Election; ಹರಿಯಾಣ ಚುನಾವಣೆಗೆ ಆಪ್‌ ಮೈತ್ರಿ: ಕಾಂಗ್ರೆಸ್‌ ತೊಳಲಾಟ

ಹೊಸದಿಲ್ಲಿ: ಹರಿಯಾಣ ವಿಧಾನಸಭೆ ಚುನಾವಣೆಗೆ ಆಪ್‌ ಜತೆಗಿನ ಮೈತ್ರಿಗೆ ಸಂಬಂಧಿಸಿದಂತೆ ಕಾಂಗ್ರೆಸ್‌ ತೊಳಲಾಟದಲ್ಲಿದೆ. 90 ಕ್ಷೇತ್ರವಿರುವ ಹರಿಯಾಣದಲ್ಲಿ ಆಪ್‌ 10 ಕ್ಷೇತ್ರಗಳಿಗೆ ಬೇಡಿಕೆ ಇಡುತ್ತಿದೆ ಎಂಬ ಮಾಹಿತಿಯನ್ನು ಮಂಗಳವಾರ ನಡೆದ ಕಾಂಗ್ರೆಸ್‌ ಕೇಂದ್ರ ಚುನಾವಣ ಸಮಿತಿಗೆ ನೀಡಲಾಗಿದೆ.

ಈ ಮಧ್ಯೆ ವಿಪಕ್ಷ ನಾಯಕ ರಾಹುಲ್‌ ಗಾಂಧಿ ಅವರು ಹರಿಯಾಣದಲ್ಲಿ ಆಪ್‌ ಜತೆಗಿನ ಮೈತ್ರಿಗೆ ಮುಕ್ತವಾಗಿರುವುದು ಹೇಳಿದ್ದು, ಹೊಸ ಆಯಾಮ ನೀಡಿದೆ. ವಿಪಕ್ಷ ಕೂಟದ ಭಾಗವಾಗಿ ಆಪ್‌ಗೆ ಕೆಲವು ಸೀಟು ಗಳನ್ನು ನೀಡುವ ಬಗ್ಗೆ ನಾಯಕರು ಒತ್ತಾಯಿಸಿದ್ದಾರೆ ಎನ್ನಲಾಗಿದೆ.

ಲೋಕಸಭೆ ಚುನಾ ವಣೆಯಲ್ಲಿ ಕಾಂಗ್ರೆಸ್‌ ಜತೆಗೂಡಿ ಒಂದು ಸ್ಥಾನವನ್ನು ಗೆದ್ದಿರುವ ಆಪ್‌, ಅದೇ ಅನುಪಾತಕ್ಕೆ ಅನುಗುಣವಾಗಿ 10 ಕ್ಷೇತ್ರಗಳಿಗೆ ಬೇಡಿಕೆ ಇಟ್ಟಿದೆ ಎನ್ನಲಾಗಿದೆ. ಆದರೆ ಕಾಂಗ್ರೆಸ್‌ 5 ರಿಂದ 7 ಸ್ಥಾನಗಳನ್ನು ಬಿಟ್ಟುಕೊಡುವ ಬಗ್ಗೆ ಚಿಂತನೆ ನಡೆಸಿದೆ. ಈ ಸಂಬಂಧಿಸಿದಂತೆ ಬುಧವಾರ ಆಪ್‌ ರಾಜ್ಯಸಭಾ ಸಂಸದ ರಾಘವ್‌ ಛಡ್ಡಾ ಹಾಗೂ ಕಾಂಗ್ರೆಸ್‌ ಪ್ರಧಾನ ಕಾರ್ಯದರ್ಶಿ ಕೆ.ಸಿ. ವೇಣುಗೋಪಾಲ್‌ ಮಾತುಕತೆ  ನಡೆಸಲಿದ್ದಾರೆ. ಈ ಮಧ್ಯೆ, ಸಂಭಾವ್ಯ ಮೈತ್ರಿ ಬಗ್ಗೆ ಬಗ್ಗೆ ರಾಹುಲ್‌ ಗಾಂಧಿ ಮಾತನ್ನು ಆಪ್‌ ಶ್ಲಾಘಿಸಿದೆ.