ಕೋವಿಡ್ ನಿರ್ವಹಣೆ : ಮೋದಿ ಉತ್ತಮ : ಎಬಿಪಿ-ಸಿ ವೋಟರ್‌ ನಡೆಸಿದ ಸಮೀಕ್ಷೆಯಲ್ಲಿ ಬಹಿರಂಗ

ಹೊಸದಿಲ್ಲಿ: ಕೊರೊನಾ ನಿರ್ವಹಣೆ ವಿಚಾರದಲ್ಲಿ ಕಾಂಗ್ರೆಸ್‌ ನಾಯಕ ರಾಹುಲ್‌ ಗಾಂಧಿಗಿಂತ ಪ್ರಧಾನಿ ಮೋದಿ ಅವರೇ ಉತ್ತಮ ಎಂದು ಸಮೀಕ್ಷೆಯೊಂದು ಹೇಳಿದೆ.

ಎಬಿಪಿ-ಸಿ ವೋಟರ್‌ ಸಂಸ್ಥೆ ಈ ಸಮೀಕ್ಷೆ ನಡೆಸಿದೆ. ಸಮೀಕ್ಷೆಯಲ್ಲಿ ಪ್ರಧಾನಿ ಮೋದಿ ಉತ್ತಮವಾಗಿ ಕೊರೊನಾ ನಿರ್ವಹಣೆ ಮಾಡುತ್ತಿದ್ದಾರೆ ಎಂದು ಶೇ. 63ರಷ್ಟು ಮಂದಿ ಹೇಳಿದ್ದಾರೆ. ಒಂದು ವೇಳೆ ರಾಹುಲ್‌ ಗಾಂಧಿ ಈ ಸಂದರ್ಭದಲ್ಲಿ ಪ್ರಧಾನಿ ಆಗಿದ್ದಿದ್ದರೆ ಉತ್ತಮವಾಗಿ ನಿರ್ವಹಣೆ ಮಾಡುತ್ತಿದ್ದರು ಎಂದು ಶೇ. 22ರಷ್ಟು ಮಂದಿ ಅಭಿಪ್ರಾಯ ವ್ಯಕ್ತಪಡಿಸಿದ್ದಾರೆ.

ಮೋದಿ ಸರಕಾರಕ್ಕೆ 7 ವರ್ಷ ಸಂದ ಹಿನ್ನೆಲೆಯಲ್ಲಿ ಈ ಸಮೀಕ್ಷೆ ನಡೆಸಲಾಗಿದೆ. ಈಗಲೂ ಜನತೆ ಕೊರೊನಾ ನಿರ್ವಹಣೆ ವಿಚಾರದಲ್ಲಿ ಪ್ರಧಾನಿ ಮೋದಿ ಬಗ್ಗೆ ತೃಪ್ತಿ ಹೊಂದಿದ್ದಾರೆ ಎಂದು ಸಮೀಕ್ಷೆಯಿಂದ ಬಹಿರಂಗವಾಗಿದೆ. ಒಂದು ವೇಳೆ ನಾವು ಅಧಿಕಾರದಲ್ಲಿ ಇದ್ದಿದ್ದರೆ ಚೆನ್ನಾಗಿ ಕೆಲಸ ಮಾಡುತ್ತಿದ್ದೆವು ಎಂಬ ಕಾಂಗ್ರೆಸ್‌ ಟೀಕೆಯನ್ನು ಈ ಸಮೀಕ್ಷೆ ತಳ್ಳಿಹಾಕಿದೆ.

ನಗರ ಪ್ರದೇಶದಲ್ಲಿ ಶೇ. 65.8ರಷ್ಟು ಮಂದಿ ಪ್ರಧಾನಿ ಮೋದಿ ಅವರೇ ಉತ್ತಮ, ಶೇ. 22.1ರಷ್ಟು ಮಂದಿ ರಾಹುಲ್‌ ಉತ್ತಮ ಎಂದಿದ್ದಾರೆ. ಗ್ರಾಮಾಂತರದಲ್ಲಿ ಶೇ. 61.1 ಮಂದಿ ಮೋದಿಯವರನ್ನು ಬೆಂಬಲಿಸಿದ್ದರೆ, ಶೇ. 22.08 ಮಂದಿ ರಾಹುಲ್‌ಗೆ ಬೆಂಬಲ ನೀಡಿದ್ದಾರೆ. ಈ ಸಮೀಕ್ಷೆಯನ್ನು ಮೇ 23ರಿಂದ ಮೇ 27ರ ವರೆಗೆ ನಡೆಸಲಾಗಿದೆ. ಶೇ. 15 ಮಂದಿ ಉತ್ತರಿಸಲು ನಿರಾಕರಿಸಿದ್ದಾರೆ.