ಆರೋಗ್ಯಕರ ಭೂ ಗ್ರಹ ಸಂಕಲ್ಪಕ್ಕೆ ಪ್ರಧಾನಿ ಮೋದಿ ಕರೆ

ಹೊಸದಿಲ್ಲಿ: ಅಂತಾರಾಷ್ಟ್ರೀಯ ಭೂ ದಿನದ (ಎ.22) ಪ್ರಯುಕ್ತ ಪ್ರಧಾನಿ ನರೇಂದ್ರ ಮೋದಿ ಅವರು, ಸಮಸ್ತ ದೇಶವಾಸಿಗಳಿಗೆ ಸ್ವಚ್ಛ ಮತ್ತು ಆರೋಗ್ಯಕರ ಗ್ರಹಕ್ಕಾಗಿ ಕೆಲಸ ಮಾಡುವಂತೆ ವಿನಂತಿಸಿದ್ದಾರೆ.

‘ಭೂ ತಾಯಿಯ ಈ ದಿನದಂದು, ನಾವೆಲ್ಲರೂ ನಮ್ಮ ಗ್ರಹಕ್ಕೆ ಅಪಾರ ಕಾಳಜಿ ಮತ್ತು ಕೃತಜ್ಞತೆ ಸಲ್ಲಿ ಸೋಣ. ಸ್ವಚ್ಛ, ಆರೋಗ್ಯಕರ, ಸಮೃದ್ಧ ಭೂಗ್ರಹ ನಿರ್ಮಿಸುವ ಸಂಕಲ್ಪ ಮಾಡೋಣ’ ಎಂದಿದ್ದಾರೆ.

ಅಲ್ಲದೆ, ನಮ್ಮ ಈ ಸ್ವಚ್ಛತೆಯ ಪ್ರತಿಜ್ಞೆಯು ಕೋವಿಡ್ ವಿರುದ್ಧ ಹೋರಾಟದಲ್ಲಿರುವ ಆರೋಗ್ಯ ಯೋಧರಿಗೆ ಇನ್ನಷ್ಟು ಬಲ ತುಂಬುವಂತವಾಗಲಿ ಎಂದೂ ಹೇಳಿದ್ದಾರೆ.

1970ರಲ್ಲಿ ಅಮೆರಿಕದ ಕ್ಯಾಲಿಫೋರ್ನಿಯಾದ ಸಾಗರದಲ್ಲಿ ಅಪಾರ ತೈಲ ಸೋರಿಕೆ ಉಂಟಾಗಿತ್ತು. ನಂತರ ಭೂ ಸಂರಕ್ಷಣೆಗಾಗಿ ಸಹಸ್ರಾರು ಅಮೆರಿಕನ್ನರು, ಮೆರವಣಿಗೆ ನಡೆಸಿದ್ದರು. ಇದರ ನೆನಪಿಗಾಗಿ ಅಂತಾರಾಷ್ಟ್ರೀಯ ಭೂ ದಿನ ಆಚರಣೆಗೊಳ್ಳುತ್ತಿದೆ.