ನರ್ಸ್‌ನಂತೆ ವೇಷ ತೊಟ್ಟು ಸ್ನೇಹಿತನ ಪತ್ನಿ ಹತ್ಯೆಗೆ ಸ್ಕೆಚ್‌!

ತಿರುವನಂತಪುರಂ: ಕೇರಳದ ಖಾಸಗಿ ಆಸ್ಪತ್ರೆಯೊಂದರಲ್ಲಿ ಆಗಷ್ಟೇ ಮಗುವಿಗೆ ಜನ್ಮ ನೀಡಿದ್ದ ಮಹಿಳೆಯೊಬ್ಬರನ್ನು ಆಕೆಯ ಪತಿಯ ಸ್ನೇಹಿತೆಯೇ ನರ್ಸ್‌ನಂತೆ ವೇಷತೊಟ್ಟು ಸಿನಿಮಿಯ ರೀತಿಯಲ್ಲಿ ಆಸ್ಪತ್ರೆಯಲ್ಲೇ ಕೊಲ್ಲಲು ಯತ್ನಿಸಿರುವ ಘಟನೆ ವರದಿಯಾಗಿದೆ.

 

ಪರುಮಲಾದ ಆಸ್ಪತ್ರೆಯಲ್ಲಿ ಸ್ನೇಹಾ(24) ಎಂಬವರು ಹೆರಿಗೆ ನಂತರದ ಚಿಕಿತ್ಸೆಗಾಗಿ ದಾಖಲಾಗಿದ್ದರು. ಈ ವೇಳೆ ಅವರ ಪತಿಯ ಸ್ನೇಹಿತೆ ಅನುಷಾ, ನರ್ಸ್‌ನಂತೆ ವೇಷ ತೊಟ್ಟು ಆಸ್ಪತ್ರೆ ಪ್ರವೇಶಿಸಿದ್ದಾರೆ. ಖಾಲಿ ಸಿರಿಂಜ್‌ ಬಳಸಿ, ಸ್ನೇಹ ಅವರ ನರಕ್ಕೆ ಗಾಳಿಯನ್ನು ಇಂಜೆಕ್ಟ್ ಮಾಡಲು ಪ್ರಯತ್ನಿಸಿದ್ದಾರೆ. ಎರಡು ಬಾರಿ ನಡೆಸಿದ ಪ್ರಯತ್ನವೂ ವಿಫ‌ಲವಾದ ಬಳಿಕ ಮೂರನೇ ಬಾರಿ ಪ್ರಯತ್ನಿಸಿದಾಗ ಸ್ನೇಹಾ ಅವರ ತಾಯಿಗೆ ಸಂಶಯ ಬಂದು ಆಸ್ಪತ್ರೆ ಸಿಬ್ಬಂದಿಗೆ ತಿಳಿಸಿದ್ದಾರೆ. ಬಳಿಕ ಸಿಬ್ಬಂದಿ ಅನುಷಾರನ್ನು ಹಿಡಿದು, ಪೊಲೀಸರಿಗೆ ಒಪ್ಪಿಸಿದ್ದಾರೆ.