ಬೀಗಮುದ್ರೆ ವಿವಾದ: ಬಿಜೆಪಿ, ಆಪ್‌ ವಿವಾದ ಬಹಿರಂಗಕ್ಕೆ

ಹೊಸದಿಲ್ಲಿ : ಭಾರತೀಯ ಜನತಾ ಪಕ್ಷ ಮತ್ತು ಆಮ್‌ ಆದ್ಮಿ ಪಕ್ಷದ ನಡುವಿನ “ಬೀಗಮುದ್ರೆ’ ವಾಗ್ವಾದ ಈಗ ಬಹಿರಂಗಕ್ಕೆ ಬಂದಿದೆ. 

ಈ ವಿವಾದಕ್ಕೆ ಆಮ್‌ ಆದ್ಮಿ ಪಕ್ಷದ ಮುಖ್ಯ ಮಂತ್ರಿ ಅರವಿಂದ ಕೇಜ್ರಿವಾಲ್‌ ಅವರೇ ಕಾರಣ ಎಂದು ಬಿಜೆಪಿ ದೂರಿದೆ. ಬೀಗಮುದ್ರೆ ವಿಷಯಕ್ಕೆ ಸಂಬಂಧಿಸಿ ಉಭಯ ಪಕ್ಷಗಳ ನಡುವೆ ಮುಖಾಮುಖೀ ಚರ್ಚೆ ನಡೆದಿದ್ದಾಗ ಕೇಜ್ರಿವಾಲ್‌ ಅವರು ನಮ್ಮನ್ನು ಅವಮಾನಿಸಿದರು; ಮಾತ್ರವಲ್ಲದೆ ಬಿಜೆಪಿ ನಾಯಕ ವಿಜೇಂದರ್‌ ಗುಪ್ತಾ ಅವರೊಂದಿಗೆ ಆಪ್‌ ಸದಸ್ಯರು ದುರ್ವರ್ತನೆ ತೋರಿ ಅವರನ್ನು ದೂಡಿದಾಗ ಗುಪ್ತಾ ಅವರು ನೆಲಕ್ಕೆ ಕುಸಿದು ಬಿದ್ದರು ಎಂದು ದಿಲ್ಲಿ ಬಿಜೆಪಿ ಮುಖ್ಯಸ್ಥ ಮನೋಜ್‌ ತಿವಾರಿ ಹೇಳಿದ್ದಾರೆ. 

ಇದಕ್ಕೆ ಪ್ರತಿಯಾಗಿ ಕೇಜ್ರಿವಾಲ್‌ ಅವರು, “ಬಿಜೆಪಿ ನಾಯಕರು ಬೀಗಮುದ್ರೆ ವಿವಾದವನ್ನು ಖಾಸಗಿಯಾಗಿ ಚರ್ಚಿಸುವುಕ್ಕೆ ಪಟ್ಟು ಹಿಡಿದರು. ಆವಾಗ ನಾವು ಖಾಸಗಿ ಚರ್ಚೆ ಏಕೆ; ಎಲ್ಲ ಆಪ್‌ ಸದಸ್ಯರ ಮುಂದೆ ನಾವು ಬಹಿರಂಗವಾಗಿಯೇ ಚರ್ಚಿಸೋಣ ಎಂದು ಹೇಳಿದೆವು; ಅದಕ್ಕೆ ಬಿಜೆಪಿ ನಾಯಕರು ಒಪ್ಪಲಿಲ್ಲ’ ಎಂದು ಹೇಳಿದರು.