌ ಅವರು ಪಾತಕಿ ಖಾನ್‌ ಬಂಧನವನ್ನು ದೃಢೀಕರಿಸಿದ್ದು  ಆತನನ್ನು ಪ್ರಶ್ನಿಸಲಾಗುತ್ತಿದೆ ಎಂದು ತಿಳಿಸಿದ್ದಾರೆ.